Civil.ge-ს შესახებ
Eng | ქარ | Рус
ბოლო განახლება: 11:10 - 28 აპრ.'18
RSS
Mobile
Twitter
Facebook
საფრანგეთის სასამართლომ კეზერაშვილის საქართველოში ექსტრადიციაზე უარი თქვა
Civil Georgia, Tbilisi / 27 თებ.'14 / 18:08

საფრანგეთის ქალაქ ექს-ან-პროვანსის სააპელაციო სასამართლომ 27 თებერვალს უარი განაცხადა დაეკმაყოფილებინა საქართველოს მოთხოვნა ყოფილი თავდაცვის მინისტრის დავით კეზერაშვილის ექსტრადიციის თაობაზე.

კეზერაშვილის დაცვის მხარე აცხადებდა, რომ ექსტრადიციის მოთხოვნა პოლიტიკურად მოტივირებული იყო.

კეზერაშვილი, მის მიმართ ორ საქმეზე წაყენებული ბრალდებების საფუძველზე, საქართველოს მოთხოვნით საფრანგეთში 14 ოქტომბერს დააკავეს; ის ოთხ თვეზე მეტი ხნით წინასწარ პატიმრობაში რჩებოდა და ექს-ან-პროვანსის სააპელაციო სასამართლომ თებერვლის დასაწყისში ელექტრონული დაკვირვების პირობით გაათავისუფლა.

ფრანგმა მოსამართლემ 27 თებერვალს კეზერაშვილს ნაწილობრივი შინა პატიმრობა და ელექტრონული სამაჯურის ტარების ვალდებულებაც მოუხსნა.

„ველოდებოდი, რა თქმა უნდა, ამას. ძალიან მიხარია, რომ ასეთი გადაწყვეტილება მიიღო საფრანგეთის სასამართლომ იმიტომ, რომ ორივე საქმე ჩემს წინააღმდეგ იყო აბსოლუტურად ხელოვნური“, - განაცხადა კეზერაშვილმა და დასძინა, რომ მის წინააღმდეგ საქმეები არის პოლიტიკურად მოტივირებული.

დავით კეზერაშვილი, რომელიც ექს-პრეზიდენტ სააკაშვილთან დაახლოებული პირია, 2004 წლიდან 2006 წლის ბოლომდე საქართველოს ფინანსური პოლიციის უფროსი იყო, ხოლო შემდეგ, 2008 წლის დეკემბრამდე თავდაცვის მინისტრის პოსტი ეკავა.

კეზერაშვილს თბილისის საქალაქო სასამართლომ შარშან თებერვლის ბოლოს დაუსწრებლად შეუფარდა წინასწარი პატიმრობა ტელეკომპანია „იმედის“ საქმესთან დაკავშირებით, რომელშიც მას ბრალად ედება ორგანიზებული ჯგუფის მიერ განსაკუთრებით დიდი რაოდენობით ფულის გათეთრება და უკანონო შემოსავლის მიღება, ასევე მითვისება-გაფლანგვა. ამასთან, კეზერაშვილს კორუფციული ბრალდებები აქვს წაყენებული მეორე საქმეზე, რომელშიც მას პროკურატურა 12.3 მილიონი აშშ დოლარის ოდენობის ქრთამის აღებას ედავება 2007-2012 წლებში ეთილის სპირტის კონტრაბანდული სქემის მფარველობისთვის.

იუსტიციის მინისტრმა თეა წულუკიანმა განაცხადა, რომ პროკურატურა აგრძელებს მუშაობას იმისთვის, რომ დავით კეზერაშვილი ქართული მართლმსაჯულების წინაშე წარდგეს იმის მიუხედავად, რომ საფრანგეთის სასამართლომ უარი თქვა მის ექსტრადიციაზე.

„ეს გადაწყვეტილება არის სულ ცინცხალი“, - განუცხადა წულუკიანმა ჟურნალისტებს ამ თემაზე კომენტირებისას, „ჩემთვის ცნობილია ის, რომ არის უარი [ექსტრადიციაზე].  მე ძალიან ვწუხვარ, რომ  ფრანგი მოსამართლე აღმოჩნდა ისეთი უთანასწორო პირობების წინაშე, როგორიც იყო ძვირადღირებული კეზერაშვილი ერთ მხარეს და მეორე მხარეს ფრანგი პროკურორი და არა ქართველი პროკურორი, რომელმაც ამ ძვირადღირებულ ადვოკატს, როგორც ჩანს, ღირსეული და სათანადო კონკურენცია ვერ გაუწია იმისთვის, რომ ფრანგ პროკურორს ქართველი სამართალდამცავის სახელით ევალებოდა დაეცვა ჩვენი ინტერესი“.

„ეს ასე ვერ მოხდა, მაგრამ ეს არ ნიშნავს იმას, რომ ფრანგმა მოსამართლემ კეზერაშვილი გაამართლა რაიმეში. საქართველოში ბრალი მის წინაშე არის წაყენებული და ასეთადაც დარჩება. უბრალოდ, მე ვწუხვარ, რომ კეზერაშვილს არ მიეცემა საშუალება ჩამოსულიყო და აქ გაებათილებინა, თუკი ის ასე თვლის, მის წინააღმდეგ წაყენებული ქართველი პროკურორის ბრალდებები“, - განაგრძო მან, „ყოველ შემთხვევაში ამით ჩვენი სამუშაო ამოწურული არ არის. მე ვიცი, რომ პროკურატურა აგრძელებს მუშაობას იმაზე, რომ დღეს თუ არა ხვალ ბატონი [კეზერაშვილი] იქნას ჩამობრძანებული ქვეყანაში იმისთვის, რომ პასუხი გასცეს ქართულ საზოგადოებას“.

30 იანვარს პროკურორმა სოლანჟ ლეგრასმა განუცხადა სასამართლოს, რომ მას ექსტრადიციის მოთხოვნასთან დაკავშირებით „დიდი ეჭვები“ აქვს, რომელიც, მისი თქმით, პოლიტიკურად მოტივირებული აღმოჩნდა, იტყობინება AFP.

 

უახლესი ამბები
28 აპრ.'18 11:10
ვანის და ხონის საარჩევნო ოლქში შუალედური საპარლამენტო არჩევნები მიმდინარეობს
ერთმანდატიან საარჩევნო ოლქში არჩევნებში ხუთი პარტიის და ერთი საინიციატივო ჯგუფის წარმომადგენელები მონაწილეობენ.
27 აპრ.'18 18:49
ქართველი პოლიტიკოსები ბიძინა ივანიშვილის პარტიაში დაბრუნებას აფასებენ
ბიძინა ივანიშვილს ქართული ოცნების თავმჯდომარედ პარტიის ყრილობაზე აირჩევენ, რომელიც უახლოეს პერიოდში შედგება.
27 აპრ.'18 18:09
აშშ-ის სახელმწიფო მდივნის თანაშემწე საქართველოს ესტუმრება
ვეს მიტჩელი ხელისუფლების წარმომადგენლებს შეხვდება და ნატო-საქართველოს სახალხო დიპლომატიის ფორუმზე გამოვა სიტყვით.
26 აპრ.'18 19:07
სტოლტენბერგი: საქართველო ნატოს ‘ძალიან ახლო’ პარტნიორია
ნატოს გენერალური მდივნის თქმით, საგარეო საქმეთა მინისტრების შეხვედრა ქვეყნის პროგრესს აღიარებს.
26 აპრ.'18 16:47
ყოფილი პრემიერ-მინისტრი ბიძინა ივანიშვილი ქართული ოცნების თავმჯდომარე გახდება
პრემიერ კვირიკაშვილის თქმით, ივანიშვილს შესწევს ძალა გააძლიეროს პოლიტიკური პარტია და მას „ახალი დინამიკა“ შესძინოს.
25 აპრ.'18 18:33
ხაჯიმბამ მთავრობის ახალი ხელმძღვანელი დანიშნა
გენადი გაგულიას ორჯერ ეკავა ოკუპირებული რეგიონის პრემიერ-მინისტრის თანამდებობა.
25 აპრ.'18 15:17
საქართველოს რეიტინგი პრესის თავისუფლების ინდექსში გაუმჯობესდა
საქართველოს პოსტ-საბჭოთა ქვეყნებიდან, ბალტიისპირეთის ქვეყნების გარდა, არცერთი ქვეყანა არ უსწრებს.
25 აპრ.'18 14:18
გახარია ლიტვაში საგარეო და შინაგან საქმეთა მინისტრებს შეხვდა
საქართველოს და ლიტვის ოფიციალურმა პირებმა ევროკავშირთან უვიზო რეჟიმზე და სამართალდამცავ სტრუქტურებს შორის თანამშრომლობაზე ისაუბრეს.
24 აპრ.'18 17:29
განსხვავებული რეაქციები საქართველოში სომხეთის პროტესტზე
მმართველი პარტიის დეპუტატმა განაცხადა გუშინ, რომ „მთავარია მშვიდი ვითარება და სტაბილურობა ჩვენს სამეზობლოში“.
24 აპრ.'18 12:42
ცხინვალის ლიდერი იალტის ფორუმს დაესწრო და სირიის, იტალიის და სერბეთის დელეგაციებს შეხვდა
ანატოლი ბიბილოვმა 19-21 აპრილს იალტის საერთაშორისო ეკონომიკურ ფორუმში მიიღო მონაწილეობა.

სივილ ჯორჯიას შესახებ
Civil.Ge © 2001-2022, ახალი ამბები საქართველოდან
რეგისტრაციის ადგილი: დოლიძის ქ. 2, IV სართული.
13