Civil.ge-ს შესახებ
Eng | ქარ | Рус
ბოლო განახლება: 11:10 - 28 აპრ.'18
RSS
Mobile
Twitter
Facebook
სააკაშვილის და ივანიშვილის განცხადებები პირისპირ შეხვედრის შემდეგ
სივილ ჯორჯია, თბილისი / 9 ოქტ.'12 / 13:02


პრეზიდენტი სააკაშვილი და "ქართული ოცნების" ლიდერი ბიძინა ივანიშვილი პრეზიდენტის სასახლეში პირისპირ შეხვედრის შემდეგ განცხადებებს აკეთებენ; უკან ჩანან მათი მთავარი მოკავშირეები, რომლებიც მხარეებს წარმოადგენენ ხელისუფლების გადაბარების თაობაზე მიმდინარე მოლაპარაკებებში, 9 ოქტომბერი. ფოტო: გურამ მურადოვი/Civil.ge

პრეზიდენტმა სააკაშვილმა და კოალიცია „ქართული ოცნების“ პრემიერ–მინისტრობის კანდიდატმა ბიძინა ივანიშვილმა პრეზიდენტის სასახლეში 9 ოქტომბერს გამართული, დაახლოებით, 35–წუთიანი შეხვედრის შემდეგ, რომელიც პირისპირ ფორმატში შედგა, მოკლე საჯარო განცხადებები გააკეთეს.

ორივე მათგანმა სასახლის ეზოში გაკეთებულ განცხადებებში აღნიშნა იმ პროცესის „ისტორიული“ მნიშვნელობა, რომელიც 1 ოქტომბრის საპარლამენტო არჩევნების შემდეგ დადგა ქვეყანაში. 


პრეზიდენტი სააკაშვილი და გამარჯვებული კოალიციის პრემიერ–მინისტრობის კანდიდატი ბიძინა ივანიშვილი შეხვედრის დაწყების წინ ერთმანეთს ხელს ართმევენ, 9 ოქტომბერი. ფოტო: გურამ მურადოვი/Civil.ge

ბიძინა ივანიშვილმა, რომელმაც პირველმა გააკეთა განცხადება, აღნიშნა:

„მოგესალმებით. ჩვენი დღევანდელი შეხვედრა გახლდა გაგრძელება იმ ჯანსაღი პოლიტიკისა, რომელიც მე და ჩემმა გუნდმა შემოვიტანეთ საქართველოს პოლიტიკურ სივრცეში. 

ის, რომ მე და ჩემმა გუნდმა მოვახერხეთ და შევქმენით პრეცედენტი საქართველოში პირველად დემოკრატიული გზით ხელისუფლების შეცვლისა – ეს საქართველოს ისტორიაში აუცილებლად მოიხსენიება.

ის, რომ ჩვენ მოვახერხეთ მთელი წლის განმავლობაში ყველა უღირსო ქცევას ჩვენი ოპონენტების მხრიდან ღირსეულად ვპასუხობდით, სწორედ ეს გახლავთ დღევანდელი შეხვედრის მიზეზიც და გაგრძელება მისი.

ჩვენ ჩვენს ოპონენტებს, ვაცხადებდით და ვაცხადებთ დღესაც, მოვექცევით არა ისე, როგორც იმსახურებენ, არამედ როგორც იმსახურებს ჩვენი ქვეყანა, ჩვენი ქართველი ხალხი, ჩვენი საქართველოს მოსახლეობა, ჩვენი კულტურა. აი, ეს გახლდათ დღევანდელი ჩვენი შეხვედრის მიზეზიც.

ჩვენ საუბარი გვქონდა საგარეო პოლიტიკაზე, გვქონდა შეხედულებებზე და ასე შემდეგ. იქ თანხვედრაში მოდის ის საგარეო პოლიტიკა, რაც ჩვენ ორივე მხარეს გაცხადებული გვქონდა, რომ ევროპა და ევროატლანტიკური სივრცე, რომ აუცილებლად ჩვენი სტრატეგიაა, გაგრძელება იქნება წინა ხელისუფლების, ჩვენი სწრაფვა იქნება განუხრელად ევროპისაკენ და აუცილებლად საქართველო მოახერხებს უახლოეს დროში გახდეს ნატოს წევრი ქვეყანა.

აი, დაახლოებით, ასეთი ტიპის საუბარი გვქონდა. კარგია, რომ ჩვენ მოვახერხეთ შეხვედრა. მოახერხა თვითონ სააკაშვილმა ის განცხადება, რაც მე შევუქე, რომელიც მან გააკეთა არჩევნების პროცესში და არჩევნების ბოლოს.

ჩვენი დღევანდელი შეხვედრაც ემსახურება იმას, რომ ვაჩვენოთ, რომ ჩვენ ვართ კულტურული ერი, ჩვენ ვიწყებთ ახალ ცხოვრებას და ჩვენ ჩვენს ოპონენტებს ყოველთვის ღირსეულად მოვექცევით. დიდი მადლობა“.
 

"ქართული ოცნების" ლიდერი ბიძინა ივანიშვილი პრეზიდენტის სასახლეში მისი გუნდის ლიდერებთან ერთად მივიდა, სადაც მას ასეთივე ფორმატში დახვდა პრეზიდენტი სააკაშვილი. მარცხნიდან მარჯვნივ ერთმანეთს ხელს ართმევენ: მოქმედი პარლამენტის იურიდიული კომიტეტის თავმჯდომარე პავლე კუბლაშვილი და ბიძინა ივანიშვილი; თბილისის მერი გიგი უგულავა და თავდაცვის მინისტრობის კანდიდატი ირაკლი ალასანია; ეროვნული უშიშროების საბჭოს მდივანი გიგა ბოკერია და პარლამენტის თავმჯდომარეობის კანდიდატი დავით უსუფაშვილი; მოქმედი პარლამენტის თავმჯდომარე დავით ბაქრაძე და შინაგან საქმეთა მინისტრობის კანდიდატი ირაკლი ღარიბაშვილი; პრეზიდენტი სააკაშვილი და სასჯელაღსრულების მინისტრობის კანდიდატი სოზარ სუბარი. ფოტო: გურამ მურადოვი/Civil.ge

პრეზიდენტმა სააკაშვილმა განაცხადა:

„მე მინდა ყველას გითხრათ, რომ დღეს არის ისტორიული პროცესი. პირველად ამ რეგიონის, პოსტსაბჭოთა სივრცის ამ ნაწილში ხდება აღმასრულებელი ხელისუფლების უმეტესი ფუნქციების მშვიდობიანად, დემოკრატიულ ფარგლებში გადაცემა.

ქართველმა ხალხმა გააკეთა თავის არჩევანი. ჩვენ ყოველთვის ვამბობდით და ვიტყვით მომავალში, რომ ქართველი ხალხის არჩევანს ჩვენ ვცემთ პატივს. ქართველი ხალხი არის ის უზენაესი მოქმედი პირი ქვეყანაში, რომელიც განსაზღვრავს პოლიტიკურ პროცესს.

ჩვენ ვისაუბრეთ და რა თქმა უნდა, არავისთვის არ არის მოულოდნელი, რომ  ჩვენ შორის რჩება ფუნდამენტური განსხვავებები ძალიან ბევრ პოლიტიკურ საკითხზე, ძალიან ბევრ ეროვნულ საკითხზე.

მაგრამ, ჩვენ როგორც პასუხისმგებლობის მქონე ხელისუფლება, მე, როგორც პრეზიდენტი, რომელიც არის კონსტიტუციის გარანტი, ვუზრუნველყოფ, რომ გადასვლა მთავრობის ფუნქციებს შორის მოხდეს ყოველგვარი ექსცესების გარეშე; მოხდეს ისე, როგორც არასდროს არ მომხდარა საქართველოს ისტორიაში; მოხდეს ქართველი ხალხის ინტერესების სრული გათვალისწინებით; მოხდეს პოლიტიკური პროცესების დემოკრატიულ ჩარჩოებში შენარჩუნების სრული ინტერესებიდან გამომდინარე.

ჩვენ უნდა შევინარჩუნოთ დემოკრატია, მივაღწიოთ იმას, რომ თავისუფალი არჩევნები საქართველოში მომავალშიც გაგრძელდეს, რომ დემოკრატია საქართველოში პირიქით გაძლიერდეს და საშუალება იქნას ყოველთვის მისი განვითარების და ქართველ ხალხს შეექმნას უკეთესი პერსპექტივები.

მე, როგორც პრეზიდენტი და ჩვენ ყველანი ვიზრუნებთ იმაზე, რომ ქართველი ხალხის ინტერესები იქნას დაცული. ეს იყო ყოველთვის, რაც მამოძრავებდა, ეს იქნება ჩემი მამოძრავებელი ძალა მომავალ თვეებში, მომავალ წლებში, მომავალ ჩემს და ყველა ჩემი თანამებრძოლის მოღვაწეობაში.

ამიტომ, მე ვფიქრობ, ის რაც მოხდა, ამას ქართველი ხალხი ყველა თავისებურად შეაფასებს. ყველაფერს უნდა დრო, რომ ბევრი რამე დაინახო და გაანალიზო.

მაგრამ ახლა ყველანი უნდა ვიყოთ კონცენტრირებული მომავალზე, ყველანი უნდა ვიყოთ კონცენტრირებული ჩვენი ხალხის კეთილდღეობაზე. 

მიუხედავად ფუნდამენტური განსხვავებებისა და აზრთა სხვადასხვაობისა პრაქტიკულად უმეტეს საკითხებში, ჩვენ მოვახერხეთ და ვახერხებთ ამ პროცესის სამართლებრივად, კონსტიტუციურად სწორ ჩარჩოებში წარმართვას.

მე მგონი, ეს არის მთავარი, რასაც ყველამ დღეს ხაზი უნდა გავუსვათ. ამიტომ, მინდა ჩვენ ხალხს ვისურვო წარმატება. დარწმუნებული ვარ, რომ საქართველოს ექნება ძალიან მაგარი მომავალი და ჩვენც ვაპირებთ ამ მომავლის მნიშვნელოვანი ნაწილი ვიყოთ, როგორც ამ ქვეყნის მოქალაქეები და როგორც პოლიტიკოსები“. 

უახლესი ამბები
28 აპრ.'18 11:10
ვანის და ხონის საარჩევნო ოლქში შუალედური საპარლამენტო არჩევნები მიმდინარეობს
ერთმანდატიან საარჩევნო ოლქში არჩევნებში ხუთი პარტიის და ერთი საინიციატივო ჯგუფის წარმომადგენელები მონაწილეობენ.
27 აპრ.'18 18:49
ქართველი პოლიტიკოსები ბიძინა ივანიშვილის პარტიაში დაბრუნებას აფასებენ
ბიძინა ივანიშვილს ქართული ოცნების თავმჯდომარედ პარტიის ყრილობაზე აირჩევენ, რომელიც უახლოეს პერიოდში შედგება.
27 აპრ.'18 18:09
აშშ-ის სახელმწიფო მდივნის თანაშემწე საქართველოს ესტუმრება
ვეს მიტჩელი ხელისუფლების წარმომადგენლებს შეხვდება და ნატო-საქართველოს სახალხო დიპლომატიის ფორუმზე გამოვა სიტყვით.
26 აპრ.'18 19:07
სტოლტენბერგი: საქართველო ნატოს ‘ძალიან ახლო’ პარტნიორია
ნატოს გენერალური მდივნის თქმით, საგარეო საქმეთა მინისტრების შეხვედრა ქვეყნის პროგრესს აღიარებს.
26 აპრ.'18 16:47
ყოფილი პრემიერ-მინისტრი ბიძინა ივანიშვილი ქართული ოცნების თავმჯდომარე გახდება
პრემიერ კვირიკაშვილის თქმით, ივანიშვილს შესწევს ძალა გააძლიეროს პოლიტიკური პარტია და მას „ახალი დინამიკა“ შესძინოს.
25 აპრ.'18 18:33
ხაჯიმბამ მთავრობის ახალი ხელმძღვანელი დანიშნა
გენადი გაგულიას ორჯერ ეკავა ოკუპირებული რეგიონის პრემიერ-მინისტრის თანამდებობა.
25 აპრ.'18 15:17
საქართველოს რეიტინგი პრესის თავისუფლების ინდექსში გაუმჯობესდა
საქართველოს პოსტ-საბჭოთა ქვეყნებიდან, ბალტიისპირეთის ქვეყნების გარდა, არცერთი ქვეყანა არ უსწრებს.
25 აპრ.'18 14:18
გახარია ლიტვაში საგარეო და შინაგან საქმეთა მინისტრებს შეხვდა
საქართველოს და ლიტვის ოფიციალურმა პირებმა ევროკავშირთან უვიზო რეჟიმზე და სამართალდამცავ სტრუქტურებს შორის თანამშრომლობაზე ისაუბრეს.
24 აპრ.'18 17:29
განსხვავებული რეაქციები საქართველოში სომხეთის პროტესტზე
მმართველი პარტიის დეპუტატმა განაცხადა გუშინ, რომ „მთავარია მშვიდი ვითარება და სტაბილურობა ჩვენს სამეზობლოში“.
24 აპრ.'18 12:42
ცხინვალის ლიდერი იალტის ფორუმს დაესწრო და სირიის, იტალიის და სერბეთის დელეგაციებს შეხვდა
ანატოლი ბიბილოვმა 19-21 აპრილს იალტის საერთაშორისო ეკონომიკურ ფორუმში მიიღო მონაწილეობა.

სივილ ჯორჯიას შესახებ
Civil.Ge © 2001-2018, ახალი ამბები საქართველოდან
რეგისტრაციის ადგილი: დოლიძის ქ. 2, IV სართული.
48