სასამართლომ 10 ხმით 6–ის წინააღმდეგ გაიზიარა რა რუსეთის ერთ–ერთი შუამდგომლობა, განაცხადა, რომ "მას არ გააჩნია უფლებამოსილება განიხილოს საქართველოს მიერ 2008 წლის 12 აგვისტოს შეტანილი სარჩელი“ რუსეთის წინააღმდეგ, რომელშიც რასობრივი დისკრიმინაციის ყველა ფორმის აღმოფხვრის შესახებ (CERD) 1965 წლის საერთაშორისო კონვენციით აღებული ვალდებულებების დარღვევას ედავებოდა 1990 წლიდან 2008 წლის აგვისტომდე სამ სხვადსხვა პერიოდში აფხაზეთსა და სამხრეთ ოსეთში განხორციელებული ინტერვენციების დროს.

“სასამართლო დაეთანხმა რუსეთის ფედერაციის პროტესტს და არგუმენტაციას საქმის განხილვის წინააღმდეგ,“– ნათქვამია რუსეთის საგარეო უწყების მიერ 1 აპრილს გავრცელებულ განცხადებაში,“ამდენად, ამ საქმის წარმოება შეწყვეტილია. მოქმედებას წყვეტს სასამართლოს 2008 წლის 15 ოქტომბრის გადაწყვეტილებაც ქართული სარჩელის უზრუნველყოფის ე.წ. "დროებით ზომებზე“.

რუსეთის საგარეო უწყების იურიდიული დეპარტამენტის დირექტორმა, კირილ გევორგიანმა ჰააგაში სასამართლო გადაწყვეტილების გამოცხადების შემდეგ განაცხადა: "ეს ძალიან, ძალიან კარგი გადაწყვეტილებაა. ეს ზუსტად ისაა, რის დამტკიცებასაც ჩვენ ვცდილობდით სასამართლოსთვის“.

საქართველომ განაცხადა, რომ ის მოაგვარებს იმ "პროცედურულ“ და "ტექნიკურ“ საკითხებს, რომლებმაც ჰააგის სასამართლოს გადაწყვეტილება განაპირობა, რათა მსვლელობა მისცეს საქმეს რუსეთის წინააღმდეგ.