ეუთოს საპარლამენტო ასამბლეამ 9 ივლისს საქართველოს შესახებ რეზოლუცია მიიღო, რომელიც ხაზს უსვამს საქართველოს ტერიტორიულ მთლიანობას და სეპარატისტულ აფხაზეთს და სამხრეთ ოსეთს „ოკუპირებულ ტერიტორიებად“ მოიხსენიებს.

რეზოლუცია, რომელსაც საქართველოს ოფიციალური პირები მიესალმნენ იმის გამო, რომ მასში აფხაზეთი და სამხრეთ ოსეთის „ოკუპირებულ ტერიტორიებად“ არის მოხსენიებული, ეუთოს საპარლამენტო ასამბლეის ყოველწლიურ სხდომაზე მონაკოში 5–9 ივლისს პოლონელმა დეპუტატმა მიხალ შჩერბამ წარადგინა, ხოლო მისი თანაავტორი 36 პარლამენტარი იყო ცხრა ქვეყნიდან.

რეზოლუცია მოუწოდებს „რუსეთის ფედერაციის მთავრობას და პარლამენტს, ასევე აფხაზეთის, საქართველო, და სამხრეთ ოსეთის, საქართველო, დე ფაქტო ხელისუფლებებს, ევროკავშირის სადამკვირვებლო მისიას ოკუპირებულ ტერიტორიებზე დაუბრკოლებლად შესვლის საშუალება მისცენ“.

მასში ასევე ნათქვამია, რომ ეუთოს საპარლამენტო ასამბლეა „შეშფოთებულია დევნილთა ჰუმანიტარული მდგომარეობის გამო როგორც საქართველოში, ისე აფხაზეთის, საქართველო, და სამხრეთ ოსეთის, საქართველო, ოკუპირებულ ტერიტორიებზე, ასევე იმის გამო, მათ თავიანთ საცხოვრებელ ადგილებში დაბრუნების უფლება აქვთ წართმეული“.

რეზოლუცია მიესალმება საქართველოში „პოლიტიკური ცხოვრების შემდგომ დემოკრატიზაციას“ და მოუწოდებს ხელისუფლებას „უზრუნველყოს 2012 წლის ოქტომბერში მომავალი საპარლამენტო არჩევნების და 2013 წლის საპრეზიდენტო არჩევნების ეუთოს ვალდებულებების და რეკომენდაციების შესაბამისად ორგანიზება, განსაკუთრებით საარჩევნო პროცესის ყველა მონაწილესთვის თანაბარი პირობების და მედიის თავისუფალი და დამოუკიდებელი ფუნქციონირების თვალსაზრისით“.

რეზოლუცია ასევე მოუწოდებს ეუთოს წევრ სახელმწიფოებს აღადგინონ ეუთოს მისია საქართველოში, რომელიც 2009 წლის ივნისში დაიხურა 2008 წლის აგვისტოს ომის შემდეგ მანდატის გაგრძელებაზე შეუთანხმებლობის გამო.

ასამბლეა ეუთოს საპარლამენტო ფორმატია, რომელშიც 320 დეპუტატია წარმოდგენილი ორგანიზაციის 56 წევრი სახელმწიფოდან, მათ შორის რუსეთიდან.