RSS
Mobile
Twitter
Facebook
პრეზიდენტმა სააკაშვილმა განაცხადა 14 იანვარს, რომ საქართველო ”მიესალმება ბელარუსის ხელმძღვანელობის პრინციპულ, შორსმჭვრეტელურ და მე ვიტყოდი, ბრძნულ პოზიციას ჩვენ ურთიერთობებთან - ქართულ-ბელარუსულ ურთიერთობებთან მიმართებაში, ასევე დსთ-ს შიგნით ურთიერთობებში”.
ბათუმში ბელარუსის ვიცე-პრემიერთან ანდრეი კობიაკოვთან შეხვედრაზე საუბრისას სააკაშვილმა განაცხადა, რომ ბელარუსი ”ბევრი გამოწვევის” წინაშე დგას.
”ძალიან ვაფასებ, იმ პრინციპულობას და ვაჟკაცობას, რომლითაც ბელარუსი ამ გამოწვევებს უმკლევდება. ბელარუსის დეპუტატების დიდმა ჯგუფმა, მე ვადევნებდი თვალს დებატებს, ღიად დაუჭირა მხარი საქართველოს ტერიტორიულ მთლიანობას. ვფიქრობ, რომ ქართველი ხალხი ამას არასოდეს დაივიწყებს,” - განაცხადა სააკაშვილმა.
”ჩვენ ვაკვირდებით, რომ მიუხედავად მსოფლიო კრიზისისა, მიუხედავად დიდი პრობლემებისა ევროპაში, მიუხედავად იმისა, რომ ბალტიის ქვეყნებს და სხვა ქვეყნებს თქვენს გარშემო, პრინციპში, გააჩნიათ ძალიან რთული ეკონომიკური პრობლემები, ბელარუსი, მიუხედავად თქვენს ეკონომიკაზე ზეწოლისა სხვადასხვა მხრიდან, ბელარუსი თითქმის ერთადერთი ქვეყანაა რეგიონში, დადებითი ბალანსითა და ეკონომიკური ზრდით,” - განაცხადა სააკაშვილმა.
”მეორე მხრივ, თქვენ ახლა ეკონომიკურ რეფორმებს ახორციელებთ და წარმატებებს გისურვებთ ყველაფერ ამაში. ნებისმიერ შემთხვევაში, უნდა იცოდეთ, რომ ბელარუს ხალხს საქართველოში მეგობრები ჰყავს და ჩვენ დიდი სიმპათია გვაქვს თქვენი ქვეყნის, თქვენი ხალხის და თქვენი პოლიტიკური, სახელმწიფო მოღვაწეების მიმართ. ამრიგად, ყოველთვის მოხარულები ვიქნებით აქ გიმასპინძლოთ,” - დასძინა მან.
სააკაშვილმა ასევე განაცხადა, რომ საქართველოს ”ყოველთვის ახარებდა ჩვენ ბელარუს მეგობრებთან ურთიერთობები”.
”ზაფხულში მე ვაკვირდებოდი ბელორუსი ტურისტების უზარმაზარ ნაკადს, დასაწყისისთვის ის დიდია, მაგრამ ვფიქრობ, კიდევ უფრო გაიზრდება. ეს ძალიან სასიამოვნო ადამიანები არიან, ძალიან მეგობრულები, ძალიან დისციპლინირებულები და ძალიან სასიამოვნოა მათთან ურთიერთობა. ჩვენი სურვილია, რომ ეს კავშირები განვითარდეს. ჩვენ მოხარულები ვიქნებით, რომ ქართველები დადიოდნენ ბელარუსში საქმიანი ვიზიტებით ან სასწავლებლად და პირიქით,” - განაცხადა სააკაშვილმა.
