რუსეთის პრემიერ-მინისტრმა, ვლადიმერ პუტინმა განაცხადა, რომ მოსკოვი მინსკისგან სეპარატისტული აფხაზეთისა და სამხრეთ ოსეთის აღიარების საქმეში უფრო ”სწრაფ, ენერგიულ და ეფექტურ” მხარდაჭერას ელოდა.
”ჩვენ ვხედავთ, რომ რეალურად ეს არ ხდება,”- განაცხადა პუტინმა 16 მარტს ბელარუსში ვიზიტისას თავის კოლეგასთან, სერგეი სიდორსკისთან ერთობლივ პრესკონფერენციაზე და აქვე დასძინა, რომ პირადად მას არასდროს დაუყენებია ბელარუსის ხელმძღვანელობის წინაშე სეპარატისტული რეგიონების აღიარების აუცილებლობის საკითხი, მათ შორის არც ამ ვიზიტის დროს.
იმავდროულად, მან იმედი გამოთქვა, რომ არაღიარების შესახებ ამჟამინდელი პოლიტიკა ბელარუსს დასავლეთთან ურთიერთობების მოგვარებაში მაინც დაეხმარება.
”ჩვენ ყოველთვის მხარს ვუჭერდით ბელარუსის ურთიერთობების ნორმალიზებას დასავლელ მეზობლებთან, შეერთებულ შტატებთან. თუ ეს ამ [არაღიარების] ნიადაგზე მოხდება, მაშინ რაღაც დადებითი ეფექტი მაინც იქნება. იმიტომ რომ, ბოლოს და ბოლოს, ბელარუსი ჩვენთვის ახლობელი სახელმწიფოა, ჩვენ ვაშენებთ მოკავშირე სახელმწიფოს, ერთიან ეკონომიკურ სივრცეს. ბელარუსის ურთიერთობების ნორმალიზება დასავლურ თანამეგობრობასთან ამად ღირს,”- აღნიშნა პუტინმა.
ბელარუსი ამ დრომდე თავს იკავებს საქართველოს სეპარატისტული რეგიონების აღიარებისაგან, რის წინააღმდეგაც ეს ქვეყანა ევროკავშირმა გააფრთხილა. თბილისი მიესალმება მინსკის ”პრინციპულ და ვაჟკაცურ” პოზიციას.