საქართველოს ხელმძღვანელობა მზად არის რუს კოლეგებთან შესახვედრად, მაგრამ ასეთ შეხვედრას ძალიან სერიოზული მომზადება სჭირდება, განაცხადა პრემიერ–მინისტრმა ირაკლი ღარიბაშვილმა.

„მე, როგორც საქართველოს მთავრობის ხელმძღვანელი, გიდასტურებთ, რომ მე ეს მზაობა მაქვს, რომ შედგეს პირდაპირი დიალოგი. გვაქვს ასეთი მზაობა გუნდში. ის, თუ რა ფორმატის იქნება ეს შეხვედრა ან როდის მოხდება ან სად, ასეთ დეტალებზე მე ამ ეტაპზე თავს შევიკავებდი. უბრალოდ უნდა აღვნიშნო, რომ ასეთი მზაობა ჩვენც გვაქვს“, – განაცხადა პრემიერ–მინისტრმა ღარიბაშვილმა ტელეკომპანია „იმედთან“ ინტერვიუში 11 თებერვალს. 

მან ეს კომენტარი მას შემდეგ გააკეთა, რაც ვლადიმერ პუტინის 10 თებერვლის იმ რეპლიკის შესახებ ჰკითხეს, სადაც მან საქართველოს პრეზიდენტთან შეხვედრის მზადყოფნა გამოთქვა.

„ჩვენ აუცილებლად უნდა დავალაგოთ ურთიერთობები რუსეთთან“, – განაცხადა ღარიბაშვილმა. 

„რა თქმა უნდა, ჩვენ გვაქვს გადაუჭრელი პრობლემა“, – განაცხადა მან საქართველოს სეპარატისტულ რეგიონებზე მინიშნებით.

„მინდა ვთქვა, რომ ასეთ შეხვედრას სჭირდება ძალიან სერიოზული მომზადება“, – დასძინა პრემიერ–მინისტრმა.     

მისი თქმით, საქართველოს დასავლელი პარტნიორები მიესალმებიან ქვეყნის „კონსტრუქციულ“ ნაბიჯებს რუსეთთან მიმართებაში და მოუწოდებენ თბილისს, რომ გააძლიეროს კონსტრუქციული დიალოგი მოსკოვთან.