• ‘რუსეთს არ შეუძლია გააუქმოს აფხაზეთის და სამხრეთ ოსეთის აღიარება’;
• ‘სააკაშვილმა სიტუაცია ჩიხში შეიყვანა’;
• ‘არ ვიცი, როგორ გამოვიდეთ ამ ჩიხიდან’;
• ‘რუსეთმა უპასუხა საქართველოს ახალი მთავრობის პოზიტიურ სიგნალებს'. 
   

რუსეთის პრეზიდენტმა ვლადიმერ პუტინმა განაცხადა, რომ „ზომიერი პოზიტიური სიგნალები“ მოდის საქართველოს ახალი მთავრობიდან, თუმცა ხაზი გაუსვა, რომ მოსკოვი და თბილისი ჩიხში არიან შესული აფხაზეთის და სამხრეთ ოსეთის საკითხთან დაკავშირებით და მან არ იცის, როგორ გამოვიდნენ  ამ ვითარებიდან.

ეს განცხადება პუტინმა 20 დეკემბერს პირდაპირ ეთერში მიმდინარე პრესკონფერენციაზე  მას შემდეგ გააკეთა, რაც ქართულ–რუსული ურთიერთობების შესახებ ჰკითხეს.

„ჩვენ ვხედავთ პოზიტიურ სიგნალებს, ჯერჯერობით ძალიან ზომიერს, მაგრამ მაინც პოზიციურ სიგნალებს საქართველოს ახალი ხელმძღვანელობიდან. ის, რომ დაინიშნა საქართველოს მთავრობის სპეციალური წარმომადგენელი რუსეთთან ურთიერთობების დარეგულირების საკითხებში, ამას არა მხოლოდ ვხედავთ, არამედ მივესალმებით“, – განაცხადა პურინმა და დასძინა, რომ მოსკოვმა საპასუხო ნაბიჯი გადადგა და საგარეო საქმეთა მინისტრის მოადგილეს გრიგორი კარასინს საქართველოს პრემიერ–მინისტრის სპეციალურ წარმომადგენელთან ზურაბ აბაშიძესთან მოლაპარაკებების გამართვა დაავალა; ორი დიპლომატის შეხვედრა 14 დეკემბერს შვეიცარიაში გაიმართა.

„მაგრამ მინდა ყურადღება მივაქციო პრობლემას, რომელიც კარგადაა ცნობილი. ის იმაში გამოიხატება, რომ მოქმედმა პრეზიდენტმა, ბატონმა სააკაშვილმა სიტუაცია ჩიხში შეიყვანა. გულწრფელად რომ ვთქვა, არც თუ ისე კარგად მესმის, როგორ გამოვიდეთ აქედან“, – განაცხადა მან.

„რუსეთს არ შეუძლია გააუქმოს თავისი გადაწყვეტილება აფხაზეთის და სამხრეთ ოსეთის დამოუკიდებლობის აღიარებასთან დაკავშირებით. ჩვენ ამის გაკეთება პრინციპში არ შეგვიძლია. და საქართველოს არ შეუძლია დათანხმდეს მათი დამოუკიდებელი სტატუსის აღიარებას. ვერ წარმომიდგენია, რისი გაკეთება შეიძლება აქ“.

„ჩვენ რეალურად გვინდა საქართველოსთან ურთიერთობების ნორმალიზება; თუმცა ეკონომიკის თვალსაზრისით, პირდაპირ უნდა ითქვას, რომ საქართველო უფროა ამაში დაინტერესებული, ვიდრე რუსეთი. მიგვაჩნია, რომ ორ ძალიან ახლო ხალხებს შორის ურთიერთობების ნორმალიზებაა საჭირო; ამისკენ აუცილებლად უნდა ვისწრაფვოდეთ“, – დასძინა მან.