საქართველოს საგარეო საქმეთა მინისტრმა გრიგოლ ვაშაძემ თავისი რუსი კოლეგა, სერგეი ლავროვი ქართულ და რუსულ დელეგაციებს შორის მიღწეული შეთანხმების დარღვევაში დაადანაშაულა. 

შეთანხმების თანახმად, მხარეებს არ უნდა ესაუბრათ მედიასთან რუსეთის ვმო–ში გაწევრიანების თაობაზე მიმდინარე მოლაპარაკებების შესახებ.

"10 მარტს, თქვენ იცით, რომ შედგა ამ მოლაპარაკებების პირველი რაუნდი და ამ მოლაპარაკებებზე ორი შეთანხმება იყო მიღწეული: პირველი, რომ მოლაპარაკებები გაგრძელდება აპრილში და მეორე, რომ დელეგაციები და მხარეები პრესასთან კომენტარებს არ გააკეთებდნენ მოლაპარაკებების მიმდინარეობაზე,“ – განაცხადა ვაშაძემ 15 მარტს ეუთოს მოქმედ თავმჯდომარესთან ერთობლივ პრესკონფერენციაზე. 

"ძალიან დიდი სინანულით მინდა ვთქვა, რომ რუსული დიპლომატიის მამამთავარმა, ბატონმა ლავროვმა რამდენიმე დღის მერე დაარღვია ეს შეთანხმება, რაც რუსეთის დიპლომატიის ტრადიციაა. მან ერთ წინადადებაში დაარღვია შეთანხმება, გამოგვიგზავნა მუქარა და წამოაყენა წინაპირობები. ასე რომ, თქვენ თვითონ შეგიძლიათ იმსჯელოთ, რა შესანიშნავი მიდგომა აქვს რუსეთის დიპლომატიას მიღწეულ შეთანხმებებთან,“ – განაცხადა ვაშაძემ.

ვაშაძეს მხედველობაში ჰქონდა სერგეი ლავროვის 13 მარტის განცხადება, როდესაც მან განაცხადა, რომ თბილისთან შეუთანხმებლობის შემთხვევაში, მოსკოვი საქართველოს თანხმობის გარეშე შეეცდება ვმო–ში გაწევრიანებას. 

ლავროვმა განაცხადა, რომ საქართველოს მოთხოვნებს, რომ რუსეთის გაწევრიანებაზე თანხმობის სანაცვლოდ ფსოუს და როკის გამშვებ პუნქტებზე ქართული საბაჟო სამსახურები განთავსდნენ, არაფერი აქვს საერთო ვმო–სთან დაკავშირებულ საკითხებთან.

"თუ ჩვენი ქართველი კოლეგები კვლავ მტკიცედ იდგებიან ამგვარ პოლიტიზირებულ პოზიციაზე, ალბათ, სხვაგვარად მოგვიწევს ვმო–ში გაწევრიანების საკითხის მოგვარება – მათი [საქართველოს] მონაწილეობის გარეშე. ასეთი შესაძლებლობა არსებობს,“ – განაცხადა ლავროვმა რუსეთის მე–3 არხთან ინტერვიუში.