Civil.ge-ს შესახებ
Eng | ქარ | Рус
ბოლო განახლება: 11:10 - 28 აპრ.'18
RSS
Mobile
Twitter
Facebook
ოპოზიციას ახალ საარჩევნო წინადადებებზე პასუხი არ მიუღია
სივილ ჯორჯია, თბილისი / 11 აპრ.'11 / 17:05

რვა ოპოზიციურ პარტიას საარჩევნო სისტემასთან დაკავშირებულ ახალ წინადადებებზე, რომლებიც გასულ კვირას წარმოადგინეს, მმართველი პარტიისგან რაიმე პასუხი არ მიუღია.

“ოპოზიციური რვიანის“ წარმომადგენელი ახალი მემარჯვენეებიდან, მამუკა კაციტაძე აცხადებს, რომ მმართველ პარტიას მათი მორიგი შეთავაზებები მედიისა და საარჩევნო მოლაპარაკებების მოდერატორი ორგანიზაციის  – საარჩევნო სისტემების საერთაშორისო ფონდის (IFES) მეშვეობით გაეგზავნა.

“თუმცა რაიმე კონკრეტული ტიპის ინიციატივა ან პასუხი ჯერ არ მიგვიღია,“– განუცხადა მან 11 აპრილს Civil.ge-ს და დასძინა, რომ არაოფიციალურ დონეზე არსებობს ინფორმაცია იმის თაობაზე, თითქოს ხელისუფლება გარკვეულ შემხვედრ წინადადებებს ამზადებს.

“ამ გაზაფხულის განმავლობაში ხელისუფლება ვერ აირიდებს თავიდან პასუხის გაცემას,“– აღნიშნა კაციტაძემ.

მმართველი პარტიის დეპუტატმა პავლე კუბლაშვილმა უარი თქვა კომენტარის გაკეთებაზე საარჩევნო მოლაპარაკებების ირგვლივ არსებულ ვითარებასა და ოპოზიციის მიერ წარმოდგენილ ახალ წინადადებებზე. 

მმართველი პარტია აცხადებდა, რომ არ დათანხმდება ერთმანდატიანი მაჟორიტარული სისტემის გაუქმებას. თავდაპირველად ოპოზიცია არსებული სისტემის შეცვლას მოითხოვდა, თუმცა ბოლო შემოთავაზებით დათანხმდა მაჟორიტარული სისტემის შენარჩუნების პრინციპს იმ პირობით, რომ პარტიას როგორც მაჟორიტარული წესით, ისე პარტიული სიით იმდენი მანდატი უნდა ერგოს  პარლამენტში, ამომრჩეველთა რამდენი პროცენტიც დაუჭერს მას მხარს.

ამ საკითხზე ერთადერთი კომენტარი მხოლოდ საპარლამენტო უმრავლესობის ლიდერმა დეპუტატმა პეტრე ცისკარიშვილმა გააკეთა. გასულ კვირას მან განაცხადა, რომ ოპოზიციამ "აბსურდული“  შემოთავაზებით პრაქტიკულად კონსტრუქციული დიალოგის გზა მოჭრა.

საარჩევნო რეფორმაზე მოლაპარაკებები 9 მარტის შემდეგ შეჩერებულია, რაშიც მხარეები ერთმანეთს სდებენ ბრალს. 

ოპოზიციური რვიანი აცხადებს, რომ მათი პოზიცია უცვლელია და როგორც კი ხელისუფლება "ადეკვატურ“ წინადადებებს წარმოადგენს, ისინი მოლაპარაკებათა მაგიდას დაუბრუნდებიან.

მანამდე კი კაციტაძის განცხადებით, "რვიანის" წარმომადგენლები განაგრძობენ შეხვედრებს საერთაშორისო და ადგილობრივ წარმომადგენლებთან მათი პოზიციისათვის მხარდაჭერის მოპოვების მიზნით. ამ კამპანიის ფარგლებში დაგეგმილია შეხვედრები რიგი საელჩოების წარმომადგენლებთან და ასევე რეგიონებში გასვლითი შეხვედრები.

იმავდროულად, 13 აპრილს ევროპის საბჭოს საპარლამენტო ასამბლეა საქართველოს მიერ აღებული ვალდებულებების შესრულების შესახებ რეზოლუციის პროექტს განიხილავს.

რეზოლუციის პროექტში წამოწეული ერთ–ერთი საკითხი საარჩევნო სისტემაზე მოლაპარაკებებს ეხება. დოკუმენტში ნათქვამია, რომ 2012 წლის საპარლამენტო და 2013 წლის საპრეზიდენტო არჩევნები „ლაკმუსის ტესტი იქნება საქართველოში მომწიფებული, უფრო ყოვლისმომცველი და ძლიერი დემოკრატიული სისტემის კონსოლიდაციისთვის“.

რეზოლუციის პროექტი მიესალმება საარჩევნო რეფორმაზე მომუშავე ჯგუფის ხელახლა ჩამოყალიბებას და ასევე, „სრულიად ახალი საარჩევნო კოდექსის“ მიღების რეკომენდაციას იძლევა. პროექტი ასევე ურჩევს ისეთ საარჩევნო სისტემაზე შეთანხმებას, რომელიც ყველა მონაწილე მხარის ნდობას დაიმსახურებს.

რეზოლუციის პროექტი ასევე მოუწოდებს, რომ აღმოიფხვრას ის ხარვეზები, რომლებიც საერთაშორისო დამკვირვებლებმა დააფიქსირეს. პროექტში აღნიშნულია, რომ საჭიროა საარჩევნო ოლქების საზღვრების ხელახლა განსაზღვრა ხმის მიცემის თანასწორუფლებიანობის პრინციპის საფუძველზე და უპარტიო კანდიდატებისთვის უფლების მიცემა მაჟორიტარულ არჩევნებში იყარონ კენჭი; არსებული წესების თანახმად, მხოლოდ პარტიას შეუძლია მაჟორიტარი დეპუტატობის კანდიდატების წარდგენა.

ამავე თემაზე
უახლესი ამბები
28 აპრ.'18 11:10
ვანის და ხონის საარჩევნო ოლქში შუალედური საპარლამენტო არჩევნები მიმდინარეობს
ერთმანდატიან საარჩევნო ოლქში არჩევნებში ხუთი პარტიის და ერთი საინიციატივო ჯგუფის წარმომადგენელები მონაწილეობენ.
27 აპრ.'18 18:49
ქართველი პოლიტიკოსები ბიძინა ივანიშვილის პარტიაში დაბრუნებას აფასებენ
ბიძინა ივანიშვილს ქართული ოცნების თავმჯდომარედ პარტიის ყრილობაზე აირჩევენ, რომელიც უახლოეს პერიოდში შედგება.
27 აპრ.'18 18:09
აშშ-ის სახელმწიფო მდივნის თანაშემწე საქართველოს ესტუმრება
ვეს მიტჩელი ხელისუფლების წარმომადგენლებს შეხვდება და ნატო-საქართველოს სახალხო დიპლომატიის ფორუმზე გამოვა სიტყვით.
26 აპრ.'18 19:07
სტოლტენბერგი: საქართველო ნატოს ‘ძალიან ახლო’ პარტნიორია
ნატოს გენერალური მდივნის თქმით, საგარეო საქმეთა მინისტრების შეხვედრა ქვეყნის პროგრესს აღიარებს.
26 აპრ.'18 16:47
ყოფილი პრემიერ-მინისტრი ბიძინა ივანიშვილი ქართული ოცნების თავმჯდომარე გახდება
პრემიერ კვირიკაშვილის თქმით, ივანიშვილს შესწევს ძალა გააძლიეროს პოლიტიკური პარტია და მას „ახალი დინამიკა“ შესძინოს.
25 აპრ.'18 18:33
ხაჯიმბამ მთავრობის ახალი ხელმძღვანელი დანიშნა
გენადი გაგულიას ორჯერ ეკავა ოკუპირებული რეგიონის პრემიერ-მინისტრის თანამდებობა.
25 აპრ.'18 15:17
საქართველოს რეიტინგი პრესის თავისუფლების ინდექსში გაუმჯობესდა
საქართველოს პოსტ-საბჭოთა ქვეყნებიდან, ბალტიისპირეთის ქვეყნების გარდა, არცერთი ქვეყანა არ უსწრებს.
25 აპრ.'18 14:18
გახარია ლიტვაში საგარეო და შინაგან საქმეთა მინისტრებს შეხვდა
საქართველოს და ლიტვის ოფიციალურმა პირებმა ევროკავშირთან უვიზო რეჟიმზე და სამართალდამცავ სტრუქტურებს შორის თანამშრომლობაზე ისაუბრეს.
24 აპრ.'18 17:29
განსხვავებული რეაქციები საქართველოში სომხეთის პროტესტზე
მმართველი პარტიის დეპუტატმა განაცხადა გუშინ, რომ „მთავარია მშვიდი ვითარება და სტაბილურობა ჩვენს სამეზობლოში“.
24 აპრ.'18 12:42
ცხინვალის ლიდერი იალტის ფორუმს დაესწრო და სირიის, იტალიის და სერბეთის დელეგაციებს შეხვდა
ანატოლი ბიბილოვმა 19-21 აპრილს იალტის საერთაშორისო ეკონომიკურ ფორუმში მიიღო მონაწილეობა.

სივილ ჯორჯიას შესახებ
Civil.Ge © 2001-2018, ახალი ამბები საქართველოდან
რეგისტრაციის ადგილი: დოლიძის ქ. 2, IV სართული.
40