ეუთოს წარმომადგენელმა  მედიის თავისუფლების საკითხებში დუნია მიატოვიჩმა იმედგაცრუება გამოხატა იმის გამო, რომ საქართველოს პარლამენტმა ვერ მოახერხა საქართველოს საზოგადოებრივი მაუწყებლის ახალი სამეურვეო საბჭოს სრულად დაკომპლექტება. 

„იმედგაცრუებული ვარ იმის გამო, რომ პარლამენტმა კიდევ ერთხელ ვერ მოახერხა დაესრულებინა [წევრების] შერჩევა, მიუხედავად შესარჩევი კომისიის მიერ ჩატარებული კომპეტენტური და გამჭირვალე კონკურსისა“, – განაცხადა მიატოვიჩმა 24 იანვარს.

„მოვუწოდებ საქართველოს პარლამენტს დროული გადაწყვეტილება მიიღოს. მჯერა, რომ ახალი საბჭო გამოაცოცხლებს მაუწყებელს და ქვეყანაში ინფორმაციის თავისუფალ ნაკადს შეუწყობს ხელს“, – განაცხადა მან და იმედი გამოთქვა, რომ საქართველოს საზოგადოებრივი მაუწყებელი დამოუკიდებელი ტელევიზია იქნება, რომელიც თავისუფალი იქნება პოლიტიკური და კომერციული გავლენისგან.

პარლამენტმა ორი ტურის შედეგად, რომელთაგანაც პირველი დეკემბრის ბოლოს, ხოლო მეორე 23 იანვარს გაიმართა, 9–წევრიან საბჭოში მხოლოდ ოთხი წევრი აირჩია. დეპუტატებმა, ძირითადად ქართული ოცნების საპარლამენტო უმრავლესობიდან, საკონკურსო კომისიის მიერ შერჩეული 27 კანდიდატიდან უმეტესობა ჩააგდეს, რამაც მედიის და სამოქალაქო საზოგადოების აქტივისტების პროტესტი გამოიწვია.

დეკემბრის ბოლოს პარლამენტში გამართული პირველი წარუმატებელი კენჭისყრის შემდეგ,  ეუთოს წარმომადგენელმა  მედიის თავისუფლების საკითხებში დუნია მიატოვიჩმა პარლამენტის თავმჯდომარეს დავით უსუფაშვილს მიწერა და შეშფოთება გამოხატა იმის გამო, რომ საკანონმდებლო ორგანომ ვერ შეძლო საბჭოში ახალი წევრების არჩევა.