ცენტრალურმა საარჩევნო კომისიამ კანდიდატებად დაარეგისტრირა ყველა ის 14 პირი, რომელთაც 15 ივნისის ადგილობრივ არჩევნებზე თბილისის მერად კენჭისყრისთვის წარადგინეს განაცხადები.      

კანდიდატმა ხმების 50%–ზე მეტი უნდა მოიპოვოს, რათა პირველივე ტურში გამოცხადდეს გამარჯვებულად და მეორე ტურის გამართვა აღარ იყოს საჭირო.

ქვემოთ მოცემულია თბილისის მერობის კანდიდატების სია:

• დავით ნარმანია, რეგიონალური განვითარების და ინფრასტრუქტურის ყოფილი მინისტრი, რომელიც მმართველმა კოალიციამ ქართულმა ოცნებამ წარადგინა; 
• ნაციონალური მოძრაობის მიერ დასახელებული ნიკა მელია; ის ძველი თბილისის რაიონის გამგებელია, ხოლო 2012 წლის საპარლამენტო არჩევნებამდე აღსრულების ეროვნულ ბიუროს ხელმძღვანელობდა; 
• დიმიტრი ლორთქიფანიძე, რომელიც ნინო ბურჯანაძის კოალიციამ დაასახელა; 
• კახა კუკავა, რომელიც ახალი მემარჯვენეების და თავისუფალი საქართველოს საარჩევნო ბლოკმა წარადგინა;  
• დეპუტატი გიორგი გაჩეჩილაძე, მწვანეთა პარტიის ლიდერი,  რომელმაც ქართული ოცნების საპარლამენტო უმრავლესობა თებერვალში დატოვა;
• ლეიბორისტული პარტიის მიერ წარდგენილი მსახიობი ასმათ ტყაბლაძე; 
• მედია საშუალება „ობიექტივის“ ხელმძღვანელი ირმა ინაშვილი, რომელიც საქართველოს პატრიორთა ალიანსმა დაასახელა; 
• მხატვარი თეიმურაზ მურვანიძე, რომელიც სალომე ზურაბიშვილის პარტიამ „საქართველოს გზა“ წარადგინა; 
• სერგო ჯავახიძე, რომელიც ორი პატარა პარტიისგან შემდგარი  საარჩევნო ბლოკის „თვითმმართველობა ხალხისთვის“ კანდიდატია. ჯავახიძემ 2013 წლის საპრეზიდენტო არჩევნებზე ხმების 0.13% მიიღო; 
• ირაკლი ღლონტი პარტია „რეფორმატორებიდან“; 
• მიხეილ სალუაშვილი, რომელიც წარადგინა პარტიამ უფლის სახელით-უფალია ჩვენი სიმართლე და რომელმაც 2013 წლის საპრეზიდენტო არჩევნებზე ხმების 0.08% მიიღო; 
• მერაბ კოსტავას საზოგადოების მიერ წარდგენილი გიორგი ლილუაშვილი, რომელმაც 2013 წლის საპრეზიდენტო არჩევნებზე ხმების 0.12% მიიღო; 
• გიორგი ლაღიძე პარტია „მომავალი საქართველოს“ სახელით იყრის კენჭს; ის 2010 წელს თბილისის მერის არჩევნებშიც იყრიდა კენჭს და ხმების 0.14% მიიღო; 
• საქართველოს მშრომელთა საბჭოს მიერ დასახელებული როინ ლიპარტელიანი.

5 ივნისი მერობის კანდიდატების მიერ არჩევნებში მონაწილეობაზე უარის თქმის ბოლო ვადაა; თუ ისინი ამ თარიღის შემდეგ მოხსნიან თავიანთ კანდიდატურებს, მათი გვარები მაინც დარჩება საარჩევნო ბიულეტენებში.