პრემიერ-მინისტრ კვირიკაშვილის მიერ ინიცირებული მასშტაბური სტრუქტურული რეორგანიზაციის ფარგლებში, რომელიც სამინისტროების რაოდენობის შემცირებას ითვალისწინებს, 13 ნოემბერს პირველი საკადრო ცვლილებები განხორციელდა. 

ეკონომიკის მინისტრად დაინიშნა პირველი ვიცე-პრემიერი დიმიტრი ქუმსიშვილი, რომელიც მანამდე ფინანსთა მინისტრის თანამდებობას იკავებდა. 

შინაგან საქმეთა მინისტრი და ვიცე-პრემიერი გიორგი გახარია გახდა, რომელიც მანამდე ეკონომიკის სამინისტროს ხელმძღვანელობდა. 

ფინანსთა მინისტრად დაინიშნა მამუკა ბახტაძე, რომელიც მანამდე „საქართველოს რკინიგზის“ დირექტორი იყო, ხოლო განათლების მინისტრად - მიხეილ ჩხენკელი, რომელიც ბოლო დრომდე თბილისის სახელმწიფო უნივერსიტეტის პრორექტორის თანამდებობას იკავებდა. 

პრემიერ-მინისტრის გადაწყვეტილებით, შინაგან საქმეთა ყოფილი მინისტრი გიორგი მღებრიშვილი სახელმწიფო უსაფრთხოებისა და კრიზისების მართვის საბჭოს მდივნად დაინიშნა. შემდგომში კი, იგი გაუძღვება საგანგებო სიტუაციების მართვის ცენტრს, რომელიც, სტრუქტურული რეორგანიზაციის ფარგლებში, კრიზისების მართვის საბჭოსა და შსს-ში დღეს მოქმედი საგანგებო სიტუაციების მართვის სააგენტოსა შერწყმი შედეგად შეიქმნება.

მთავრობაში მასშტაბური სტრუქტურული რეორგანიზაციისა და საკადრო ცვლილებების გეგმა პრემიერ-მინისტრმა კვირიკაშვილმა 13 ნოემბერს წარადგინა. გეგმის მიხედვით, მინისტრთა კაბინეტში, დღეს არსებული 16 სამინისტროს და სახელმწიფო მინისტრების ორი აპარატის ნაცვლად, 13 სამინისტრო და სახელმწიფო მინისტრის ერთი აპარატი დარჩება. 

საკადრო ცვლილებების ნაწილს, რომელიც 13 ნოემბერს განხორციელდა, პარლამენტის თანხმობა არ სჭირდება. სხვა ცვლილებები კი, რასაც კვირიკაშვილის ინიციატივა ითვალისწინებს, პარლამენტის მიერ შესაბამისი საკანონმდებლო ცვლილებების განხორციელებას მოითხოვს.

მთავრობის საპარლამენტო მდივნის, შავლა თადუმაძის განმარტებით, მთავრობა საკანონმდებლო ცვლილებების პაკეტით პარლამენტს უახლოეს პერიოდში მიმართავს.  საკანონმდებლო ცვლილებების განხორციელების შემდეგ კი, პრემიერ-მინისტრი კვირიკაშვილი პარლამენტს, ნდობის მისაღებად, მთავრობის განახლებულ შემადგელობას წარუდგენს.