პრეზიდენტმა სააკაშვილმა უარყო განცხადებები, რომ ისრაელის ორი მოქალაქის დაკავებამ, რომელთა საქმეც მთავრობისთვის ქრთამის შეთავაზების ბრალდებით სასამართლოში იხილება, დაძაბა ურთიერთობები საქართველოს და ისრაელს შორის. მისი თქმით, ორ ქვეყანას შორის ურთიერთობები "მთლიანობაში შესანიშნავია“.

"ჩვენ თითქმის ვასრულებთ საქართველოსა და ისრაელს შორის უვიზო რეჟიმის შეთანხმებაზე მუშაობას,“ – განაცხადა მან საზოგადოებრივი მაუწყებლის რუსულენოვან პირველი საინფორმაციო კავკასიურ არხთან (PIK) ინტერვიუში 24 თებერვალს. 

რონ ფუქსი, რომელსაც ხანგრძლივი, მრავალმილიონიანი კომერციული დავა მოიგო საქართველოსთან და მისი პარტნიორი, ზეევ ფრენკიელი ქართველმა სამართალდამცავებმა 14 ოქტომბერს ბათუმში დააკავეს, როდესაც ისინი საქართველოს ფინანსთა მინისტრის მოადგილეს ავთანდილ ხარაიძეს ხვდებოდნენ. მათ ბრალი ედებათ ხარაიძისთვის ქრთამის შეთავაზებაში. ამის სანაცვლოდ, გამოძიების ინფორმაციით, ისინი ითხოვდნენ „საქართველოს ხელისუფლების დაყოლიებას“, რათა ამ უკანასკნელს არ გაესაჩივრებინა საერთაშორისო საარბიტრაჟო სასამართლოს გადაწყვეტილება. რონ ფუქსის ადვოკატების განცხადებით, მათი კლიენტი იმიტომ დააპატიმრეს, რომ აეძულებინათ ის უარი ეთქვა ამ მრავალმილიონ მოთხოვნაზე.

"ჩვენ პირველ ადგილზე ვართ რეგიონში კორუფციის არარსებობის თვალსაზრისით. ყველა, მათ შორის უცხოელებიც, არ არის მზად, რომ ამ წესებით ითამაშოს. ეს გასაგებია, რადგანაც ადრე საქართველო იყო ტერიტორია, სადაც ადამიანს შეეძლო ეყიდა და გაეყიდა ყველაფერი მთავრობის დონეზე,“ – განაცხადა სააკაშვილმა.

"მე კონკრეტულ სისხლის სამართლებრივ საქმეზე კომენტარს ვერ გავაკეთებ; ეს ჩემი საქმე არ არის; ეს სასამართლოს საქმეა, მაგრამ ჩვენ უნდა გვესმოდეს, რომ ყველაფერი შეიძლება მოხდეს სახელმწიფოებს შორის ურთიერთობებში. არიან ქართველები, რომლებიც ისრაელის ციხეებში იმყოფებიან, რომელთაც ისრაელის კანონები დაარღვიეს და ისრაელის მოქალაქეებმაც შეიძლება დაარღვიონ ქართული კანონები; ეს საკითხი სასამართლომ უნდა გადაწყვიტოს“.

"რადგანაც ჩვენ ვაშენებთ დემოკრატიულ, არაკორუმპირებულ ქვეყანას, მეგობრული ურთიერთობებიც კი, ყველაზე მაღალი დონის პოლიტიკური კონტაქტებიც კი ვერ შეცვლის იმ სასამართლოების გადაწყვეტილებას, რომლებიც კანონის უზენაესობის ფარგლებში მოქმედებენ. უნდა გვესმოდეს, რომ ჩვენ გავიზარდეთ და ჩვენ სერიოზული ქვეყანა ვართ,“ – განაცხადა სააკაშვილმა.

ისრაელის ორი მოქალაქის სასამართლო პროცესი თბილისის საქალაქო სასამართლოში დეკებრის ბოლოდან მიმდინარეობს. ამჟამად, სასამართლო პროცესზე მოწმეთა დაკითხვა მიმდინარეობს. ამჟამად სასამართლო მთავარი მოწმის, საქართველოს ფინანსთა მინისტრის მოადგილის დაკითხვას აწარმოებს.