პრემიერ-მინისტრმა ბიძინა ივანიშვილმა განაცხადა, რომ შესაძლოა ამჟამინდელ მინისტრთა კაბინეტის შემადგენლობაში მაქსიმუმ ორი მინისტრი შეიძლება შეიცვალოს მას შემდეგ, რაც ის დატოვებს პრემიერ-მინისტრის პოსტს.
„ერთი შეიძლება იყოს ცვლილება, ერთი ორი მაქსიმუმ - მეტ ცვლილებას მე ვერ ვხედავ“, - განუცხადა ივანიშვილმა პოლიტოლოგებს და ექსპერტებს მის რეზიდენციაში მიმდინარე შეხვედრაზე, რომელიც პირდაპირ ეთერში გადაიცემა.
„სუსტი არ იქნება ის მთავრობა, რომელსაც დავტოვებ პრემიერის მეთაურობით, გარწმუნებთ“, - განაცხადა მან.
შემდეგ მან შეაქო მოქმედი მინისტრები, როგორც „კარგი“ და „ძალიან კარგი“.
„შემიძლია ეს როდესაც წავალ მთავრობიდან პირდაპირ ვთქვა, ვის ვგულისხმობ, რომ არის ძალიან კარგი და ვის ვგულისხმობ, რომ არის კარგი“, - განაცხადა მან.
თუმცა მან ასევე აღნიშნა, რომ „არის ეჭვები ერთი ორ“ მინისტრზე, მაგრამ „სწორდებიან ჩემი აზრით“ და მათ „ალბათ“ არასდროს არ დაასახელებს, „თუ თვითონ გასწორდებიან“.
მისი თქმით, პოლიტიკიდან საზოგადოებრივ სექტორში მისი გადასვლის შემდეგ საქართველოს ეყოლება „ძალიან კარგი მინისტრები და ძალიან კარგი პრემიერ-მინისტრი“.
მან ასევე განაცხადა, რომ პოლიტიკიდან წასვლის შემდეგ ის მთავრობაზე "გავლენას“ მოახდენს „აქტიური მოქალაქის პოზიციიდან“ საჯაროდ და „არა იატაკქვეშეთიდან, არა ზურგს უკან“.