7 აპრილს, მოსკოვში გაფორმდა შეთანხმება სეპარატისტულ სამხრეთ ოსეთში გაერთიანებული რუსული ბაზის შექმნის შესახებ.

ხელშეკრულებას, რომელიც 49 წლის ვადის დაიდო მისი 15-წლიანი პერიოდებით შემდგომი გაგრძელების შესაძლებლობით, რუსეთის თავდაცვის მინისტრმა ანატოლი სერდიუკოვმა და სეპარატისტული სამხრეთ ოსეთის თავდაცვის მინისტრმა იური ტანაევმა მოაწერეს ხელი.

რუსეთის თავდაცვის სამინისტროს ცნობით, ცხინვალის რეგიონში განთავსებულ სამხედრო ბაზას დიპლომატიური წარმომადგენლობის სტატუსი, ხოლო მის პირად შემადგენლობას დიპლომატიური იმუნიტეტი მიენიჭება.

შეთანხმება ასევე ითვალისწინებს გაერთიანებული რუსული ბაზის გამოყენებას სეპარატისტული რესპუბლიკის ”სუვერენიტეტისა და უსაფრთხოების” უზრუნველსაყოფად, მათ შორის წინააღმდეგობის გაწევას საერთაშორისო ტერორისტული ფორმირებებისათვის.

ანალოგიური შეთანხმება მოსკოვმა თებერვალში სოხუმთანაც გააფორმა.

საქართველოს საგარეო საქმეთა სამინისტრო 7 აპრილს გავრცელებულ განცხადებაში აპროტესტებს ”ოკუპანტ ქვეყანასა და მის მიერვე შექმნილ მარიონეტულ რეჟიმებს შორის” დადებულ შეთანხმებებს, რომელთაც ”სამართლებრივი შედეგები არა აქვს და ბათილია”.

”იმის მაგივრად, რომ შეასრულოს თავისი საერთაშორისო ვალდებულებები, რუსეთი პირიქით აძლიერებს სამხედრო ყოფნას საქართველოს ოკუპირებულ ტერიტორიებზე და ცდილობს კვაზილეგიტიმური სახე მისცეს თავისი საოკუპაციო ჯარებისათვის სამხედრო ბაზების შექმნის პროცესს,”- ნათქვამია განცხადებაში, ”ამასთან აშკარაა, რომ რუსეთის ამგვარი ქმედებები მხოლოდ ხელს უწყობს რეგიონში ვითარების დესტაბილიზაციას და ნაყოფიერ ნიადაგს ქმნის რუსეთისა და მარიონეტული რეჟიმების მუდმივი პროვოკაციებისათვის”.