ბოლშევიკური წითელი არმიის აღლუმი თბილისში, 1921 წლის თებერვალი. ქართველი ბოლშევიკი სერგო ორჯონიკიძე 91 წლის წინ წითელ არმიას საქართველოში შემოუძღვა. ფოტო: Photomuseum.org.ge  

საქართველოს სამთავრობო შენობებზე დროშები ნახევრად დაუშვეს 25 თებერვლის აღსანიშნავად – დღის, როდესაც ბოლშევიკურმა რუსულმა არმიამ 1921 წელს თბილისის ოკუპაცია განახორციელა.

წელს უკვე მეორედ აღინიშნება ოფიციალურად საბჭოთა ოკუპაციის დღე საქართველოში მას შემდეგ, რაც პარლამენტმა 2010 წელს ერთხმად მიიღო რეზოლუცია, რომლითაც მთავრობას ყოველ 25 თებერვალს სხვადასხვა მემორიალური ღონისძიებების ორგანიზება დაავალა კომუნისტური საოკუპაციო  რეჟიმის პოლიტიკური რეპრესიების ასიათასობით მსხვერპლის მოსახსენიებლად. 

წელს მთავრობამ ერთკვირიანი კამპანია წამოიწყო, რომლის ფარგლებშიც გაიმართა ღონისძიებები,  რომლებიც 91 წლის წინანდელი მოვლენების შესახებ სკოლის მოსწავლეებში ცოდნის გაღრმავებას ისახავდა მიზნად. წითელი არმიის შემოჭრას სპეციალური გაკვეთილები და ლექციები მიეძღვნა.

მთავრობის ინიციატივით ასევე განხორციელდა „წითელი ყაყაჩოს“ აქცია, რომლის ფარგლებშიც მოსწავლეები წითელ ყაყაჩოს იბნევენ და ამით პატივს მიაგებენ ოკუპანტებთან ბრძოლაში დაღუპულ გმირებს. ოფიციალური პირები და დეპუტატები, ასევე საქართველოს ნაციონალური ტელევიზიების წამყვანებიც ატარებენ ყაყაჩოს სამკერდე ნიშნებს მიმდინარე კვირის განმავლობაში.

დღესვე მოგვიანებით დაგეგმილია პრეზიდენტ სააკაშვილის გამოსვლა საბჭოთა ოკუპაციის დღესთან დაკავშირებით, იტყობინება მისი პრესსამსახური.