Civil.ge-ს შესახებ
Eng | ქარ | Рус
ბოლო განახლება: 11:10 - 28 აპრ.'18
RSS
Mobile
Twitter
Facebook
ლავროვი საქართველოს ნატოში ინტეგრაციის შესახებ
სივილ ჯორჯია, თბილისი / 19 აპრ.'12 / 19:33


რუსეთის საგარეო საქმეთა მინისტრი სერგეი ლავროვი ბრიუსელში 19აპრილს ნატო–რუსეთის საბჭოს სხდომამდე ნატოს გენერალურ მდივანს ანდერს ფოგ რასმუსენს ხვდება. ფოტო: ნატო 

ნატოს მიერ საქართველოს „ასპირანტ“ ქვეყნად მოხსენიება, ასევე საქართველოს „რემილიტარიზაცია“ მოსკოვის „შეშფოთებას“, „სინანულს“ და „სიფრთხილეს“ იწვევს, განაცხადა რუსეთის საგარეო საქმეთა მინისტრმა სერგეი ლავროვმა 19 აპრილს.

ბრიუსელში ნატო–რუსეთის საბჭოს შეხვედრის შემდეგ გამართულ პრესკონფერენციაზე საუბრისას ლავროვმა განაცხადა, რომ 2008 წლის ნატოს ბუქარესტის სამიტის გადაწყვეტილებამ, რომ საქართველო გახდებოდა ალიანსის წევრი, წააქეზა პრეზიდენტი სააკაშვილი იმავე წლის აგვისტოში „ცხინვალზე თავდასხმა განეხორციელებინა“.

მან ეს განცხადება მას შემდეგ გააკეთა, რაც ქართველმა ჟურნალისტმა სთხოვა კომენტარი ნატოს გენერალური მდივნის ანდერს ფოგ რასმუსენის მიერ ნატო–რუსეთის საბჭოს სხდომის შემდეგ გაკეთებულ განცხადებაზე, რომ ალიანსს კვლავ აქვს „პრინციპული უთანხმოებები“ რუსეთთან საქართველოსთან დაკავშირებით.

„მე ვფიქრობ, მან ეს იმიტომ გააკეთა, რომ ყველას გაეგო, რომ ნატოს წევრები კვლავაც უჭერენ მხარს საქართველოს ხელმძღვანელობას“, – განაცხადა ლავროვმა, „ეს ჩვენში სინანულს იწვევს“.

„ჩვენი პოზიცია კარგადაა ცნობილი. დღესაც ვუთხარი ამის შესახებ კოლეგებს. ის, რაც 2008 წლის აგვისტოში მოხდა, ერთი საათის მანძილზე არ მწიფდებოდა. 2008 წლის დასაწყისიდანვე ჩვენ ე.წ. „საქართველოს მეგობართა ჯგუფის“ სხვა წევრებთან ერთად ვცდილობდით შეგვემუშავებინა დოკუმენტი ძალის გამოუყენებლობის შესახებ, რომელსაც კონფლიქტის ყველა მხარე მოაწერდა ხელს. საქართველო ამის გაკეთების კატეგორიული წინააღმდეგი იყო. მე [აშშ–ის მაშინდელ სახელმწიფო მდივანს] კონდოლიზა რაისსაც ვესაუბრე რამდენჯერმე. და მან მითხრა, რომ მას ვერაფერს უხერხებს, და საერთოდ, განაცხადა, რომ ეს არ არის მნიშვნელოვანი, ვინაიდან თუ ის ძალას გამოიყენებს, შეუძლია საერთოდ დაივიწყოს დასავლეთთან, ჩვენთან თანამშრომლობის შესახებ. იმავე პერიოდში ბუქარესტში მიღებული იქნა გადაწყვეტილება, რომ საქართველო შევა ნატოში. ვფიქრობ, ამან ძლიერ იმოქმედა მიხეილ სააკაშვილის ფსიქიკაზე, რომელმაც ალბათ ირწმუნა საკუთარი დაუსჯელობა. და მას შემდეგ, რაც ის თავს დაესხა ცხინვალს და რუს სამშვიდობოებს, ჩვენ, რა თქმა უნდა, ვუპასუხეთ“, – განაცხადა ლავროვმა.

„ის ფაქტი, რომ ახლა ჩვენი პარტნიორები ნატოდან თავიანთ შიდა დოკუმენტებში საქართველოს ე.წ. ასპირანტ ქვეყნებს შორის მოიხსენიებენ, ჩვენში შეშფოთებას და, გულწრფელად რომ ვთქვათ, სიფრთხილეს იწვევს, რადგანაც 2008 წლის აგვისტოს ომის შემდეგ საქართველოს რემილიტარიზაციის პროცესი ძალიან სწრაფად მიდის“, – განაცხადა მან.

საქართველო "ასპირანტ" ქვეყნად პირველად ნატოს საგარეო საქმეთა მინისტრებმა 2011 წლის 7 დეკემბრის ერთობლივ განცხადებაში მოიხსენიეს, რასაც რუსეთის პროტესტი მოჰყვა. მაშინ ლავროვმა განაცხადა, რომ „გულწრფელად გააფრთხილა“ თავისი კოლეგები ალიანსიდან, რომ ამგვარმა განცხადებებმა, შესაძლოა, პრეზიდენტი სააკაშვილი „2008 წლის აგვისტოს მსგავსი ავანტიურისკენ“ წააქეზოს.  

ლავროვმა ასევე აღნიშნა, რომ წლის დასაწყისში ვაშინგტონში ვიზიტის შემდეგ პრეზიდენტმა სააკაშვილმა განაცხადა, რომ მან მიაღწია სამხედრო მიწოდებების სრულ აღდგენას და პირობას, რომ საქართველო აუცილებლად გახდებოდა ნატოს წევრი.

„თუმცა, საერთო ჯამში, როგორც მე მესმის, ეს მომხდარის მისეული ინტერპრეტაციაა, მას უყვარს ინტერპრეტირება, მაგრამ ჩვენში ეს ყველაფერი შეშფოთებას იწვევს, რადგანაც ჩვენ არ გვინდა კიდევ ერთი დესტაბილიზაცია სამხრეთ კავკასიაში ამ კაცის კიდევ ერთი ავანტიურის გამო“, – განაცხადა რუსეთის საგარეო საქმეთა მინისტრმა.

„მე შევახსენე ჩვენს კოლეგებს, რომ ჩვენი სამშვიდობოების პოზიციებს ბომბავდნენ, ჩვენ მოქალაქეებს კლავდნენ, იმ კაცის სახელით და ბრძანებით კლავდნენ, რომელსაც დაპირდნენ ბუქარესტის სამიტზე, რომ ნატოში მიიღებდნენ, იმ იარაღით კლავდნენ, რომელიც საქართველოს ალიანსში შემავალმა ბევრმა ქვეყანამ მიაწოდა და ის სამხედროები კლავდნენ, რომელთაც ნატოს ზოგიერთი წევრი სახელმწიფოს ინსტრუქტორები წვრთნიდნენ“, – განაცხადა ლავროვმა და დასძინა, რომ „ეთიკური თვალსაზრისით“ ეს „მკრეხელობაა“.

საქართველოს საგარეო საქმეთა მინისტრმა გრიგოლ ვაშაძემ ლავროვის განცხადების საპასუხოდ განაცხადა, რომ მოსკოვს "აღიზიანებს" არა მხოლოდ "მომავალი აუცილებელი გაწევრიანება ნატოში", არამედ თავად "საქართველოს არსებობა, როგორც დამოუკიდებელი, თავისუფალი, ტერიტორიულად მთლიანი და სუვერენული ქვეყნის". 

"პოლიტიკურ ელიტას კრემლში ორი არჩევანი აქვთ: ან მიეჩვიონ იმას, რომ საქართველოს აქვს უფლება და ამ უფლებას გამოიყენებს, რომ გაწევრიანდეს იქ, სადაც საქართველოს მოქალაქეებს ეს სურთ; ან მოსკოვს მოუწევს ამის ყურება და უსიამოვნოდ წუხილი, როგორც თვითონ თქვა [ლავროვმა] კბილების ღრჭიალით,  ამასთან შეგუება", – განუცხადა ვაშაძემ ბრიუსელში ქართულ მედიას.  

მისი თქმით, რუსეთი „ძირს უთხრის უსაფრთხოებასა და სტაბილურობას სამხრეთ კავკასიაში“ სეპარატისტული აფხაზეთისა და სამხრეთ ოსეთის ოკუპაციით და ამ ტერიტორიებზე სამხედრო ყოფნის გაძლიერებით, მათ შორის 5 ათასზე მეტი სამხედრო მოსამსახურის, "ტოჩკა–უ"–ს ტიპის ოპერატიულ–ტაქტიკური სარაკეტო კომპლექსის, ზალპური ცეცხლის სისტემების „ურაგანის“ და „სმერჩის“, ასევე საზენიტო-სარაკეტო კომპლექსის ს-300 განლაგებით. მან ასევე ხაზი გაუსვა ჩრდილოეთ კავკასიაში და სომხეთში, გიუმრის სამხედრო ბაზაზე რუსეთის სამხედრო პოტენციალს.

„ეს არის დაგეგმილი სამხედრო წვრთნები „კავკასია–2012“, რომლითაც შეშფოთებულია არა მარტო საქართველო, არამედ რეგიონის აბსოლუტურად ყველა ქვეყანა და რომლის მთავარი მიზანი და რომლის განხორციელების მთავარი მიზეზი არის ერთი დარტყმით წაართვას დამოუკიდებლობა, სუვერენიტეტი სამხრეთ კავკასიის სამივე სახელმწიფოს“, – განაცხადა გრიგოლ ვაშაძემ.  

ამავე თემაზე
უახლესი ამბები
28 აპრ.'18 11:10
ვანის და ხონის საარჩევნო ოლქში შუალედური საპარლამენტო არჩევნები მიმდინარეობს
ერთმანდატიან საარჩევნო ოლქში არჩევნებში ხუთი პარტიის და ერთი საინიციატივო ჯგუფის წარმომადგენელები მონაწილეობენ.
27 აპრ.'18 18:49
ქართველი პოლიტიკოსები ბიძინა ივანიშვილის პარტიაში დაბრუნებას აფასებენ
ბიძინა ივანიშვილს ქართული ოცნების თავმჯდომარედ პარტიის ყრილობაზე აირჩევენ, რომელიც უახლოეს პერიოდში შედგება.
27 აპრ.'18 18:09
აშშ-ის სახელმწიფო მდივნის თანაშემწე საქართველოს ესტუმრება
ვეს მიტჩელი ხელისუფლების წარმომადგენლებს შეხვდება და ნატო-საქართველოს სახალხო დიპლომატიის ფორუმზე გამოვა სიტყვით.
26 აპრ.'18 19:07
სტოლტენბერგი: საქართველო ნატოს ‘ძალიან ახლო’ პარტნიორია
ნატოს გენერალური მდივნის თქმით, საგარეო საქმეთა მინისტრების შეხვედრა ქვეყნის პროგრესს აღიარებს.
26 აპრ.'18 16:47
ყოფილი პრემიერ-მინისტრი ბიძინა ივანიშვილი ქართული ოცნების თავმჯდომარე გახდება
პრემიერ კვირიკაშვილის თქმით, ივანიშვილს შესწევს ძალა გააძლიეროს პოლიტიკური პარტია და მას „ახალი დინამიკა“ შესძინოს.
25 აპრ.'18 18:33
ხაჯიმბამ მთავრობის ახალი ხელმძღვანელი დანიშნა
გენადი გაგულიას ორჯერ ეკავა ოკუპირებული რეგიონის პრემიერ-მინისტრის თანამდებობა.
25 აპრ.'18 15:17
საქართველოს რეიტინგი პრესის თავისუფლების ინდექსში გაუმჯობესდა
საქართველოს პოსტ-საბჭოთა ქვეყნებიდან, ბალტიისპირეთის ქვეყნების გარდა, არცერთი ქვეყანა არ უსწრებს.
25 აპრ.'18 14:18
გახარია ლიტვაში საგარეო და შინაგან საქმეთა მინისტრებს შეხვდა
საქართველოს და ლიტვის ოფიციალურმა პირებმა ევროკავშირთან უვიზო რეჟიმზე და სამართალდამცავ სტრუქტურებს შორის თანამშრომლობაზე ისაუბრეს.
24 აპრ.'18 17:29
განსხვავებული რეაქციები საქართველოში სომხეთის პროტესტზე
მმართველი პარტიის დეპუტატმა განაცხადა გუშინ, რომ „მთავარია მშვიდი ვითარება და სტაბილურობა ჩვენს სამეზობლოში“.
24 აპრ.'18 12:42
ცხინვალის ლიდერი იალტის ფორუმს დაესწრო და სირიის, იტალიის და სერბეთის დელეგაციებს შეხვდა
ანატოლი ბიბილოვმა 19-21 აპრილს იალტის საერთაშორისო ეკონომიკურ ფორუმში მიიღო მონაწილეობა.

სივილ ჯორჯიას შესახებ
Civil.Ge © 2001-2018, ახალი ამბები საქართველოდან
რეგისტრაციის ადგილი: დოლიძის ქ. 2, IV სართული.
49