საქართველოს სავაჭრო საკითხებზე "ლეგიტიმური წუხილები“ გააჩნია, რომლებიც რუსეთის ვაჭრობის მსოფლიო ორგანიზაციაში (ვმო) გაწევრიანებაზე მოლაპარაკებების დროს უნდა მოგვარდეს, განაცხადა აშშ-ის სახელმწიფო მდივნის თანაშემწის მოადგილემ ევროპულ და ევრაზიულ საკითხებში, თინა ქეიდენაუმ 27 აპრილს.

"იმედი გვაქვს, რომ შესაძლოა მიღწეულ იქნას შეთანხმება რუსეთის გაწევრიანების პირობებზე. ამერიკის შეერთებული შტატები მხარს უჭერს რუსეთს გაწევრიანებას [ვმო–ში], თუმცა მას ასევე მიაჩნია, რომ საქართველოს ლეგიტიმური  წუხილები გააჩნია სავაჭრო საკითხებზე, რომელთა მოგვარებაცაა საჭირო,“ – განაცხადა მან თბილისში დემოკრატიის საკითხებზე მომუშავე ამერიკულ–ქართული ჯგუფის შეხვედრის შემდეგ.  

საქართველოს საგარეო საქმეთა სამინისტროს ინფორმაციით, საქართველოსა და რუსეთს შორის ვმო–ში გაწევრიანების თაობაზე მოლაპარაკებების მომდევნო რაუნდი ბერნში 28–29 აპრილს გაიმართება.

"ჩვენ ამ მოლაპარაკებებს ძალიან სერიოზულად ვუდგებით,“ – განაცხადა საქართველოს საგარეო საქმეთა მინისტრის მოადგილემ სერგი კაპანაძემ იმავე პრესკონფერენციაზე.

კაპანაძემ, რომელიც ბერნში მარტში გამართულ მოლაპარაკებებზე ქართული დელეგაციის შემადგენლობაში შედიოდა, ხაზი გაუსვა, რომ რუსეთის საგარეო საქმეთა მინისტრის სერგეი ლავროვის განცხადება, რომ რუსეთს ვმო–ში გაწევრიანება საქართველოს თანხმობის გარეშეც შეუძლია, მოლაპარაკებების პროცესს საფრთხეს უქმნის.

"ასეთი ტიპის განცხადებები, რომელიც რუსეთის საგარეო საქმეთა მინისტრმა გააკეთა, ხელს არ უწყობს ამ მოლაპარაკებების წარმატებით დასრულებას და უფრო მეტიც საფრთხის წინაშეც კი აყენებს ამ მოლაპარაკებებს,“ – განაცხადა კაპანაძემ, "იგივე ტიპის განცხადება გააკეთა რუსეთის საგარეო საქმეთა მინისტრმა მოლაპარაკების პირველი რაუნდის შემდეგ... მიგვაჩნია, რომ ეს იყო პროვოკაციული ტიპის განცხადება“.