აშშ-ის ეროვნულ დემოკრატიულმა ინსტიტუტმა (NDI) საზოგადოებრივი აზრის კვლევა გამოაქვეყნა, რომელიც 8 ივნისიდან 6 ივლისამდე პერიოდში კავკასიის კვლევითი რესურსების ცენტრმა ჩაატარა და რომელიც რესპოდენტების განწყობებს აჩვენებს საკითხთა ფართო სპექტრის, მათ შორის საგარეო პოლიტიკის მიმართ.

• საზოგადოებრივი აზრის კვლევა, ივნისი, 2016 წელი - pdf

იმ რესპონდენტების რაოდენობა, რომელთაც მიაჩნიათ, რომ საქართველო „არასწორი მიმართულებით“ ვითარდება 2016 წლის ივნისში 33%–მდე შემცირდა; მარტში ეს მაჩვენებელი 39% იყო, 2015 წლის ნოემბერში 45%, ხოლო 2015 წლის აპრილში 37%.

რესპონდენტების 25%–ს მიაჩნია, რომ საქართველო „სწორი მიმართულებით“ ვითარდება; მარტში ეს მაჩვენებელი 20% იყო და სტატისტიკურად იგივეა, რაც 2015 წლის აპრილში.

გამოკითხვის თანახმად, რესპონდენტების 34% ფიქრობს, რომ საქართველო „საერთოდ არ იცვლება“. 

რესპონდენტების 17% მიიჩნევს, რომ მათი ოჯახების მდგომარეობა 2012 წლის ოქტომბრის შემდეგ „გაუმჯობესებულია“, რაც 7%–იანი ზრდაა 2016 წლის მარტის შემდეგ.

იმ რესპონდენტების რაოდენობა, რომლებიც ფიქრობენ, რომ მათი მდგომარეობა გაუარესდა 2016 წლის მარტში არსებული 42%–დან 32%–მდე შემცირდა ივნისში.

51% აცხადებს, რომ მათი ოჯახური მდგომარეობა 2012 წლის ოქტომბრის შემდეგ არ შეცვლილა.

მცირედით გაუმჯობესდა და მარტში არსებული 37%–დან 42%–მდე გაიზარდა ისეთი მოქალაქეების რაოდენობა, რომლებიც ამბობენ, რომ ხელისუფლება მათთვის მნიშვნელოვან ცვლილებებს ახორციელებს.

ყველაზე აქტუალურ საკითხებს შორის დასაქმება და სიღარიბე დასახელდა; შემდეგ მოდის ტერიტორიული მთლიანობა, ფასების ზრდა და პენსიები.

„ხელმისაწვდომი სამედიცინო მომსახურება“ ერთდაერთი სფეროა იმ ჩამონათვალში, რომელშიც რესპონდენტების უმეტესობას (55%, მარტი – 51%) მიაჩნია, რომ ვითარება უკეთესობისკენ შეიცვალა 2012 წლის საპარლამენტო არჩევნების შემდეგ.

საგარეო პოლიტიკა

რესპონდენტების 72% (მარტში 77%) მხარს უჭერს ხელისუფლების გაცხადებულ მიზანს ქვეყნის ევროკავშირში გაწევრიანების თაობაზე.

კვლევა ცხადყოფს, რომ ეს მხარდაჭერა ახალგაზრდებს შორის უფრო ძლიერია, ხოლო 56 წლის და უფროს რესპონდენტებს შორის 64%–მდე იკლებს. კვლევის თანახმად,  ეთნიკური უმცირესობებით დასახლებულ რაიონებში ევროკავშირში გაწევრიანებას რესპონდენტების 50% უჭერს მხარს; ამ დასახლებებში მცხოვრები რესპონდენტების 24% წინააღმდეგია, ხოლო 26%–მა „არ იცის“.  

რესპონდენტების 64% მიიჩნევს, რომ შენგენის ზონაში უვიზო რეჟიმი მათ სარგებელს მოუტანს; 2016 წლის მარტში ეს მაჩვენებელი 72% იყო.  

რესპონდენტების 68%–მა განაცხადა, რომ ისინი მხარს უჭერენ ხელისუფლების მიზანს ნატოში გაწევრიანების თაობაზე, რაც 4 პროცენტული პუნქტით ნაკლებია 2016 წლის მარტთან შედარებით. 

ნატოში გაწევრიანების მიმართ მხარდაჭერა 47%–მდე შემცირდა იმ რესპონდენტებს შორის, რომლებიც ეთნიკური უმცირესობებით დასახლებულ რაიონებში ცხოვრობენ; რესპონდენტების 27% იგივე დასახლებებიდან პასუხობს, რომ „არ იცის“.

კითხვაზე, თუ როგორი უნდა იყოს საქართველოს საგარეო პოლიტიკა, 48%–მა (მარტში 52%) უპასუხა „პროდასავლური, თუმცა უნდა შეინარჩუნოს  კარგი ურთიერთობა რუსეთთან“.

იმავე კითხვაზე, რესპონდენტების 20%–მა (მარტში 16%) უპასუხა „პრორუსული, თუმცა უნდა შეინარჩუნოს კარგი ურთიერთობა ევროკავშირთან და ნატოსთან“. 

რესპონდენტების 13%–მა, რაც სტატისტიკურად იგივეა რაც მარტში, აირჩია პასუხი: „პროდასავლური“, ხოლო 6%–მა, იგივე რაოდენობამ რაც მარტში – „პრორუსული“. 

კვლევის ავტორების თანახმად, ანალიზის შედეგად დადგინდა, რომ თუ ამომრჩეველი საქართველოს შესახებ ინფორმაციას უცხოური არხებიდან იღებს, მაღალია შანსი, რომ პრორუსულად იყოს განწყობილი.  რესპონდენტების 23%–მა განაცხადა, რომ ისინი გადაცემებს პოლიტიკისა და მიმდინარე მოვლენების შესახებ უცხოურ, ძირითადად რუსულ ტელეარხებზე უყურებენ.