ქართული და რუსული მხარები მოსკოვის ვაჭრობის მსოფლიო ორგანიზაციაში (ვმო) გაწევრიანებასთან დაკავშირებით მომდევნო შეხვედრას აპრილში გამართავენ, თუმცა ზუსტი თარიღი ჯერ–ჯერობით უცნობია, განუცხადა პრემიერ–მინისტრის პრესსპიკერმა ნიკო მჭედლიშვილმა Civil.ge-ს 11 მარტს.

მან თავი შეიკავა ესაუბრა იმ შეხვედრის დეტალებზე, რომელიც ბერნში 10 მარტს შვეიცარიის შუამავლობით გაიმართა.

ბერნში რუსულ მხარესთან შეხვედრაში მონაწილეობა მიიღეს პრემიერ–მინიტრის მთავარმა მრჩეველმა და ქართული მხარის მთავარმა მომლაპარაკებელმა ვმო–ს საკითხებზე თამარ კოვზირიძემ და საქართველოს საგარეო საქმეთა მინისტრის მოადგილემ სერგი კაპანაძემ.

შეხვედრა შვეიცარიის შუამავლობით გაიმართა, რომელიც რუსეთის დიპლომატიურ ინტერესებს წარმოადგენს საქართველოში და საქართველოს ინტერესებს რუსეთში მას შემდეგ, რაც ორმა ქვეყანამ 2008 წლის აგვისტოს ომის შემდეგ დიპლომატიური ურთიერთობები გაწყვიტა. 

ვაშინგტონი "ძალიან აქტიურად მოუწოდებდა“ რუსეთსა და საქართველოს შვეიცარიის შუამავლობის პირობებში მოლაპარაკების მაგიდას მისხდომოდნენ, თუმცა აშშ–ის ხელისუფლების წარმომადგენლები ამ მოლაპარაკებებში არავითარ როლს არ ასრულებენ, იტყობინება New York Times–ი აშშ–ის ადმინისტრაციის მაღალი რანგის წარმომადგენლის სიტყვებზე დაყრდნობით, რომელმაც კომენტარი ანონიმურობის დაცვის პირობით გააკეთა.