ვაჭრობის მსოფლიო ორგანიზაციაში (ვმო) რუსეთის გაწევრიანების თაობაზე შვეიცარიის შუამავლობით მიმდინარე ქართულ–რუსული მოლაპარაკებები კონკრეტული წინადადებების განხილვის ფაზაში შევიდა, განაცხადა საქართველოს საგარეო საქმეთა მინისტრის მოადგილემ ნინო კალანდაძემ 2 მაისს.

მისი თქმით, 29 აპრილს ჟენევაში გამართული მოლაპარაკებების ბოლო რაუნდის შედეგი არის ის, რომ "მოლაპარაკება წარმატებით მიმდინარეობს და არ საჭიროებს შეწყვეტას, პირიქით, ის წახალისებული იქნა ორივე მხრიდან“.

“უნდა ითქვას, რომ პოზიტიური ნაბიჯია ის, რომ დაიწყო ძალიან სერიოზული კონკრეტული წინადადებების განხილვა შინაარსობრივ საკითხებზე, რაც, თავისთავად, ფორმალურ საფეხურს გასცდა,“– განაცხადა მან ორშაბათის ბრიფინგზე და იქვე აღნიშნა, რომ დეტალებს ვერ გაამჟღავნებს, "რამდენადაც მხარეებს შორის არსებობს ასეთი შეთანხმება“.

ვმო–ზე მოლაპარაკებათა მომდევნო რაუნდი მაისში, ისევ შვეიცარიაში იგეგმება.