რუსეთი მზადაა გააუქმოს საქართველოსთან სავიზო რეჟიმი იმ პირობით, თუ თბილისი უარს იტყვის ოკუპირებული ტერიტორიების შესახებ კანონზე, განაცხადა რუსეთის საგარეო საქმეთა მინისტრმა სერგეი ლავროვმა 14 მარტს სახელმწიფო სათათბიროში გამოსვლისას.

„როცა სააკაშვილმა გამოაცხადა იმის შესახებ, რომ რუსეთის ყველა მოქალაქეს შეეძლება საქართველოში უვიზოდ შესვლა, მას დაავიწყდა ეთქვა, რომ საქართველოში მოქმედებს კანონი „ოკუპირებული ტერიტორიების“ შესახებ, რომლის თანახმადაც ნებისმიერი, ვინც ოდესღაც ბოლო პერიოდში ომის შემდეგ, რომელიც სააკაშვილმა დაიწყო, სტუმრობდა სამხრეთ ოსეთს ან აფხაზეთს, საქართველოში სისხლის სამართლებრივ დევნას ექვემდებარება, 2–დან 4 წლამდე პატიმრობა ემუქრება ასეთ ადამიანს“, – იტყობინება „რია ნოვოსტი“ ლავროვის სიტყვებზე დაყრდნობით.

მისი თქმით, ამ კანონით რუსეთის ორი მოქალაქე უკვე დაზარალდა ციხეში მოხვედრით.

“ამიტომ ჩვენ საპასუხოდ ვუთხარით, რომ მზად ვართ ორმხრივ საფუძველზე შემოვიღოთ უვიზო რეჟიმი, მაგრამ ჯერ ეს კანონი იქნას გაუქმებული. წინააღმდეგ შემთხვევაში ჩვენს მოქალაქეებს უნდა ესმოდეთ სად მიდიან ისინი და რა ემუქრებათ იქ“, – განაცხადა ლავროვმა.

აღნიშნული პოზიცია პირველად რუსეთის საგარეო უწყებამ 2 მარტს გამოთქვა მას შემდეგ, რაც თბილისმა რუსეთის მოქალაქეებისთვის უვიზო რეჟიმი ცალმხრივად შემოიღო.

მოსკოვმა ასევე გამოხატა დიპლომატიური ურთიერთობების აღდგენის სურვილი, რაზეც ლავროვმა განაცხადა, რომ ეს იყო „რეაქცია სააკაშვილის უვიზო [რეჟიმის შემოღებაზე გაკეთებულ] განცხადებაზე“.