„საქსტატის“ მიერ ოთხშაბათს გამოქვეყნებული წინასწარი მონაცემებით, პირდაპირი უცხოური ინვესტიციები 2014 წელს 35%–ით გაიზარდა წინა წელთან შედარებით და 1.27 მილიარდი აშშ დოლარი შეადგინა, რაც ყველაზე დიდი შემოდინებაა 2008 წლის შემდეგ.

წინასწარი მონაცემებით, 2014 წლის მეოთხე კვარტალში პირდაპირი უცხოური ინვესტიციების მოცულობა 349.2 მილიონი აშშ დოლარი იყო, რაც 53.9%–იანი ზრდაა წინა წლის შესაბამის პერიოდთან შედარებით. 

შარშან ყველაზე დიდი ინვესტიცია ტრანსპორტის და კავშირგაბმულობის სფეროში განხორციელდა – 343 მლნ აშშ დოლარი; შემდეგ მოდის მშენებლობა – 295 მლნ აშშ დოლარი; დამამუშავებელი მრეწველობა – 174 მლნ აშშ დოლარი; ენერგეტიკა – 99 მლნ აშშ დოლარი; უძრავი ქონება – 87 მლნ აშშ დოლარი; საფინანსო სექტორი – 78 მლნ აშშ დოლარი; სამთომოპოვებითი მრეწველობა – 48 მლნ აშშ დოლარი; სასტუმროები და რესტორნები – 40 მლნ აშშ დოლარი; სოფლის მეურნეობა, თევზჭერა – 19 მლნ აშშ დოლარი.

2014 წელს ყველაზე დიდი ინვესტიცია იმ კომპანიებიდან შემოვიდა, რომლებიც ნიდერლანდებშია დარეგისტირებული – 331 მლნ აშშ დოლარი; შემდეგ მოდის აზერბაიჯანი – 302 მლნ აშშ დოლარი; ჩინეთი – 195 მლნ აშშ დოლარი; გაერთიანებული სამეფო – 114 მლნ აშშ დოლარი; ლუქსემბურგი – 85 მლნ აშშ დოლარი; აშშ – 80 მლნ აშშ დოლარი; თურქეთი – 67 მლნ აშშ დოლარი; რუსეთი – 66 მლნ აშშ დოლარი.