აშშ–ის ადმინისტრაციის მაღალი რანგის წარმომადგენლებმა, რომლებიც 3 ოქტომბერს ვაშინგტონში რუსეთის პირველ ვიცე–პრემიერს იგორ შუვალოვს შეხვდნენ, იმედი გამოთქვეს, რომ რუსეთსა და საქართველოს შორის ვმო–ზე მიმდინარე მოლაპარაკებები წარმატებით დასრულდება. 

“ვიცე–პრეზიდენტმა დაადასტურა აშშ–ის მხარდაჭერა რუსეთის ვმო–ში გაწევრიანების მიმართ და პრემიერ–მინისტრის მოადგილე შუვალოვი გაწევრიანების პროცესში რუსეთის მიერ მიღწეული მნიშვნელოვანი პროგრესის გამო შეაქო“, – იტყობინება თეთრი სახლი 3 ოქტომბერს ვიცე–პრეზიდენტ ჯო ბაიდენსა და შუვალოვს შორის გამართული შეხვედრის შემდეგ. 

“ამ თვალსაზრისით, ვიცე–პრეზიდენტმა მხარი დაუჭირა რუსეთსა და საქართველოს შორის ვმო–ში რუსეთის გაწევრიანების თაობაზე მიმდინარე მოლაპარაკებების წარმატებით დასრულებას“, – აცხადებს თეთრი სახლი. 

აშშ–ის წარმომადგენელმა ვაჭრობის საკითხებში რონ კერკმა, რომელიც ასევე შეხვდა შუვალოვს, იმედი გამოთქვა, რომ "დარჩენილი საკითხები, მათ შორის რუსეთსა და საქართველოს შორის ორმხრივი დისკუსიების, დადებითად მოგვარდება, კონსტრუქციულად გადაწყდება და საშუალებას მისცემს რუსეთს მიაღწიოს თავის მიზანს და წლის ბოლომდე დაასრულოს ვმო–ზე მოლაპარაკებები", – განაცხადა რონ კერკის ოფისმა.   

შვეიცარიის შუამავლობით მიმდინარე მოლაპარაკებების მორიგი რაუნდი 7–8 ოქტომბერს გაიმართება. 

„სამწუხაროდ, წინასწარი მონაცემებით, ჩვენ არ ველით რაიმე რადიკალურ ცვლილებებს რუსეთის ხისტი პოზიციის მიმართებით და არ არის მოსალოდნელი, რომ რუსეთმა ჩვენთვის უმნიშვნელოვანეს საკითხებზე  მოქნილობა გამოიჩინოს“, – განაცხადა საქართველოს საგარეო საქმეთა მინისტრის მოადგილემ დავით ჯალაღანიამ 3 ოქტომბერს ბრიფინგზე. 

"თუ ეს [შეთანხმება] ვერ შედგა, ჩვენ იძულებული ვიქნებით, რომ  ვერ შევუწყოთ ხელი მარტივად რომ ვთქვათ,  რუსეთის გაწევრიანების საკითხის გადაჭრას ამ რაუნდზე და უკეთეს შემთხვევაში, ალბათ მოსალოდნელია, რომ დიალოგმა გადაინაცვლოს მომავალ წელს“, – აღნიშნა მან.

თბილისი დაჟინებით მოითხოვს საქონელბრუნვაზე ინფორმაციის წინასწარ გაცვლისა და საერთაშორისო მონიტორინგის მექანიზმის დაწესებას, რათა გამჭირვალე გახდეს ვაჭრობა სეპარატისტული რეგიონების  – აფხაზეთისა და სამხრეთ ოსეთის გასწვრივ რუსეთთან არსებულ საზღვარზე.