პრეზიდენტმა სააკაშვილმა განაცხადა, რომ საქართველო არტილერიას და "სამხედრო საფრენ აპარატებს" აწარმოებს.

“ხვალ ვცდით ქართულ არტილერიას", – განაცხადა მან 2 მარტს თავის რეზიდენციაში სტუდენტებთან შეხვედრის დროს, "ვინ წარმოიდგენდა, რომ საქართველო როდესმე თვითონ ააწყობდა არტილერიას. ვეხვეწებოდით ვიღაცეებს, რომ მოგვეცით, რიგში ვიდექით, ხან დაგვადებდნენ ემბარგოს ხან არა, ისრაელთან ვიყავით მუდმივად, რომ ‘აი თქვენი არტილერია’ –  ზუსტად უკეთესი ავაწყვეთ, ვიდრე ისრაელმა, ახლა გაიგებენ და დაინტერესდებიან;  უკეთესი ავაწყვეთ. არ ყოფილა ისეთი უმაღლესი მათემატიკა და ხვალ გამოვცდი პოლიგონზე". 

"საჰაერო საფრენ აპარატებს“ ასევე უახლოეს დღეებში „ნახავთ და  გამოვცდით“, განაცხადა მან დეტალების დაკონკრეტების გარეშე. დეპუტატმა მმართველი პარტიიდან გივი თარგამაძემ თებერვლის დასაწყისში განაცხადა, რომ საქართველო უპილოტო საფრენი აპარატის წარმოებაზე მუშაობს.

“ამას წინათ ჩვენ გამოვცადეთ ჩვენი მუხლუხოიანი საბრძოლო მანქანა „ლაზიკა“ და მაშინვე დაიწყეს მსჯელობა, ‘ეს ის არ არის’, ‘ამერიკული ჯობია’, ‘ინგლისური ჯობია’. არ გიკვირთ? პირი არ გავაღეთ რომ საერთოდ შევქმენით? ვის წარმოედგინა, რომ საქართველოს შეუძლია ჯავშნიანი მუხლუხოიანი მანქანის  შექმნა ქართული სქემებით, ქართული ინჟინრებით?“ – განაცხადა სააკაშვილმა.

“არავინ არ დაგვხმარებია საერთოდ, არავის არ ქონდა ინტერესი, რომ დაგვხმარებოდა", – განაგრძო მან, "ეს იყო ის პერიოდი, როცა ყველამ თითქმის გადაგვიკეტა იარაღი იმიტომ, რომ ყველას შეეშინდა, რომ საქართველო მაინც ქრებოდა მსოფლიო რუკიდან 2008 წელს. მერე ეს ყველაფერი მოიხსნა".

"და ჩვენ ხელები კი არ ჩამოვუშვით. დასხდნენ ჩვენი ინჟინრები და შექმნეს ეს სისტემა ნულიდან", – დასძინა მან და იქვე ანალოგია მოიყვანა სინგაპურთან, რომელმაც ასევე "სამხედრო ემბარგოს" პირობებში "ნულიდან" შექმნა თავისი სამხედრო მრეწველობა.