16 თებერვალს პროკურატურამ განმარტა რომ საქართველოს კათოლიკოს-პატრიარქი ილია მეორე სავარაუდოდ დაგეგმილი მკვლელობის სამიზნე არ ყოფილა.

საქართველოს მთავარმა პროკურორმა ირაკლი შოთაძემ 13 თებერვალს სპეციალურ ბრიფინგზე განაცხადა, რომ გამოძიება მკვლელობის მომზადების ფაქტზე „ერთერთი მოქალაქის“ განცხადების საფუძველზე დაიწყო.

2 თებერვალს პირმა, რომლის ვინაობასაც პროკურორი არ ასახელებს, პროკურატურას აცნობა, რომ დეკანოზმა გიორგი მამალაძემ მას სიცოცხლისთვის საშიში შხამიანი ნივთიერების - ციანიდის მოძიებაში დახმარება სთხოვა, რომლის გამოყენებითაც ამ უკანასკნელს „მაღალი იერარქიის სასულიერო პირის“ მოწამვლა სურდა.

მთავარმა პროკურორმა სავარაუდო მსხვერპლის ვინაობა არ გაამხილა, თუმცა აღნიშნა, რომ დეკანოზი მაშინ დააკავეს, როდესაც ის გერმანიაში გამგზავრებას გეგმავდა, სადაც პატრიარქს ოპერაცია უტარდებოდა, რამაც კიდევ უფრო გაამძაფრა ვარაუდები იმის თაობაზე, რომ მამალაძე პატრიარქის მოწამვლას გეგმავდა.

საქართველოს ოფიციალური პირების განცხადებებმა, რომ სამართალდამცავებმა „ტრაგედია“ და ქვეყანაზე „თავდასხმა“ აღკვეთეს, ამბავი კიდევ უფრო გაამძაფრა.

ინფორმაცია იმის თაობაზე, რომ გიორგი მამალაძის წინააღმდეგ წარდგენილ ბრალდებაში არ ფიგურირებდა მაღალი რანგის სასულიერო პირი, პირველად სახალხო დამცველმა უჩა ნანუაშვილმა გააჟღერა, რომელმაც მამალაძე 14 თებერვალს ციხეში მოინახულა.

16 თებერვალს პროკურატურამ განცხადება გამოაქვეყნა, რომლის თანახმადაც ინფორმაცია, რომ მამალაძის სამიზნეს საქართველოს პატრიარქი წარმოადგენდა „პროკურატურის მიერ გაკეთებული განცხადების გარკვეულ ინტერპრეტაციას წარმოადგენს“.

მანამდე პროკურატურამ გაზეთ „რეზონანსს“ განუცხადა, რომ მთავარმა პროკურორმა სპეციალურ ბრიფინგზე „ღიად“ განაცხადა, რომ „მაღალი იერარქიის სასულიერო პირის მკვლელობა არ იგეგმებოდა“. აქ საუბარია მხოლოდ "ერთ-ერთ პირზე პატრიარქის გარემოცვიდან".

პროკურატურის განცხადებებს ოპოზიციის კრიტიკა მოჰყვა. გიგა ბოკერიამ ევროპული საქართველოდან მმართველი პარტია რელიგიურ საკითხებით სპეკულირებაში დაადანაშაულა.

„ეს არის კიდევ ერთი ეპიზოდი საოცარი უტიფრობის, როცა პატრიარქის სიცოცხლით ისპეკულირეს“, - თქვა მან.

ევროპული საქართველოს კიდევ ერთმა წევრმა დავით ბაქრაძემ აღნიშნა, რომ ხელისუფლებას პატრიარქის თემით ქვეყანაში არსებული სხვა თემების გადაფარვა სურდა.

„ასეთი დისკუსია, რა თქმა უნდა, აზიანებს საპატრიარქოს და ეკლესიის ავტორიტეტს და საბოლოო ჯამში შეიძლება ემსახურებოდეს ხელისუფლების გავლენის გაძლიერებას ეკლესიაზე“, - განაცხადა ბაქრაძემ.

ერთიანი ნაციონალური მოძრაობის წევრმა, თინათინ ბოკუჩავამ განაცხადა, რომ პროკურატურის 13 თებერვლის განცხადება ემსახურებოდა საზოგადოების შეცდომაში შეყვანას და ხელისუფლებას აქვს „კონკრეტული ინტერესი“ აღნიშნულ საქმეში.

„ამას ასევე ადასტურებს კვირიკაშვილის განცხადებები, რომელმაც ძალიან სწრაფად გააკეთა, მიზანმიმართულად შეიყვანა საზოგადოება შეცდომაში, დაარღვია უდანაშაულობის პრეზუმცია“, - განაცხადა ბოკუჩავამ.