სახალხო კრებისა და ქართული პარტიის ლიდერები სამოქმედო გეგმაზე მოლაპარაკებებს მართავენ და შედეგების შესახებ მოგვიანებით გააკეთებენ განცხადებას.

მოლაპარაკებებს აწარმოებენ დემოკრატიული მოძრაობა–ერთიანი საქართველოს ლიდერი ნინო ბურჯანაძე, სახალხო კრების ერთ–ერთი ლიდერი ნონა გაფრინდაშვილი და ქართული პარტიის ლიდერები სოზარ სუბარი და ლევან გაჩეჩილაძე. ისინი მოლაპარაკებების გასამართად საზოგადოებრივი მაუწყებლის წინ მიმდინარე აქციიდან გაემგზავრნენ.

ქართული პარტია სახალხო კრების მიერ 21 მაისს დაწყებულ საპროტესტო გამოსვლებს დღეს შეუერთდა მას შემდეგ, რაც მომიტინგეებსა და პოლიციას შორის ძალადობის ესკალაციას ჰქონდა ადგილი.

აქციების დაწყებამდე ქართულმა პარტიამ სახალხო კრებას კონსულტაციების გამართვა შესთავაზა, თუმცა "კრების“ ლიდერებმა ეს წინადადება მაშინ არ მიიღეს განაცხადეს რა, რომ ისინი მიესალმებიან ნებისმიერს, ვინც ხალხის პროტესტს შეუერთდება, თუმცა გადაწყვეტილებების მიღების პროცესში მათ ჩართვას არ აპირებენ. 

ქართული პარტიის ლიდერებმა კვირას განაცხადეს, რომ "გადამწყვეტი ბრძოლა“ სააკაშვილის რეჟიმის დასასრულებლად 25 მაისს გაიმართება და ეს უნდა იქცეს "ქართველი ხალხის მრისხანების დღედ“. ქართული პარტიის ერთ–ერთმა ლიდერმა, ირაკლი ოქრუაშვილმა განაცხადა, რომ ის ამ დღეს საქართველოში დაბრუნდება.

სახალხო კრება ამ დრომდე მომდევნო გეგმების შესახებ განცხადებების გაკეთებისაგან თავს იკავებდა, თუმცა მისი განცხადებით, აქამდე კრების აქტივისტები არსებული გეგმის მიხედვით მოქმედებდნენ, რისი ნაწილიც იყო თავისუფლების მოედანზე აქციის დაწყება, ხოლო შემდგომ ამ მიტინგის საზოგადოებრივი მაუწყებლის შენობის წინ გაგრძელება.