Civil.ge-ს შესახებ
Eng | ქარ | Рус
ბოლო განახლება: 11:10 - 28 აპრ.'18
RSS
Mobile
Twitter
Facebook
მერაბიშვილი წინასწარ პატიმრობაში რჩება
სივილ ჯორჯია, თბილისი / 27 სექ.'13 / 12:02

ქუთაისის საქალაქო სასამართლომ 25 სექტემბერს არ დააკმაყოფილა ადვოკატების შუამდგომლობა ყოფილი პრემიერ–მინისტრის და ყოფილი შინაგან საქმეთა მინისტრის ვანო მერაბიშვილის წინასწარი პატიმრობიდან გათავისუფლების თაობაზე.

მოსამართლემ ასევე არ დააკმაყოფილა შუამდგომლობა სისხლის სამართლის პროცესის შეწყვეტასთან დაკავშირებით და საქმის არსებით განხილვაზე გადავიდა, რომელიც 7 ოქტომბერს დაიწყება.   

საქმეზე, რომელიც შარშან წინასაარჩევნო პერიოდში დაწყებული უმუშევართა აღრიცხვის პროგრამის ფარგლებში 5.24 მლნ ლარის საბიუჯეტო სახსრების, სავარაუდო, არამიზნობრივ ხარჯვას უკავშირდება ნაციონალური მოძრაობის სასარგებლოდ, მერაბიშვილთან ერთად ასევე აქვს ბრალი წაყენებული ყოფილ ჯანდაცვის მინისტრს და ამჟამად კახეთის გუბერნატორს ზურაბ ჭიაბერაშვილს. იმ დროს მერაბიშვილი პრემიერ–მინისტრი, ხოლო ჭიაბერაშვილი ჯანდაცვის მინისტრი იყო. ორივე მათგანი უარყოფს ბრალდებებს და მათ პოლიტიკურად მოტივირებულს უწოდებს.

მერაბიშვილისგან განსხვავებით, რომელსაც ქუთაისის სასამართლომ 22 მაისს წინასწარი პატიმრობა შეუფარდა, ჭიაბერაშვილი არ იმყოფება პატიმრობაში, რადგანაც ის 23 მაისს 20 000 ლარიანი გირაოს გადახდის სანაცვლოდ გაათავისუფლეს. ადვოკატები ჭიაბერაშვილისთვის გირაოს მოხსნას ითხოვდნენ, თუმცა მათი სხვა შუამდგომლობების მსგავსად, მოსამართლემ ეს შუამდგომლობაც არ დააკმაყოფილა 25 სექტემბერს.

მერაბიშვილის ადვოკატმა გიორგი ჩივიაშვილმა განუცხადა მოსამართლეს წინასწარი პატიმრობიდან გათავისუფლების შესახებ შუამდგომლობის წარდგენისას, რომ არც პრაქტიკული და არც თეორიული შესაძლებლობა არ არსებობს იმისა, რომ მერაბიშვილი მტკიცებულებებს გაანადგურებს, რადგანაც სისხლის სამართლის საპროცესო კოდექსის თანახმად, გამოძიება ვეღარ შეძლებს დამატებითი მტკიცებულებების შეგროვებას, ხოლო ყველა ხელმისაწვდომი მტკიცებულება უკვე წარედგინა სასამართლოს. 
ბრალდების მხარე აცხადებდა, რომ გათავისუფლების შემთხვევაში, მერაბიშვილი ზეწოლას მოახდენდა იმ მოწმეებზე, რომლებიც დასაკითხად უნდა დაიბარონ, როდესაც 2013 წლის 7 ოქტომბერს საქმის არსებითი განხილვა დაიწყება.    

ვიდრე მოსამართლე შუამდგომლობის უარყოფაზე თავის გადაწყვეტილებას გამოცხადებდა, მერაბიშვილმა უთხრა მას, რომ არ ჰქონდა მოლოდინი იმისა, რომ მოსამართლე მისი წინასწარი პატიმრობიდან გათავისუფლების სასარგებლოდ მიიღებდა გადაწყვეტილებას იმ „ზეწოლის“ გამო, რომელიც ქუთაისის საქალაქო სასამართლოზე ხორციელდება.

წინასწარი სასამართლო მოსმენის დროს, რომლის დროსაც სამი სხდომა გაიმართა, ბრალდების მხარემ 4000–მდე მოწმის სია წარმოადგინა, რომელთა მოწვევაც პროკურატურას სურს სასამართლო მოსმენების დროს. დაცვის მხარე აცხადებს, რომ მოწმეების ასეთი დიდი რაოდენობა ემსახურება ერთადერთ მიზანს, რომ პროცესი გაჭიანურდეს და მერაბიშვილმა წინასწარ პატიმრობაში გაატაროს კანონით გათვალისწინებული სრული ცხრა თვე, რომელიც 2014 წლის თებერვალს იწურება.

მერაბიშვილს ასევე აქვს წაყენებული ბრალი სახელმწიფო სახსრების მითვისება-გაფლანგვისთვის ცალკე საქმეზე, რომელიც ეხება კვარიათში ფეშენებელური აგარაკის „მესაკუთრის ნების საწინააღმდეგოდ, იძულებით და დაშინებით“ დაკავებას და საიდუმლო სახელმწიფო ხარჯებიდან მისი რემონტისთვის 158 ათასი ლარის დახარჯვას 2009 წელს, როცა მერაბიშვილი შინაგან საქმეთა მინისტრი იყო.
 
ასევე სანდრო გირგვლიანის მკვლელობის საქმესთან დაკავშირებით დამატებითი ბრალდებები, რომელიც სამსახურებრივი უფლებამოსილების გადამეტებას ეხება, მერაბიშვილს ივნისში წაუყენეს; პროკურატურა მერაბიშვილს, რომელიც 2006 წელს გირგვლიანის მკვლელობის დროს შინაგან საქმეთა მინისტრი იყო, მტკიცებულებების დამალვაში ადანაშაულებს, რათა მკვლელობის საქმეზე სიმართლის დადგენისთვის შეეშალა ხელი.

მას ასევე ბრალად ედება სამსახურებრივი უფლებამოსილების გადამეტება დამამძიმებელი გარემოებებით თბილისის ცენტრში 2011 წლის 26 მაისს საპროტესტო აქციის დაშლასთან დაკავშირებით. 
   

ამავე თემაზე
უახლესი ამბები
28 აპრ.'18 11:10
ვანის და ხონის საარჩევნო ოლქში შუალედური საპარლამენტო არჩევნები მიმდინარეობს
ერთმანდატიან საარჩევნო ოლქში არჩევნებში ხუთი პარტიის და ერთი საინიციატივო ჯგუფის წარმომადგენელები მონაწილეობენ.
27 აპრ.'18 18:49
ქართველი პოლიტიკოსები ბიძინა ივანიშვილის პარტიაში დაბრუნებას აფასებენ
ბიძინა ივანიშვილს ქართული ოცნების თავმჯდომარედ პარტიის ყრილობაზე აირჩევენ, რომელიც უახლოეს პერიოდში შედგება.
27 აპრ.'18 18:09
აშშ-ის სახელმწიფო მდივნის თანაშემწე საქართველოს ესტუმრება
ვეს მიტჩელი ხელისუფლების წარმომადგენლებს შეხვდება და ნატო-საქართველოს სახალხო დიპლომატიის ფორუმზე გამოვა სიტყვით.
26 აპრ.'18 19:07
სტოლტენბერგი: საქართველო ნატოს ‘ძალიან ახლო’ პარტნიორია
ნატოს გენერალური მდივნის თქმით, საგარეო საქმეთა მინისტრების შეხვედრა ქვეყნის პროგრესს აღიარებს.
26 აპრ.'18 16:47
ყოფილი პრემიერ-მინისტრი ბიძინა ივანიშვილი ქართული ოცნების თავმჯდომარე გახდება
პრემიერ კვირიკაშვილის თქმით, ივანიშვილს შესწევს ძალა გააძლიეროს პოლიტიკური პარტია და მას „ახალი დინამიკა“ შესძინოს.
25 აპრ.'18 18:33
ხაჯიმბამ მთავრობის ახალი ხელმძღვანელი დანიშნა
გენადი გაგულიას ორჯერ ეკავა ოკუპირებული რეგიონის პრემიერ-მინისტრის თანამდებობა.
25 აპრ.'18 15:17
საქართველოს რეიტინგი პრესის თავისუფლების ინდექსში გაუმჯობესდა
საქართველოს პოსტ-საბჭოთა ქვეყნებიდან, ბალტიისპირეთის ქვეყნების გარდა, არცერთი ქვეყანა არ უსწრებს.
25 აპრ.'18 14:18
გახარია ლიტვაში საგარეო და შინაგან საქმეთა მინისტრებს შეხვდა
საქართველოს და ლიტვის ოფიციალურმა პირებმა ევროკავშირთან უვიზო რეჟიმზე და სამართალდამცავ სტრუქტურებს შორის თანამშრომლობაზე ისაუბრეს.
24 აპრ.'18 17:29
განსხვავებული რეაქციები საქართველოში სომხეთის პროტესტზე
მმართველი პარტიის დეპუტატმა განაცხადა გუშინ, რომ „მთავარია მშვიდი ვითარება და სტაბილურობა ჩვენს სამეზობლოში“.
24 აპრ.'18 12:42
ცხინვალის ლიდერი იალტის ფორუმს დაესწრო და სირიის, იტალიის და სერბეთის დელეგაციებს შეხვდა
ანატოლი ბიბილოვმა 19-21 აპრილს იალტის საერთაშორისო ეკონომიკურ ფორუმში მიიღო მონაწილეობა.

სივილ ჯორჯიას შესახებ
Civil.Ge © 2001-2018, ახალი ამბები საქართველოდან
რეგისტრაციის ადგილი: დოლიძის ქ. 2, IV სართული.
61