თბილისის საქალაქო სასამართლომ ზურაბ ადეიშვილს, იუსტიციის ყოფილ მინისტრს შაბათს საღამოს დაუსწრებლად შეუფარდა წინასწარი პატიმრობა პროკურატურის შუამდგომლობის საფუძველზე.

მთავარმა პროკურატურამ მას ბრალი დეკემბერის ბოლოს წაუყენა პატიმართა მიმართ 2012 წლის სექტემბერში „დამამცირებელი და არაადამიანური მოპყრობის“ ორგანიზებასა და პროვოცირებაში, სამსახურეობრივი უფლებამოსილების ბოროტად გამოყენებასა და სისხლის სამართლის საქმეზე მტკიცებულებების ფალსიფიცირებაში.  

ამასთან, სასამართლომ დააკმაყოფილა პროკურატურის შუამდგომლობა ზურაბ ადეიშვილის სახელზე გაცემული საქართველოს მოქალაქის პასპორტისა და სამი დიპლომატიური პასპორტის მოქმედების შეჩერების თაობაზე.

ზურაბ ადეიშვილმა, რომელიც სააკაშვილის მთავრობაში ერთ-ერთი ყველაზე გავლენიანი მინისტრი იყო, საქართველო არჩევნების მეორე დღეს, 2 ოქტომბერს დატოვა და როგორც პროკურატურა აცხადებს, სამართალდამცავებისთვის მისი ადგილსამყოფელი უცნობია.

რამდენიმე დღით ადრე, ვიდრე ადეიშვილს ბრალს წაუყენებდნენ, ყოფილმა პრემიერ-მინისტრმა და ნაციონალური მოძრაობის გენერალურმა მდივანმა ვანო მერაბიშვილმა გაზეთ „კვირის პალიტრასთვის“ მიცემულ ინტერვიუში განაცხადა, რომ მისთვის ცნობილია სად იმყოფება ადეიშვილი და კავშირი აქვს მასთან.  „არ გამოვრიცხავ, დაბრუნდეს და მისცეს ჩვენება“, - განაცხადა მერაბიშვილმა 24 დეკემბერს გამოქვეყნებულ ინტერვიუში.