Civil.ge-ს შესახებ
Eng | ქარ | Рус
ბოლო განახლება: 11:10 - 28 აპრ.'18
RSS
Mobile
Twitter
Facebook
ივანიშვილის მოძრაობა, მისი შემომწირველი და კომპანია 600 000 ლარით დაჯარიმდა
სივილ ჯორჯია, თბილისი / 27 თებ.'12 / 18:00

მილიარდერი ოპოზიციონერის ბიძინა ივანიშვილის საზოგადოებრივი მოძრაობა „ქართული ოცნება“, მისი დონორი კერძო პირი და ამ შემომწირველის დამსაქმებელი კომპანია, თითოეული, 200 000 ლარით დაჯარიმდნენ იმ შემოწირულობის გამო, რომელიც კონტროლის პალატის შეფასებით, უკანონო იყო, რადგან პოლიტიკური პარტიების დაფინანსების შესახებ რეგულაციების მიერ დაწესებული შეზღუდვების გვერდის ავლას ისახავდა მიზნად.

20 თებერვალს კონტროლის პალატის პოლიტიკური პარტიების ფინანსური მონიტორინგის სამსახურმა განაცხადა, რომ ივანიშვილის ქართუ ჯგუფში შემავალი კომპანიის, „ქართუ მშენებელის“ თანამშრომელმა თავისი დამსაქმებლისგან  40 000 ლარის ოდენობით „უჩვეულოდ მაღალი პრემია“ მიიღო, რომლის ნახევარიც მან მალევე „ქართულ ოცნებას“ გადაურიცხა შემოწირულობის სახით.

„ქართული ოცნება“ ფორმალურად არ არის პოლიტიკური პარტია, თუმცა მონიტორინგის სფეროში მოექცა, როგორც კონტროლის პალატა ამბობს, „გაცხადებული პოლიტიკური მიზნების“ გამო.

კონტროლის პალატამ განაცხადა, რომ „ქართუ მშენებელის“ თანამშრომლის მიერ „ქართულ ოცნებაში“ გადარიცხული შემოწირულობა იურიდიული პირის მიერ ფიზიკური პირის გამოყენებით განხორციელებული უკანონო შემოწირულობის მაგალითია. ახალი რეგულაციები კრძალავს იურიდიული პირების მიერ პარტიებისა და იმ პირების დაფინანსებას, რომლებიც „პირდაპირ ან არაპირდაპირ“ კავშირში არიან პოლიტიკურ პარტიებთან. ამ რეგულაციებით, მაქსიმუმ 60 ათასი ლარის შემოწირულობის გაღების უფლება აქვთ მხოლოდ ფიზიკურ პირებს.  

20 თებერვალს კონტროლის პალატამ „ქართულ ოცნებას“ იმ 20 000 ლარის უკან დაბრუნება მოსთხოვა, რომელიც „უკანონო სქემით“ იქნა მიღებული კომპანიაში მომუშავე კერძო პირისგან. წინააღმდეგ შემთხვევაში, სანქციების გამოყენების შესახებ გააფრთხილა, რომელთა შორის იყო 20 000 ლარის კონფისკაცია და საეჭვო შემოწირულობის ათმაგი ოდენობით დაჯარიმება.  

„ქართულმა ოცნებამ“, რომელსაც იანვრის ბოლოს, კონტროლის პალატის თქმით, თვალთმაქცური გარიგების გზით მიღებული 1.1 მილიონი ლარის დაბრუნება მოუწია, ამჯერად განაცხადა, რომ ის არ აპირებდა კონტროლის პალატის „უკანონო მოწოდება“ შეესრულებინა. „ქართულმა ოცნებამ“ განაცხადა, რომ ეს შემოწირულობა კანონის შესაბამისად იქნა მიღებული და კონტროლის პალატა კერძო კომპანიის და მისი თანამშრომლის საქმეში უკანონოდ ჩარევაში დაადანაშაულა.

27 თებერვალს კონტროლის პალატამ განაცხადა, რომ მან „უკანონო შემოწირულობაში“ მონაწილე სამივე სუბიექტის დაჯარიმება გადაწყვიტა – „ქართუ მშენებელის“, მისი თანამშრომლის და „ქართული ოცნების“ – თითოეულის 200 000 ლარის ოდენობით. ეს თანხა სადავო შემოწირულობის ათმაგი ოდენობაა. ამასთან ერთად, თავად 20 000 ლარის შემოწირულობა სახელმწიფო ბიუჯეტში მიიმართება.

კონტროლის პალატამ ასევე განაცხადა, რომ საქმის შესწავლის შემდეგ მან აღმოაჩინა, რომ „ქართუ მშენებელის“ თანამშრომელს, რომელმაც „ქართულ ოცნებას“ 20 000 ლარი გადაურიცხა, თვეში 1 000 ლარი აქვს ხელფასი და მანამდე, „რამდენიმე წლიანი მუშაობის განმავლობაში“ ფულადი პრემია დამსაქმებლისგან არასდროს მიუღია. 40 000 ლარის ოდენობის პრემია მისთვის პირველი და  „სრულიად შეუსაბამოა მის მიერ შესრულებული სამუშაოს მოცულობასთან და ხელფასის ოდენობასთან“, განაცხადა კონტროლის პალატამ.

„ჩვენი ინფორმაციით, ამგვარი კანონსაწინააღმდეგო და მსგავსი სქემების გამოყენებით ხორციელდება სხვადასხვა სუბიექტების პოლიტიკური საქმიანობის დაფინანსება“, – განაცხადა კონტროლის პალატამ 27 თებერვალს, „ამიტომ მივმართავთ ფიზიკურ პირებს, რომლებიც შესაძლოა გამოყენებულ იქნან მსგავსი უკანონო სქემების განსახორციელებლად, თავი შეიკავონ ამ ქმედებებისაგან. წინააღმდეგ შემთხვევაში, მათზე გავრცელდება კანონით გათვალისწინებული სანქციები“.

ამავე თემაზე
უახლესი ამბები
28 აპრ.'18 11:10
ვანის და ხონის საარჩევნო ოლქში შუალედური საპარლამენტო არჩევნები მიმდინარეობს
ერთმანდატიან საარჩევნო ოლქში არჩევნებში ხუთი პარტიის და ერთი საინიციატივო ჯგუფის წარმომადგენელები მონაწილეობენ.
27 აპრ.'18 18:49
ქართველი პოლიტიკოსები ბიძინა ივანიშვილის პარტიაში დაბრუნებას აფასებენ
ბიძინა ივანიშვილს ქართული ოცნების თავმჯდომარედ პარტიის ყრილობაზე აირჩევენ, რომელიც უახლოეს პერიოდში შედგება.
27 აპრ.'18 18:09
აშშ-ის სახელმწიფო მდივნის თანაშემწე საქართველოს ესტუმრება
ვეს მიტჩელი ხელისუფლების წარმომადგენლებს შეხვდება და ნატო-საქართველოს სახალხო დიპლომატიის ფორუმზე გამოვა სიტყვით.
26 აპრ.'18 19:07
სტოლტენბერგი: საქართველო ნატოს ‘ძალიან ახლო’ პარტნიორია
ნატოს გენერალური მდივნის თქმით, საგარეო საქმეთა მინისტრების შეხვედრა ქვეყნის პროგრესს აღიარებს.
26 აპრ.'18 16:47
ყოფილი პრემიერ-მინისტრი ბიძინა ივანიშვილი ქართული ოცნების თავმჯდომარე გახდება
პრემიერ კვირიკაშვილის თქმით, ივანიშვილს შესწევს ძალა გააძლიეროს პოლიტიკური პარტია და მას „ახალი დინამიკა“ შესძინოს.
25 აპრ.'18 18:33
ხაჯიმბამ მთავრობის ახალი ხელმძღვანელი დანიშნა
გენადი გაგულიას ორჯერ ეკავა ოკუპირებული რეგიონის პრემიერ-მინისტრის თანამდებობა.
25 აპრ.'18 15:17
საქართველოს რეიტინგი პრესის თავისუფლების ინდექსში გაუმჯობესდა
საქართველოს პოსტ-საბჭოთა ქვეყნებიდან, ბალტიისპირეთის ქვეყნების გარდა, არცერთი ქვეყანა არ უსწრებს.
25 აპრ.'18 14:18
გახარია ლიტვაში საგარეო და შინაგან საქმეთა მინისტრებს შეხვდა
საქართველოს და ლიტვის ოფიციალურმა პირებმა ევროკავშირთან უვიზო რეჟიმზე და სამართალდამცავ სტრუქტურებს შორის თანამშრომლობაზე ისაუბრეს.
24 აპრ.'18 17:29
განსხვავებული რეაქციები საქართველოში სომხეთის პროტესტზე
მმართველი პარტიის დეპუტატმა განაცხადა გუშინ, რომ „მთავარია მშვიდი ვითარება და სტაბილურობა ჩვენს სამეზობლოში“.
24 აპრ.'18 12:42
ცხინვალის ლიდერი იალტის ფორუმს დაესწრო და სირიის, იტალიის და სერბეთის დელეგაციებს შეხვდა
ანატოლი ბიბილოვმა 19-21 აპრილს იალტის საერთაშორისო ეკონომიკურ ფორუმში მიიღო მონაწილეობა.

სივილ ჯორჯიას შესახებ
Civil.Ge © 2001-2018, ახალი ამბები საქართველოდან
რეგისტრაციის ადგილი: დოლიძის ქ. 2, IV სართული.
58