საარჩევნო სიებთან დაკავშირებით კონსულტაციების საჭიროების მოტივით საარჩევნო კოდექსში ცვლილებების დღეს დაგეგმილი განხილვა პარლამენტმა გადადო.
ეს გადაწყვეტილება პარლამენტის თავმჯდომარემ დავით ბაქრაძემ მას შემდეგ გამოაცხადა, რაც მისმა მოადგილემ ქრისტიან-დემოკრატებიდან ლევან ვეფხვაძემ გამოთქვა შეშფოთება გაზაფხულის ადგილობრივ არჩევნებზე ამომრჩეველთა სიებით შესაძლო მანიპულაციებთან დაკავშირებით.
ვეფხვაძემ პრესაში გავრცელებულ ცნობებზე დაყრდნობით პარლამენტის სხდომაზე განაცხადა, რომ თბილისში ხდება მოქალაქეების რეგიონებიდან ჩაწერა მმართველი პარტიის მხარდასაჭერად.
ქართული მედია-საშუალებები ბოლო პერიოდში იუწყებოდნენ, რომ ნაციონალური მოძრაობა თბილისელ მოქალაქეებს გარკვეული ანაზღაურებისა თუ დასაქმების პერსპექტივის სანაცვლოდ სთავაზობს რეგიონიდან სულ მცირე 6 ადამიანის მათ საცხოვრებელ ბინებში ჩაწერას, რათა გარანტირებული ხმები მიიღონ არჩევნებზე.
ბაქრაძის თქმით, უნდა გაქარწყლდეს ეჭვები, რომ ”თითქოს ხდება საარჩევნო სიების ხელოვნური გაბერვა”. მისი თქმით, მიუხედევად იმისა, რომ საარჩევნო კოდექსის მიღება საჩქაროა, ასევე ”ძალიან მნიშვნელოვანია, რომ არანაირი კითხვის ნიშანი არ არსებობდეს”.
”უნდა გაჩნდეს რწმენა, რომ საარჩევნო გარემო არის ისე შეცვლილი, რომ გამორიცხავს ნებისმიერ მანიპულაციას სიებით,”- განაცხადა მან.
საარჩევნო კოდექსზე მესამე მოსმენით მსჯელობა, სავარაუდოდ, სიებზე და სხვა შეუთანხმებელ საკითხებზე კონსულტაციების შემდეგ გაგრძელდება.