20 მლნ ლარი სჭირდება იმ გეგმების რეალიზებას, რომელიც სეპარატისტული რეგიონების ადმინისტრაციული საზღვარზე მდებარე სოფლების დასახმარებლად დაისახა, განაცხადა რეგიონული განვითარებისა და ინფრასტრუქტურის მინისტრმა დავით ნარმანიამ.

ნარმანია რეინტეგრაციის საკითხებში სახელმწიფო მინისტრთან პაატა ზაქარეიშვილთან ერთად თანათავმჯდომარეობს იმ დროებით სამთავრობო კომისიას, რომელიც ოქტომბრის დასაწყისში გამყოფ ხაზებთან მდებარე სოფლების მოსახლეობის საჭიროებებზე რეაგირებისთვის სხვადასხვა უწყებების მონაწილეობით შეიქმნა იმ ფონზე, როცა რუსეთმა მავთულხლართებით ე.წ. საზღვრის მოწყობის პროცესი გაააქტიურა.

კომისიამ 16 ოქტომბერს თავის მორიგ შეკრებაზე ამ სოფლების გაზიფიცირების, ელექტროგამრიცხველიანების, შეშით მომარაგების, სოციალური  დახმარების დარეგულირების, ამბულატორიების მშენებლობის, მიწების რეგისტრაციის, პირადობის მოწმობების გაცემის და სკოლების რეაბილიტაციის საკითხებზე იმსჯელა.

„მთლიანობაში საჭირო 20 მილიონი ლარის ნაწილით უნდა დაფინანსდეს ის ღონისძიებები, რაც წლის ბოლომდე მოესწრება. დანარჩენი ღონისძიებები, მათ შორის გაზიფიცირება, მომავალი წლის ბიუჯეტიდან უნდა დაფინანსდეს“, - განაცხადა ნარმანიამ და დასძინა, რომ ეს თანხები სამინისტროების არსებული დაფინანსების ფარგლებში იქნება მობილიზებული, ვინაიდან კანონმდებლობა მთავრობას წინასაარჩევნო პერიოდში ბიუჯეტიდან დამატებითი დაფინანსების გამოყოფას უკრძალავს.

პაატა ზაქარეიშვილის თქმით, სოფლების გამრიცხველიანებასა და გაზიფიცირებას მთავრობა ექვს თვეში ვარაუდობს. ასევე დაგეგმილია გამყოფ ხაზებთან მდებარე სოფლებში 19 ახალი ამბულატორიის აშენება.

იუსტიციის მინიტრმა თეა წულუკიანმა, რომელიც ასევე მონაწილეობდა კომისიის სხდომაში, განაცხადა, რომ საჯარო რეესტრი ადმინისტრაციულ საზღვრის სიახლოვეს მცხოვრებ მოსახლეობას უსასყიდლოდ დაურეგისტრირებს მათ სარგებლობაში არსებულ მიწებს.

საქართველოში აშშ-ის საერთაშორისო განვითარების სააგენტოს (USAID) წარმომადგენლობის ხელმძღვანელმა სტივ ჰაიკინმა, რომელიც ასევე მონაწილეობდა კომისიის სხდომაში, განაცხადა, რომ იმ მიმდინარე პროექტებთან ერთად, რომელსაც სააგენტო ინფრასტრუქტურის სამინისტროსთან ერთად გზებისა და საირიგაციო სისტემების რეაბილიტაციის მიმართულებით ახორციელებს, „დგება საკითხი, თუ როგორ შეიძლება დავეხმაროთ სახელმწიფოს გადაუდებელ საჭიროებებს უპასუხოს“.