საქართველოში ევროკავშირის წარმომადგენლობის ხელმძღვანელი ფილიპ დიმიტროვი თბილისსა და მოსკოვს ვაჭრობის მსოფლიო ორგანიზაციასთან (ვმო) დაკავშირებით მოუწოდებს, რომ „უახლოესი დღეების განმავლობაში დაასრულონ შეთანხმების მიღწევის პროცესი“.

“კმაყოფილებას გამოვთქვამთ იმასთან დაკავშირებით, რომ რუსეთი და საქართველო ახლოს არიან შეთანხმების მიღწევასთან, რაც, ჩვენი აზრით, ძალზე სასარგებლო იქნება ორივე მხარისათვის“, – განაცხადა ფილიფ დიმიტროვმა 28 ოქტომბერს გავრცელებულ განცხადებაში, "ვუცხადებთ სრულ მხარდაჭერას შვეიცარიის შუამდგომლობით მიმდინარე  ძალისხმევას, რომლის წყალობით საკითხის დადებითად გადაჭრის შესაძლებლობა გაჩნდა“.

"ევროკავშირი მოელის, რომ რუსეთის ვაჭრობის მსოფლიო  ორგანიზაციაში (ვმო) გაწევრიანების შესახებ გადაწყვეტილება წელს, ვმო–ს მინისტერიალზე იქნება მიღებული“, – ნათქვამია განცხადებაში.
 
თბილისმა 27 ოქტომბერს განაცხადა, რომ დათანხმდა შვეიცარიელი შუამავლების მიერ რუსეთის ვმო–ში გაწევრიანების თაობაზე წარმოდგენილ კომპრომისულ წინადადებაზე, რომელზეც რუსეთს თავისი პოზიცია ჯერ არ გამოუხატავს.

ამ წინადადების ზუსტი დეტალები ჯერ-ჯერობით უცნობია.

საქართველოს დელეგაციის წარმომადგენლის და საგარეო საქმეთა მინისტრის მოადგილის სერგი კაპანაძის განცხადებით, ეს კომპრომისული წინადადება კვლავ გულისხმობს ორ მთავარ კომპონენტს, რომლებიც საქართველოს მნიშვნელოვნად მიაჩნია სადავო საზღვრებზე გამჭირვალე ვაჭრობის უზრუნველყოფისთვის – ეს არის საერთაშორისო მონიტორინგი და მონაცემთა ელექტრონული გაცვლა.

მისი თქმით, წინადადების თანახმად, საერთაშორისო დამკვირვებლები „სავაჭრო დერეფნების თავში და ბოლოში განთავსდებიან და მონიტორინგს გაუწევენ რა შედის და რა გამოდის ამ დერეფნებში.” ეს სავაჭრო დერეფნები თავიანთი გეოგრაფიული კოორდინატების მიხედვით განისაზღვრება და არა სახელებით, რათა შენარჩუნდეს სტატუსის მიმართ ნეიტრალური მიდგომა.

საქართველოს ეროვნული უშიშროების საბჭოს მდივანმა გიგა ბოკერიამ “New York Times”–ს განუცხადა, რომ კომპრომისული წინადადება გულისხმობს, რომ კერძო კომპანია განათავსებენ დამკვირვებლებს საზღვრის რუსულ და ქართულ მხარეს, თუმცა არა სეპარატისტული რეგიონების შიგნით, ტვირთების მონიტორინგის მიზნით. ბოკერიას თქმით, კონტრაქტორ ფირმებს დაიქირავებს ნეიტრალური მესამე მხარე, როგორიც შეიძლება იყოს მაგალითად შვეიცარია ან ევროკავშირი.

თავდაპირველად, საქართველოს სურდა, რომ მისი მებაჟეები რუსეთთან საზღვრის აფხაზურ და სამხრეთ ოსურ მონაკვეთებზე განთავსებულიყვნენ; შემდეგ უკვე თბილისი საერთაშორისო დამკვირვებლების დაშვებას ითხოვდა.