(თბილისი, 21 ნოემბერი, 2003, სივილ ჯორჯია) - საქართველოში 2 ნოემბერს ჩატარებული საპარლამენტო არჩევნების კომენტირებისას აშშ-ის სახელმწიფო დეპარტამენტის წარმომადგენელმა ადამ ერელიმ 20 ნოემბერს ვაშინგტონში გამართულ ბრიფინგზე  განაცხადა, "რაც მინდა განვაცხადო, არის ის, რომ ჩვენ იმედგაცრუებული ვართ არჩევნების შედეგებით და საქართველოს ხელმძღვანელობით".

"შედეგები არ ასახავენ საქართველოს ხალხის ნებას. შედეგები ცხადყოფს ხმების მასობრივ გაყალბებას აჭარაში და საქართველოს სხვა რეგიონებში", - განაცხადა ერელიმ.

"დამოუკიდებელი ორგანიზაციების მიერ განხორციელებული ხმების პარალელური დათვლისა და "ეგზით პოლების" შედეგები მნიშვნელოვნად განსხვავდება ცენტრალური საარჩევნო კომისიის მიერ [20 ნოემბერს] გამოქვეყნებული შედეგებისგან, და ეს განსხვავება ადასტურებს, რომ ხმების დათვლის დროს ფართო მანიპულაციებს ჰქონდა ადგილი. ჩვენ რეგულარულად ვაწარმოებთ დიალოგს უმაღლეს დონეზე, როგორც აქ [ვაშინგტონში], ისე თბილისში, და ჩვენ შევაფასებთ შემდგომ ნაბიჯებს", - განაცხადა ერელიმ.

კითხვაზე, მიაჩნია თუ არა მას საქართველოს მთავრობა უკანონოდ არჩევნების შეგედების გაყალბების გამო, ერელიმ უპასუხა, რომ "ჩვენ ვაფასებთ მომდევნო ნაბიჯებს და გავაკეთებთ განცხადებას. არ მინდა მოვლენებს გავუსწრო წინ".