რუსეთის პრეზიდენტი დიმიტრი მედვედევი თავდაცვის მინისტრთან ანატოლი სერდიუკოვთან ერთად 8 აგვისტოს ხანმოკლე ვიზიტით სოხუმს ესტუმრა.

სოხუმში გამართულ შეხვედრაზე მედვედევმა განუცხადა აფხაზეთის ლიდერს სერგეი ბაღაფშს, რომ მოსკოვის მიერ აფხაზეთის აღიარების შემდეგ მის ვიზიტს რეგიონში "განსაკუთრებული მნიშვნელობა“ აქვს, რადგანაც ის აგვისტოს ომის მეორე წლისთავს დაემთხვა.

„ორი წლის წინ სამხრეთ ოსეთში მძიმე მოვლენები მოხდა, რასაც მთელი რიგი პოლიტიკური პროცესები მოყვა, მათ შორის რუსეთის მიერ აფხაზეთის და სამხრეთ ოსეთის აღიარება,“ – განაცხადა მედვედევმა.

მისი თქმით, ორი რეგიონის აღიარების გადაწყვეტილება "ადვილი არ ყოფილა, მაგრამ როგორც დრომ გვიჩვენა, ეს სწორი“ გადაწყვეტილება იყო.

"მაშინ აფხაზეთის და სამხრეთ ოსეთის ხალხების არსებობა საფრთხის ქვეშ იდგა. და ეს გადაწყვეტილება რომ არ ყოფილიყო მაშინ, სიტუაცია პრინციპულად განსხვავებული იქნებოდა,“ – განაცხადა მან, "ახლა ვითარება დამშვიდდა და ამას საერთაშორისო პარტნიორებთან ურთიერთობაშიც ვხედავ. რა თქმა უნდა, მას ყველა სხვადასხვანაირად აღიქვამს: ზოგი ასე ფიქრობს, ზოგიც ისე. მაგრამ, ნებისმიერ შემთხვევაში, არსებობს ობიექტური ფაქტორები და ისინი გახმოვანდა რუსული, აფხაზური და სამხრეთ ოსური მხარეების მიერ. შემდეგ ისინი ჰეიდი ტალიავინის მოხსენებაში და სხვა დოკუმენტებში აისახა. სწორედ ამიტომ ვფიქრობ, რომ სიმართლე ჩვენს მხარესაა“.

მისი თქმით, რუსეთი მზად არის განაგრძოს პოლიტიკური, ეკონომიკური და სამხედრო თანამშრომლობა სოხუმთან და ცხინვალთან. მედვედევმა, რომელმაც სოხუმის სანაპიროზეც გაისეირნა, განუცხადა იქ მყოფ რუს ტურისტებს, რომ მოსკოვი დაეხმარება აფხაზეთს აეროპორტის და საჰაერო მიმოსვლის აღდგენაში, რათა რეგიონმა მეტი ტურისტი მიიზიდოს.