აშშ–ის სახელმწიფო მდივანი ჰილარი კლინტონი 5 ივლისს საქართველოში ვიზიტის დროს აშშ–საქართველოს სტრატეგიული თანამშრომლობის მიმდინარეობას და 30 მაისის ადგილობრივი არჩევნების შედეგებს განიხილავს, განაცხადა აშშ–ის სახელმწიფო მდივნის თანაშემწემ ევროპისა და ევრაზიის საკითხებში ფილიპ გორდონმა.

კლინტონი აღმოსავლეთ ევროპულ ტურნეს 1 ივლისს უკრაინიდან დაიწყებს. შემდეგ ის პოლონეთს, აზერბაიჯანს, სომხეთს და საქართველოს ეწვევა.

თბილისში აშშ–ის სახელმწიფო მდივანი პრეზიდენტ სააკაშვილს, საგარეო საქმეთა მინისტრს გრიგოლ ვაშაძეს, ოპოზიციის და არასამთავრობო ორგანიზაციების წარმომადგენლებს, და ასევე ქალ ლიდერებს შეხვდება, განაცხადა გორდონმა. 

"მსგავსი ტურნეების დროს, როდესაც არა ერთ ქვეყანას სტუმრობ, მრავალმხრივი მიზნები გაგაჩნია,“ – განაცხადა მან 29 ივნისს ვაშინგტონში ჟურნალისტებთან დაგეგმილი ვიზიტის შესახებ გამართულ ბრიფინგზე. "როგორც ვფიქრობ, საერთო თემა ამ შემთხვევაში, რომელიც ყველა ამ ქვეყნისთვის საერთო იქნება, არის დემოკრატიის თემა“.

გორდონმა ასევე განაცხადა, რომ მას არ მიაჩნია, რომ ამ ტურნეს მთავარი მიზანი პარტნიორების დარწმუნებაა იმაში, რომ აშშ პარტნიორების ხარჯზე ახდენს რუსეთთან ურთიერთობების გადატვირთვას. მისი თქმით, ვაშინგტონის პარტნიორებს ისედაც კარგად ესმით, რომ "რუსეთთან უკეთესი ურთიერთობები არ ხდება რუსეთის მახლობლად მდებარე სუვერენულ, დამოუკიდებელ ქვეყნებთან ურთიერთობების ხარჯზე“.    

"ჩემი ვარაუდით, ორივე ადგილას [უკრაინასა და საქართველოში] სახელმწიფო მდივანი თავის კოლეგებთან რუსეთის შესახებ ისაუბრებს, თუმცა ეს საკითხი ამ ვიზიტის მიზეზად არ მიმაჩნია,“ – განაცხადა მან, "არ გვგონია, რომ აშშ-ის უკეთესი ურეთიერთობები რუსეთთან ვინმესთვის შეშფოთების მიზეზი უნდა იყოს.”

გორდონმა იქვე დასძინა, რომ თუ ამასთან დაკავშირებით ეჭვები მაინც არსებობს, სახელმწიფო მდივანი ”სიამოვნებით განიხილავს” ამ საკითხს.

მან კიდევ ერთხელ გაიმეორა, რომ აშშ კვლავაც მოუწოდებს რუსეთს 12 აგვისტოს ცეცხლის შეწყვეტის ექვსპუნქტიანი შეთანხმებით აღებული ვალდებულებები შეასრულოს და უზრუნველყოს გამჭირვალობა აფხაზეთსა და სამხრეთ ოსეთის რეგიონებში საერთაშორისო მისიების შეშვების გზით.

"ჩვენ უკმაყოფილო ვართ იქ არსებული ვითარებით და ეს მკაფიოდ გამოვხატეთ. პრეზიდენტმა [ობამამ] გასულ კვირაში ნათლად განუმარტა ეს პრეზიდენტ მედვედევს, და ჩვენ მტკიცედ ვაცხადებთ, რომ პატივს ვცემთ საქართველოს სუვერენიტეტს და ტერიტორიულ მთლიანობას,“ – განაცხადა გორდონმა.