სეპარატისტული აფხაზეთის პრეზიდენტობის მოვალეობის შემსრულებელმა ვალერი ბგანბამ წერილები გაუგზავნა ბელარუსისა და ყაზახეთის პრეზიდენტებს ალექსანდრე ლუკაშენკოსა და ნურსულთან ნაზარბაევს, რომელშიც „აფხაზეთის რესპუბლიკის სუვერენიტეტისა და დამოუკიდებლობის“ აღიარებას თხოვს.

წერილებში ხაზგასმულია, რომ სოხუმს თავისი წვლილის შეტანა სურს ევრაზიული კავშირის ინტეგრაციულ პროცესებში.

„ჩვენ ყურადღებით ვაკვირდებით ყაზახეთის რესპუბლიკას, რუსეთის ფედერაციას, ბელარუსის რესპუბლიკას შორის ინტეგრაციის დინამიკას და ვიმედოვნებთ, რომ იმის ფონზე, რაც ხდება,  ყაზახეთის რესპუბლიკა, რუსეთის ფედერაცია და ბელარუსის რესპუბლიკა შეაფასებენ აფხაზეთის რესპუბლიკის სწრაფებას ხელი შეუწყოს ინტეგრაციულ პროცესებს და დროთა განმავლობაში ჩვენი სახელმწიფო მონაწილეობას მიიღებს ევრაზიული კავშირის მშენებლობაში“, - აცხადებს თავის წერილებში ბგანბა, რომელიც სეპარატისტული რეგიონის პარლამენტის თავმჯდომარეა.

სეპარატისტულმა პარლამენტმა ასევე მიმართა ბელარუსისა და ყაზახეთის საკანონმდებლო ორგანოებს აღიარების თხოვნით.

აფხაზეთი ამ დროისთვის რუსეთის, ნიკარაგუას, ვენესუელას და ნაურუს მიერ რჩება აღიარებული.