თბილისის საქალაქო სასამართლომ 2 ივლისს არ დააკმაყოფილა პროკურატურის შუამდგომლობა თბილისის უფლებამოსილება შეჩერებული მერისა და ნაციონალური მოძრაობის ერთ-ერთი ლიდერისთვის, გიგი უგულავასთვის პასპორტისა და პირადობის მოწმობის ჩამორთმევის თაობაზე.

პროკურატურა ასევე სთხოვდა სასამართლოს, რომ უგულავასთვის პრევენციული ზომის სახით 50 000 ლარიანი გირაო შეეფარდებინა მის წინააღმდეგ წაყენებულ ახალ ბრალდებებთან დაკავშირებით  ბიუჯეტის კუთვნილი თანხების სავარაუდო გაფლანგვის საქმეზე.

შუამდგომლობა უგულავასთვის პასპორტის ჩამორთმევის თაობაზე მიზნად ისახავდა მისთვის საზღვარგარეთ გამგზავრების შესაძლებლობის მოკლებას.

უგულავამ, რომელსაც სხვა რამდენიმე საქმეზეც აქვს ბრალი წაყენებული, უკვე რამდენჯერმე დატოვა ქვეყანა და დაბრუნდა უკან მას შემდეგ, რაც მას 2013 წლის თებერვალში პირველად წაუყენეს ბრალი. თუმცა, მთავარი პროკურორის მოადგილემ ირაკლი შოთაძემ განაცხადა, რომ ამჯერად პროკურატურამ „ინფორმაცია მიიღო“, რომ უგულავა საქართველოში დაბრუნებას აღარ აპირებდა.

უგულავამ განაცხადა გასულ კვირას, რომ ის „სამუშაო ვიზიტებს“ გეგმავდა ლონდონში, შემდეგ კი კიევში, სადაც დედაქალაქის მერს ვიტალი კლიჩკოს უნდა შეხვედროდა, რის შემდეგაც ის კიშინიოვში 3 ივლისს ადგილობრივი და რეგიონალური ხელისუფლებების კონგრესის მონიტორინგის კომიტეტის შეხვედრაში მიიღებდა მონაწილეობას.

სასამართლო მოსმენის წინ უგულავამ განაცხადა, რომ არ აპირებს პრემიერ ღარიბაშვილს ან ვინმეს ხელისუფლებაში მიანიჭოს „ბედნიერება“ იმით, რომ  „წავიდე, არ დავბრუნდე და ამითი სალაპარაკო მივცე მათ“. მისივე თქმით, მის წინააღმდეგ წაყენებული ბრალდებები, რომელსაც ის უარყოფს, როგორც პოლიტიკურად მოტივირებულს, წარმოადგენს ხელისუფლების მცდელობას გააცოცხლოს „პოლიტიკურად მომაკვდავი“ დავით ნარმანია, ქართული ოცნების თბილისის მერობის კანდიდატი, რომელიც მეორე ტურში ნაციონალური მოძრაობიდან ნიკა მელიას დაუპირისპირდება.