პარლამენტმა 1 აგვისტოს უზენაესი სასამართლოს მოსამართლეების ორი კანდიდატურა ჩააგდო, რომლებიც პრეზიდენტმა გიორგი მარგველაშვილმა წარადგინა, რომლის თქმითაც დეპუტატების ეს გადაწყვეტილება „აბსოლუტურად გაუგებარია“.

ნინო ბაქაქურმა და ზურაბ ძლიერიშვილმა,რომლებიც უზენაეს სასამართლოში ორ ვაკანტურ ადგილზე იყვნენ წარდგენილები, 29 და 27 ხმა მიიღეს, შესაბამისად. მათ დასამტკიცებლად სულ ცოტა 76 ხმა იყო საჭირო.

ქართული ოცნების დეპუტატმა ზაქარია ქუცნაშვილმა განაცხადა, რომ საპარლამენტო უმრავლესობაში აზრი ამ კანდიდატებზე „გაიყო“ და არანაირი შეხვედრა არ გამართულა ქართული ოცნების დეპუტატების მონაწილეობით ამ საკითხზე ერთობლივი პოზიციის შესათანხმებლად. ქუცნაშვილმა კენჭისყრამდე ხანმოკლე კონსულტაცია ითხოვა, თუმცა მისმა კოლეგებმა საპარლამენტო უმრავლესობიდან ეს შემოთავაზება არ დააკმაყოფილეს.

„მე გულწრფელად მიკვირს, რაც მოხდა მოსამართლეებთან დაკავშირებით, განსაკუთრებით იმ ვითარებაში, როდესაც მთელი მსოფლიო სწორედ ჩვენს სასამართლო სისტემას ყურადღებით ადევნებს თვალს“, – განუცხადა მარგველაშვილმა ჟურნალისტებს 1 აგვისტოს.

„მე მინდა გითხრათ, რომ საქართველოს პრეზიდენტი და მისი ადმინისტრაცია სწორედ რომ მიუკერძოებლობის, პოლიტიკური ნეიტრალობის და პროფესიონალიზმიდან გამომდინარე არჩევს მოსამართლეებს. შესაბამისად, ჩვენს მიერ წარდგენილი მოსამართლეების კანდიდატები, რომელთაც – მინდა ხაზგასმით ავღნიშნო – კომიტეტზე მიიღეს მხარდაჭერა, დღეს ეს კანდიდატურები ჩავარდა პლენარულ სხდომაზე“, – განაცხადა მან.

მისი თქმით, იმის თქმა, რომ საპარლამენტო უმრავლესობაში კოორდინაციის ნაკლებობაა, საპატიო მიზეზი არ არის, რადგანაც კანდიდატებმა ადამიანის უფლებათა კომიტეტის 23 ივლისის სხდომაზე მხარდაჭერა მიიღეს.

„თუ ვსაუბრობთ კოორდინაციაზე, კომიტეტი, მე ვფიქრობ, ადეკვატური ადგილია კოორდინაციისთვის. ასეთი კოორდინაცია გავლილი იყო. შესაბამისად, ჩემთვის აბსოლუტურად გაუგებარია, რატომ პროფესიონალი, მიუკერძოებული და სამაგალითო მოსამართლეები დღეს პარლამენტმა ჩამიგდო“, – განაცხადა მარგველაშვილმა.