საქართველოს მთავრობის მხრიდან „გაუნელებელი ინტერესი“ არსებობს ამერიკის შეერთებულ შტატებთან ძლიერი ურთიერთობების მიმართ, ისევე როგორც სურვილი ევრო–ატლანტიკური ინტეგრაციის გაგრძელების მიმართ, ნათქვამია აშშ–ს საელჩოს მიერ 21 ივნისს გავრცელებულ განცხადებაში.

განცხადება აშშ-ის საელჩომ იმ სტატიის საპასუხოდ გამოაქვეყნა, რომელიც Wall Street Journal–ში 20 ივნისს დაიბეჭდა, სათაურით „სანქციებით შევიწროებულები, ირანელები საქართველოში დიდ ინვესტიციებს დებენ“. სტატია, რომელიც ბოლო დროს ირანელების მხრიდან საქართველოში ბიზნეს საქმიანობისადმი ინტერესის ზრდაზე მოგვითხობს, მოცემულია რამოდენიმე დეტალური ინფორმაცია ეროვნებით ირანელი სამი პირის მიერ განხორციელებული ინვესტიციების შესახებ, მათ შორის კერძო ავიაკომპანია FlyGeorgia–სა და სს „ინვესტბანკში“.

სტატიის თანახმად, ირანის მხრიდან საქართველოში მზარდმა ბიზნეს საქმიანობამ “ობამას ადმინისტრაცია შეაკრთო, რადგან საქართველოსა და აშშ-ს შორის ღრმა  ურთიერთობები არსებობს... მაგრამ ირანთან მიმართებით, საქართველო, რომელმაც ცოტა ხნის წინ ისეთი პრემიერ–მინისტრი აირჩია, რომელსაც ნაკლებად პროამერიკული პოზიცია უკავია, ვიდრე ბატონ სააკაშვილს, ცდილობს [აშშ-გან] დამოუკიდებელი პოლიტიკა ქონდეს.“

როგორც ჩანს სტატიის ამ ნაწილთან მიმართებით, აშშ-ის საელჩო აღნიშნავს თავის განცხადებაში: „ამ სტატიაში მოცემული გარკვეული განცხადების საპირისპიროდ, ჩვენ ვხედავთ, რომ ამერიკის შეერთებულ შტატებთან ძლიერი ურთიერთობების მიმართ საქართველოს მთავრობის ინტერესი არ განელებულა, ისევე როგორც საქართველოს ევრო–ატლანტიკური ინტეგრაციის უწყვეტი ძლიერი სურვილი.“
 
„აშშ–ის წუხილები ირანის მიერ სანქციებისთვის თავის არიდებასთან  დაკავშირებით ბოლო წლებში გაიზარდა და [ეს შეშფოთება] სათავეს იღებს ჯერ კიდევ იმ დროიდან, სანამ საქართველოს ამჟამინდელი მთავრობა მოვიდოდა ხელისუფლებაში“, – განაცხადა აშშ–ის საელჩომ თბილისში. 

მან ასევე განაცხადა, რომ აშშ–ის მთავრობა განსაკუთრებულ ყურადღებას უთმობს, რომ ხელი შეუშალოს ირანის მიერ სანქციებისთვის თავის არიდების ნებისმიერ მცდელობას, რომელთა შორის შასაძლოა ასევე იყოს ირანის მიერ საქართველოში ბიზნეს კავშირების გამოყენება.

„ჩვენ საქართველოსთან მჭიდროდ ვმუშაობთ ამ საკითხზე“, – განაცხადა საელჩომ.

2012 წლის დეკემბერში საქართველოს აშშ–ის სახელმწიფო ხაზინის მაღალი რანგის პირი სტუმრობდა, რომელმაც საქართველოს ხელისუფლების წარმომადგენლებთან ირანის მიმართ დაწესებული სანქციების შესრულების საკითხი განიხილა.

საქართველოსა და ირანს შორის 2011 წლის იანვრიდან უვიზო მიმოსვლა მოქმედებს.