რამოდენიმე რეგიონული გაზეთი 3 მაისს, როდესაც პრესის თავისუფლების დღე აღინიშნება, ცარიელი მთავარი გვერდით დაიბეჭდა, სადაც მხოლოდ ერთი წინადადება ეწერა: ”მოგვეცით საჯარო ინფორმაცია”.

16 რეგიონული გაზეთის მიერ გავრცელებულ ერთობლივ განცხადებაში ნათქვამია, რომ ისინი ხშირად აწყდებიან დაბრკოლებებს სახელმწიფო სტრუქტურებიდან საჯარო ინფორმაციის მიღებისას. საქართველოში ზოგადი ადმინისტრაციული კოდექსი, რომელიც საჯარო ინფორმაციაზე ხელმისაწვდომობას უზრუნველყობს საქართველოში 2000 წლიდან არის ძალაში.

განცხადებაში გაზეთები მოუწოდებენ პრეზიდენტს და პარლამენტს, რომ ”ფასადური გამჭირვალობის” ნაცვლად სახელმწიფო სტრუქტურების რეალური გამჭირვალობა უზრუნველყონ.

საქართველოს ახალგაზრდა იურისტთა ასოციაციამ (საია) 3 მაისს ასევე გაავრცელა განცხადება, სადაც ნათქვამია, რომ ”ბოლო დროს განსაკუთრებით მომრავლდა სახელმწიფო ორგანოების მხრიდან ჟურნალისტების სრული იგნორირების შემთხვევები”. ორგანიზაციის თქმით, თბილისის მერია ”აბსოლუტურად უკანონო უარს ამბობს” მისთვის საჯარო ინფორმაციის მიწოდებაზე.

ორგანიზაციის განცხადებით, ადგილობრივი თვითმმართველობის ორგანოები ”უფრო მეტად აღრმავებენ ინფორმაციის თავისუფლებისათვის დაწესებული  ბარიერების სამარცხვინო პრაქტიკას”.