1 თებერვალს ექვსი პოლიტიკური პარტია - კონსერვატორები, ხალხის პარტია, მოძრაობა სამართლიანი საქართველოსთვის, ვეტერანთა პარტია, მომავლის პარტია, ქრისტიანული საქართველო - ადგილობრივი არჩევნებისათვის ერთიანი კანდიდატების გამოსავლენად პრაიმერის ჩატარებაზე შეთანხმდა.

დოკუმენტში სახელწოდებით ”საქართველოს გამარჯვების გეგმა”, რომელსაც დღეს მოეწერა ხელი, ნათქვამია, რომ პრაიმერები საქართველოს მასშტაბით 14 მარტს დაიწყება, ხოლო თბილისში დასკვნითი პრაიმერი მერისა და საკრებულოს წევრობის კანდიდატების გამოსავლენად 18 აპრილს გაიმართება.

პრაიმერის ორგანიზატორი პარტიების ჯგუფი მოუწოდებს სხვა ოპოზიციურ პარტიებს შეუერთდნენ მათ ინიციატივას და ასევე 9 აპრილს მათ მიერ დაგეგმილ ”გრანდიოზულ გამაფრთხილებელ” აქციას, რათა ”აღვადგინოთ ოპოზიციის და საზოგადოების ერთიანობა და დავიწყოთ მესამე ტალღა არალეგიტიმური რეჟიმის წინააღმდეგ”.

მათი გეგმის თანახმად, ანალოგიური საპროტესტო აქცია გაიმართება 26 მაისსაც, რომელზეც ”მიღებული იქნება საგანგებო და წინასწარი ზომები არჩევნების გამყალბებლების წინააღმდეგ”.

ამასთან ექვსი პარტია აცხადებს, რომ 30 მაისის ადგილობრივ არჩევნებში, რომლის თარიღიც ჯერ ოფიციალურად არ დანიშნულა, სააკაშვილის ხელისუფლების დამარცხებას და  ხმების ”ყველა საშუალებით” დაცვას აპირებს.

”ადგილობრივი არჩევნების მოგების შემდეგ გავაგრძელოთ უკომპრომისო ბრძოლა სააკაშვილის არაკანონიერი რეჟიმის საბოლოო და დაუყოვნებლივი დემონტაჟისთვის,”- აცხადებს ექვსი პარტია.

ამასთან, მათი თქმით, ეს გეგმა ღიაა ”ყველა რეალური ოპოზიციური ძალისთვის”.

თუმცა წამყვანი ოპოზიციური ძალების დიდი ნაწილი სკეპტიკურად უყურებს პრაიმერის იდეას და მასში მონაწილეობას არ აპირებს.