აფხაზეთი
ალექსანდრე ანქვაბი ზოგადი ინფორმაცია
- 2011 წლის 26 აგვისტოდან ალექსანდრე ანქვაბი აფხაზეთის მე-3 დე ფაქტო პრეზიდენტია.
- იგი დაიბადა 1952 წლის 26 დეკემბერს ქ. სოხუმში. ბავშვობის წლები გატარებული აქვს მშობლიურ სოფელ ხოფში (ყოფილი ათვარხუ), რომელიც გუდაუთის რაიონს მიეკუთვნება.
- 1969 წელს დაამთავრა სოხუმის #16-ე საშუალო სკოლა, 1974 წელს - როსტოვის სახელმწიფო უნივერსიტეტის იურიდიული ფაკულტეტი, ხოლო 1987 წელს - საბჭოთა კავშირის კომუნისტური პარტიის ცენტრალურ კომიტეტთან არსებული საზოგადოებრივ მეცნიერებათა აკადემია.
- ჰყავს მეუღლე რიმა ლაკობა და ორი ვაჟი - ალექსანდრე და ინალი. ალექსანდრემ მოსკოვის იურიდიული აკადემია დაამთავრა, ხოლო ინალი მოსკოვის საერთაშორისო ურთიერთობათა ინსტიტუტში სწავლობს.
- ალექსანდრე ანქვაბს მინიჭებული აქვს რუსეთის ფედერაციის მოქალაქეობა.
ანქვაბი საბჭოთა წლებში
საბჭოთა წლებში ალექსანდრე ანქვაბი სხვადასხვა სახელმწიფო და პარტიულ სტრუქტურებში მოღვაწეობდა.
- 1975-1981 წლებში მუშაობდა აფხაზეთის სსარ–ის იუსტიციის სამინისტროში, კომკავშირის საოლქო კომიტეტში, იყო გუდაუთის რაიონის კომკავშირის პირველი მდივანი და შს სამინისტროს გუდაუთის რაიონული განყოფილების უფროსი.
- 1981 წლიდან ანქვაბი სამუშაოდ თბილისში გადმოვიდა და 1983 წლამდე საქართველოს კომუნისტური პარტიის ცენტრალურ კომიტეტის აპარატში მუშაობდა, სადაც ჯერ სოფლის მეურნეობის განყოფილების სამეცნიერო და ეკონომიკური ანალიზის სექტორს ხელმძღვანელობდა, ხოლო შემდეგ ადმინისტრაციული ორგანოების განყოფილების უფროსის მოადგილე იყო.
- 1983 წლიდან 1990 წლამდე ანქვაბს საქართველოს სსრ შს მინისტრის მოადგილის თანამდებობა ეკავა და შს სამინისტროს პოლიტიკურ განყოფილებას ხელმძღვანელობდა.
- 1983 წელს მილიციის პოლკოვნიკის წოდება მიენიჭა.
- 1990 წელს ანქვაბმა შს სამინისტრო საკუთარი ნებით დატოვა და აფხაზეთში დაბრუნდა.
ანქვაბის პოლიტიკური კარიერა აფხაზეთში
- 1991 წელს ალექსანდრე ანქვაბი აფხაზეთის უმაღლესი საბჭოს დეპუტატად აირჩიეს.
- აფხაზეთის ომის დროს, 1992-1993 წლებში, ვლადისლავ არძინბას მთავრობაში, იგი აფხაზეთის შს მინისტრის მოვალეობას ასრულებდა, ასევე იყო „აფხაზეთის დაცვის სახელმწიფო კომიტეტის“ წევრი. აქტიურად მონაწილეობდა სამხედრო ტყვეების გაცვლის პროცესში.
- 1993 წელს მან ვლადისლავ არძინბას უარი განუცხადა იუსტიციის მინისტრობაზე და ე.წ. დემოკრატიული ოპოზიციის რიგებში გადაინაცვლა.
- 1994-2000 წლებში ალექსანდრე ანქვაბი ცხოვრობდა მოსკოვში და დაკავებული იყო ბიზნეს-საქმიანობითა და საზოგადოებრივ-პოლიტიკური მოღვაწეობით.
- იგი 2000 წელს დაბრუნდა ქალაქ სოხუმში, სადაც საფუძველი ჩაუყარა პირველ ოპოზიციურ მოძრაობას „აიტაირა“-ს („აღორძინება“). 2004 წელს გამოთქვა საპრეზიდენტო არჩევნებში მონაწილეობის სურვილი, თუმცა იმ გარემოებიდან გამომდინარე, რომ აღნიშნული პერიოდისთვის მას ჯერ არ შესრულებოდა აფხაზეთის ტერიტორიაზე ცხოვრების 5 წლიანი ვადა, არჩევნებში მონაწილეობაზე უარი ეთქვა. ამ შემთხვევაში ანქვაბმა და „აიტაირამ“ მხარი ოპოზიციურ კანდიდატს სერგეი ბაღაფშს დაუჭირეს.
- 2005 წლის 12 იანვარს ჩატარებულ განმეორებით არჩევნებში სერგეი ბაღაფშის გამარჯვების შემდეგ, 2005 წლის 14 თებერვალს ალექსანდრე ანქვაბი აფხაზეთის დე ფაქტო რესპუბლიკის პრემიერ-მინისტრად დაინიშნა.
- 2010 წლის 12 თებერვალს ანქვაბი აფხაზეთის დე ფაქტო რესპუბლიკის ვიცე-პრეზიდენტი გახდა. 2011 წლის მაისიდან კი, სერგეი ბაღაფშის ჯანმრთელობის მდგომარეობის გაუარესების გამო, დე ფაქტო რესპუბლიკის პრეზიდენტის მოვალეობას ასრულებდა.
- 2011 წლის 26 აგვისტოს ვადამდელ არჩევნებში ანქვაბმა მისი მთავარი მოწინააღმდეგე სერგეი შამბა დაამარცხა და ხმების 54.86%-ით აფხაზეთის რიგით მე-3 დე ფაქტო პრეზიდენტი გახდა. ანქვაბის ინაუგურაცია 2011 წლის 26 სექტემბერს შედგა.
დამატებითი ინფორმაცია
- 2005-2012 წლებში ალექსანდრე ანქვაბზე ექვსი თავდასხმა განხორციელდა, რის შედეგადაც იგი ორჯერ დაიჭრა. 2012 წლის 22 თებერვალს ანქვაბის საპრეზიდენტო კორტეჟზე განხორციელებული თავდასხმის გამოძიებაში რუსეთის ფედერაციის უსაფრთხოების სამსახური და საგამოძიებო კომიტეტი მონაწილეობდა. თავდასხმის სავარაუდო ორგანიზატორმა, აფხაზეთის დე ფაქტო რესპუბლიკის ყოფილმა უშიშროების საბჭოს მდივანმა, ყოფილმა შს მინისტრმა და ვლადისლავ არძინბას დაცვის ყოფილმა უფროსმა ალმასბეი კჩაჩმა თავი იმ დროს მოიკლა, როდესაც მისი აყვანის ოპერაცია მიმდინარეობდა. თვითმკვლელობით დაასრულა სიცოცხლე ასევე კიდევ ერთმა ეჭვმიტანილმა თემურ ხუტაბამ, რომელმაც წინასწარი დაკავების იზოლატორში თავი ჩამოიხრჩო.
- 2004 წელს ანქვაბმა ჟურნალისტებს განუცხადა: „აფხაზები თანხმდებიან, რომ გალის რაიონში დევნილები უნდა დაბრუნდნენ, იმიტომ, რომ ისინი დე ფაქტოდ უკვე დაბრუნდნენ. მაგრამ როდესაც გამოითქმის მოწოდებები დევნილების დაბრუნების შესახებ ოჩამჩირის, სოხუმის, გუდაუთის, გაგრის რაიონებსა და ქალაქებში, ეს ილუზიაა. ამის შესახებ უნდა იცოდნენ მოსკოვშიც და თბილისშიც და არც საკუთარი თავი მოიტყუონ და არც დევნილები. აფხაზური საზოგადოება ამას არ მიიღებს ... ეს არის დამოკიდებულება არა ქართველების მიმართ, არამედ აფხაზეთთან დაკავშირებით ქართული პოლიტიკის მიმართ, რომლის გვირგვინი 1992-1993 წლების ომი გახდა. აფხაზებს ქართველებისთვის ამის პატიება არ შეუძლიათ!“
- 2012 წლის 1 ოქტომბრის საპარლამენტო არჩევნებში „ქართული ოცნების“ გამარჯვების კომენტირებისას ალქსანდრე ანქვაბმა განაცხადა: „თუ ქართული ოცნება ეს არის აფხაზეთის დაბრუნება საქართველოს შემადგენლობაში, მაშინ ეს ილუზიური ოცნებაა. თუ ქართული ოცნება აფხაზეთთან კეთილმეზობლური და თანასწორუფლებიანი ურთიერთობების დამყარებაა, მაშინ ეს კარგი ოცნებაა.“
- საქართველოს საგარეო დაზვერვის სამსახური ყოფილი უფროსი ავთანდილ იოსელიანი, რომელიც 2007 წელს გარდაიცვალა, ანქვაბს შემდეგნაირად ახასიათებდა: „ჩვენ ერთად ვმუშაობდით... ომის დროს ანქვაბის წყალობით ბევრი აფხაზი და ქართველი გადარჩა. ამის დავიწყება შეიძლება? იგი ძალიან მოწესრიგებული, პატიოსანი, ვაჟკაცი ადამიანი და მკაცრი ხელმძღვანელია... მასთან ლაპარაკი ძალიან ძნელია, თუმცა თუ გაიგებს, რომ არ ატყუებ და ნორმალური ლაპარაკი მიგყავს, ყველაფერი კარგად ესმის.“
ლეონიდ ლაკერბაია
2011 წლის სექტემბრიდან აფხაზეთის დე ფაქტო პრემიერ-მინისტრი
ზოგადი მონაცემები
- ლეონიდ ლაკერბაია დაიბადა 1947 წლის 1 იანვარს ქ. ქუთაისში (სხვა მონაცემებით, ქ. გუდაუთაში).
- 1954 წელს სწავლა დაიწყო ქ. სენაკის სკოლაში. 1962 წელს დაამთავრა ქ. გუდაუთის #2-ე საშუალო სკოლის რვა კლასი.
- 1966-1968 წლებში სწავლობდა მოსკოვის ავტოსაგზაო ტექნიკუმში. 1975 წელს დაამთავრა მოსკოვის საავტომობილო-საგზაო ინსტიტუტი.
- 1975-1979 წლებში მუშაობდა ინჟინერად, ქ. გაგრაში, ავტოსატრანსპორტო ქარხანაში. 1979-1985 წლებში იყო სატვირთო ავტომობილების მწარმოებელი ქარხნის დირექტორი. 1985-1991 წლებში კი სწრაფადყინვადი პროდუქტების ექსპერიმენტული ქარხნის დირექტორი ქ. გაგრაში.
- ჰყავს მეუღლე და სამი შვილი.
პოლიტიკური კარიერა
- 1991 წელს ლეონიდ ლაკერბაია აფხაზეთის დე ფაქტო უზენაესი საბჭოს დეპუტატად აირჩიეს.
- 1992 წლის დეკემბრიდან 1995 წლის აპრილამდე მას აფხაზეთის დე ფაქტო მთავრობის პირველი ვიცე-პრემიერის თანამდებობა ეკავა, ხოლო 1995 წლის ივლისიდან 1996 წლის აგვისტომდე საგარეო საქმეთა მინისტრი იყო.
- 1998-2002 წლებში ლაკერბაია აფხაზეთის დე ფაქტო პარლამენტის წევრი იყო.
- ლეონიდ ლაკერბაია აფხაზეთის დე ფაქტო პრეზიდენტის, ალექსანდრე ანქვაბის მეგობარი და თანამებრძოლია. 2000 წელს მათ ერთად დააარსეს საზოგადოებრივ-პოლიტიკური მოძრაობა „აიტაირა“ („აღორძინება“), რომელიც ვლადისლავ არძინბას ოპოზიციაში ჩაუდგა. 2002 წელს ლეონიდ ლაკერბაია „აიტაირას“ თანათავმჯდომარე გახდა.
- 2005 წელს, სერგეი ბაღაფშის მიერ ალექსანდრე ანქვაბის პრემიერ-მინისტრად დანიშვნის შემდეგ, ლეონიდ ლაკერბაია დე ფაქტო მთავრობის პირველი ვიცე-პრემიერი გახდა.
- 2011 წლის საპრეზიდენტო არჩევნებში ლაკერბაია ალექსანდრე ანქვაბის საარჩევნო შტაბს ხელმძღვანელობდა. ანქვაბის გამარჯვების შემდეგ კი, 2011 წლის 27 სექტემბრიდან, ლეონიდ ლაკერბაიამ აფხაზეთის დე ფაქტო პრემიერ-მინისტრის თანამდებობა ჩაიბარა.
- ლაკერბაია ძირითადად ფინანსურ, ეკონომიკურ და სოციალურ საკითხებს კურირებს. იგი აქტიურად მონაწილეობს რუსეთ-აფხაზეთის სოციალურ-ეკონომიკური თანამშრომლობის სამთავრობოთაშორისო ჯგუფის შეხვედრებში, რომელიც პერიოდულად იმართება მოსკოვსა და სოხუმში.
- ლეონიდ ლაკერბაია სამკურნალო მიზნებით აფხაზების ზუგდიდსა და თბილისში ჩამოსვლას უარყოფითად აფასებს. 2012 წლის მიწურულს მან განაცხადა, რომ აფხაზეთის მთავრობამ „ყველაფერი გააკეთა საიმისოდ, რომ ეს ნაკადი შემცირებულიყო“ და ის ხალხი, ვისაც მკურნალობა ესაჭიროება, ქართული საავადმყოფოების ნაცვლად, რუსეთის და ისრაელის სამკურნალო დაწესებულებებში უნდა გაიგზავნონ.
- ალექსანდრე ანქვაბთან ერთად ლაკერბაია ასევე არის იმ მიდგომის თანაავტორი, რომელიც აფხაზეთის ტერიტორიაზე მოქმედი საერთაშორისო არასამთავრობო ორგანიზაციების მოქმედების არეალს ზღუდავს. კერძოდ, 2012 წელს ლაკერბაია რამდენჯერმე შეხვდა ჰუმანიტარული ორგანიზაციების წარმომადგენლებს, რომლებსაც მოსთხოვა, ამიერიდან პროექტები აფხაზეთის ხელისუფლებასთან შეეთანხმებინათ, ხოლო მოქმედების ზონად ორგანიზაციებს გალის რაიონი განუსაზღვრა, რასაც საბოლოო ჯამში ზოგიერთი არასამთავრობო ორგანიზაციის მხრიდან აფხაზეთის ტერიტორიაზე საქმიანობის სრულად შეწყვეტა მოჰყვა.
ინდირა ვარდანია აფხაზეთის დე ფაქტო პირველი ვიცე-პრემიერი
ზოგადი ინფორმაცია
- ინდირა ვარდანია დაიბადა 1962 წლის 4 ნოემბერს, ქ. გუდაუთაში.
- ადგილობრივი საშუალო სკოლის დამთავრების შემდეგ, 1979 წელს ჩააბარა საბჭოთა კავშირის ცენტრალური კომიტეტის კომკავშირის უმაღლეს სკოლაში ისტორიისა და კომუნისტური აღზრდის ფაკულტეტზე, რომელიც 1983 წელს ისტორიისა და საზოგადოებათმცოდნეობის მასწავლებლის სპეციალობით დაამთავრა.
პროფესიული კარიერა
- 1993-1995 წლებში ინდირა ვარდანია აფხაზეთის დე ფაქტო მინისტრთა საბჭოში სახელმწიფო მრჩევლად მუშაობდა, ხოლო 1995-2002 წლებში აფხაზეთის დე ფაქტო რესპუბლიკის მინისტრთა კაბინეტის რეფერანტი და უფროსი რეფერენტი იყო. 2002-2005 წლებში ასევე დე ფაქტო მინისტრთა კაბინეტში საბიუჯეტო ჰუმანიტარული ორგანიზაციების განყოფილებას ხელმძღვანელობდა. მის საკურატოროს წარმოადგენდა განათლების, მეცნიერების, კულტურის, სოციალური და ჯანმრთელობის დაცვის სფეროები.
- 2005 წლის 10 მარტიდან 2011 წლის ოქტომბრამდე ინდირა ვარდანია აფხაზეთის დე ფაქტო განათლების მინისტრი იყო. აღნიშნულ თანამდებობაზე მუშაობის პერიოდში საზოგადოების მხრიდან იგი არაერთხელ გამხდარა კრიტიკის ობიექტი.
- 2011 წლის 10 ოქტომბერს აფხაზეთის დე ფაქტო პრეზიდენტის ალექსანდრე ანქვაბის ბრძანებით, ინდირა ვარდანია აფხაზეთის დე ფაქტო პირველ ვიცე-პრემიერად დაინიშნა.
- აფხაზეთის დე ფაქტო პრემიერ-მინისტრის ლეონიდ ლაკერბაიას მიერ 2011 წლის 28 ოქტომბერს დამტკიცებული განკარგულების თანახმად, რომელიც პრემიერსა და ვიცე-პრემიერებს შორის ფუნქციათა განაწილებას ადგენს, ინდირა ვარდანიას საკურატოროდ შემდეგი საკითხები განისაზღვრა: აფხაზური ენა, მეცნიერება, რეპატრიაცია, განათლება, კულტურა, სოციალური და საპენსიო უზრუნველყოფა, ჯანდაცვა, ფარმაცევტული საქმიანობა, მასმედია, შემოქმედებითი გაერთიანებები და საზოგადოებრივი ორგანიზაციები. შესაბამისად, მისდამი დაქვემდებარებული უწყებებია განათლების, კულტურის, შრომის და სოციალური განვითარების, ჯანდაცვის სამინისტროები და ის „სახელმწიფო კომიტეტები“, რომლებიც ზემოთ ჩამოთვლილ სფეროებს მოიცავს; ასევე, აფხაზეთის „სახელმწიფო ტელევიზია“ და საინფორმაციო სააგენტო „აფსნიპრესი“.
- ინდირა ვარდანიას პირველ ვიცე-პრემიერად დანიშვნა აფხაზური საზოგადოებისა და პრესისათვის მოულოდნელობას წარმოადგენდა და მას არაერთგვაროვანი შეფასება მოჰყვა. ცნობილმა აფხაზმა ჟურნალისტმა ვიტალი შარიამ მისი სწრაფი კარიერული აღმასვლა წლის ფურორადაც კი მონათლა და მინისტრების ვირტუალურ ნომინაციაში ინდირა ვარდანიას „მის ფურორის“ წოდება მიანიჭა.
ბესლან ეშბა აფხაზეთის დე ფაქტო ვიცე-პრემიერი
ზოგადი ინფორმაცია
- ბესლან ეშბა დაიბადა 1967 წლის 23 დეკემბერს. ოფიციალურ ბიოგრაფიაში დაბადების ადგილი მითითებული არ არის.
- 1985 წელს დაამთავრა ქალაქ სოხუმის, ნესტორ ლაკობას სახელობის მე-10 საშუალო სკოლა, ხოლო 1992 წელს, საქართველოს სოფლის მეურნეობის ინსტიტუტი (ქ. სოხუმში) ინჟინერ-ტექნოლოგის სპეციალობით.
- 1998 წელს დაამთავრა სოხუმის ბიზნეს-სკოლა.
- 2008 წელს მოსკოვის საატესტაციო კომისიამ ბესლან ეშბას ეკონომიკურ მეცნიერებათა კანდიდატის სამეცნიერო ხარისხი მიანიჭა.
- ჰყავს მეუღლე და ორი შვილი.
სამხედრო კარიერა
- 1986-1988 წლებში ბესლან ეშბა მსახურობდა საბჭოთა კავშირის შეიარაღებულ ძალებში.
- 1992-1993 წლებში, აფხაზეთის ომის დროს, იყო აფხაზეთის დე ფაქტო სახელისუფლებო ორგანოების დაცვის სამსახურის წევრი.
- საბრძოლო მოქმედებების შემდეგ დაინიშნა სოხუმის ბატალიონის მეთაურის მოადგილედ.
- 2006 წელს იყო სოხუმის 4-ე ბრიგადის მეთაურის მოადგილე.
ეკონომიკური საქმიანობა
- ბესლან ეშბა არის მსხვილი აფხაზი ბიზნესმენი.
- ბესლან ეშბას ბიზნეს-კარიერა 1999 წლიდან იწყება, როდესაც იგი სახელმწიფო კომპანიად წოდებული „АБХАЗТОП“-ის გენერალური დირექტორად დაინიშნა. აღნიშნული თანამდებობა მას 2005 წლამდე ეკავა.
- სხვადასხვა დროს იგი იყო ფიჭური კომპანია „აკვაფონ-GSM”-ის დირექტორთა საბჭოს წევრი (2005 წლიდან), კომპანია „ინტერჰაივეის“ პრეზიდენტი (23/06/2005 – 11/09/2005), კომპანია „აფხაზეთის ნავთობპროდუქტების“ გენერალური დირექტორი (12/09/2005 – 29/08/2010), „აფხაზეთის სამთო-სამრეწველო კომპანიის“ გენერალური დირექტორი (06/07/2006 – 29/09/2010), „უნივერსალ ბანკის“ საბჭოს თავმჯდომარე (31/08/2007 – 01/03/2012). ასევე 2005 - 2008 წლებში ხელმძღვანელობდა საზოგადოებრივი მოძრაობა „საქმიანი რუსეთის“ აფხაზეთის განყოფილებას.
პოლიტიკური საქმიანობა
- 1994 წელს აფხაზეთის დე ფაქტო პრეზიდენტმა ვლადისლავ არძიმბამ ბესლან ეშბა „აფხაზეთის აღორძინების ფონდის“ მმართველად დანიშნა, რომელიც მოსკოვიდან აფხაზეთში ჰუმანიტარული ტვირთების ჩამოტანით იყო დაკავებული.
- 1996 წლის 2 თებერვლიდან 1999 წლის 26 თებერვლამდე ეშბა ეკონომიკურ საკითხებში პრეზიდენტის მრჩევლის ფუნქციას ასრულებდა.
- 2010 წლის 24 აგვისტოდან 2011 წლის 20 სექტემბრამდე იგი პრემიერ-მინისტრ სერგეი შამბას თანაშემწე იყო და ისრაელელ ბიზნესმენებთან კონტაქტების დამყარებას კურირებდა.
- 2011 წლის აპრილში ბესლან ეშბა სხვა აფხაზ ჩინოვნიკებთან ერთად ისრაელში ჩავიდა და ადგილობრივ ბიზნესმენებს შეხვდა. 2011 წლის 13-14 აპრილს, ეშბას ორგანიზებით, განხორციელდა ისრაელში არსებული ჰოლდინგის, „Global CST“-ის დამფუძნებლების, ისრაელის გენერალური შტაბის ოპერატიული მართვის ყოფილი უფროსის, ისრაელ ზივის და პრემიერ-მინისტრ ბენიამინ ნათანიაჰუს ყოფილი სამხედრო მრჩევლის, მეირ კლიფის შეხვედრა სერგეი ბაღაფშთან მოსკოვში და შემდგომ მათი გახმაურებული ვიზიტი სოხუმში, სადაც ისინი პრემიერ-მინისტრ სერგეი შამბას და ბესლან ეშბას შეხვდნენ. აღნიშნულ კონტაქტებს ოფიციალური თბილისის მხრიდან პროტესტი მოჰყვა.
- 2012 წლის 6 მაისს ბესლან ეშბამ, რომლის კანდიდატურა საინიციატივო ჯგუფმა წამოაყენა, სოხუმის #1-ლი საარჩევნო ოლქის განმეორებით არჩევნებში გაიმარჯვა (56.81%) და დეპუტატი გახდა.
- 2013 წლის 30 აპრილს ფახაზეთის დე ფაქტო პრეზიდენტის, ალექსანდრე ანქვაბის გადაწყვეტილებით, იგი აფხაზეთის ვიცე-პრემიერად დაინიშნა.
ნუგზარ აშუბა აფხაზეთის დე ფაქტო უშიშროების საბჭოს მდივანი
ზოგადი მონაცემები
- ნუგზარ აშუბა დაიბადა 1952 წლის 2 მარტს ოჩამჩირის რაიონის სოფელ გვადაში.
- 1976 წელს დაამთავრა საქართველის პოლიტექნიკური ინსტიტუტი. მუშაობდა ოჩამჩირის კავშირგაბმულობაში ინჟინრად.
- ყავს მეუღლე და ორი შვილი.
პოლიტიკური კარიერა
- 1976-1986 წლებში ეწეოდა პარტიულ საქმიანობას. იყო ოჩამჩირის რაიკომის პირველი მდივანი. მოგვიანებით დაინიშნა საქართველოს კომკავშირის აფხაზეთის საოლქო კომიტეტის პირველ მდივნად.
- 1984-1990 წლებში ნუგზარ აშუბა აფხაზეთის უზენაესი საბჭოს დეპუტატი იყო.
- 1986-1992 წლებში - აფხაზეთის კულტურის მინისტრი.
- 1992-1995 წლებში აშუბა რეპატრიაციის საქმეთა სახელმწიფო კომიტეტს ხელმძღვანელობდა.
- 1995 წლიდან ეწეოდა ბიზნეს-საქმიანობას რუსეთში.
- 1999 წელს გუდაუთის ჩაის ფაბრიკის, „ბელან“-ის დირექტორი გახდა.
- 2002 წელს ნუგზარ აშუბა დე ფაქტო პარლამენტის თავმჯდომარედ აირჩიეს. 2007 წელს იგი ამ თანამდებობაზე მეორედ აირჩიეს.
- 2011 წლის 26 ივლისიდან 28 აგვისტომდე, სერგეი ბაღაფშის გარდაცვალების გამო, ნუგზარ აშუბა აფხაზეთის დე ფაქტო პრეზიდენტის მოვალეობას ასრულებდა.
- 2012 წლის საპარლამენტო არჩევნებში ნუგზარ აშუბა, რომელიც ოჩამჩირის რაიონის #27-ე საარჩევნო ოლქში იყრიდა კენჭს, სამხედრო ჰოსპიტალის ქირურგის და ყოფილი ჯანდაცვის მინისტრის აპოლონ (დაურ) გურგულიას წინააღმდეგ დამარცხდა და V მოწვევის პარლამენტში ვერ მოხვდა.
- 2013 წლის 30 ოქტომბერს დე ფაქტო პრეზიდენტმა ალექსანდრე ანქვაბმა ნუგზარ აშუბა უშიშროების საბჭოს მდივნად დანიშნა. აშუბამ ამ თანამდებობაზე სტანისლავ ლაკობა შეცვალა მას შემდეგ რაც ლაკობა თანამდებობიდან გაანთავისუფლეს გალის რაიონის მოსახლეობის პასპორტიზაციის საკითხზე პრეზიდენტთან წარმოქმნილი უთანხმოების გამო.
- 2014 წლის იანვარში ნუგზარ აშუბა გაერთიანდა სახელისუფლებო პარტია „ამცახარაში“. „ამცახარა“ აფხაზეთის ომის ვეტერანთა გაერთიანებას წარმოადგენდა, თუმცა 2013 წლის 27 ივნის ის პოლიტიკურ პარტიად გარდაიქმნა.
ოთარ ხეცია მილიციის გენერალ-მაიორი, დე-ფაქტო შინაგან საქმეთა მინისტრი
ზოგადი მონაცემები
- ოთარ ხეცია დაიბადა 1965 წლის 19 თებერვალს ქ. გაგრაში.
- 1982 წელს დაამთავრა ქ. გაგრის #5-ე საშუალო სკოლა. 1987 წელს - ხარკოვის ავტო-სატრანსპორტო ტექნიკუმი, ხოლო 1996 წელს, ბელორუსიის შს სამინისტროს აკადემია.
- 1984-1986 წლებში მსახურობდა საბჭოთა არმიის რიგებში.
- 1986 წლიდან მუშაობს შინაგან საქმეთა ორგანოებში. ეკავა ქალაქ სოხუმის შს სამმართველოს უფროსის თანამდებობა.
პოლიტიკური კარიერა
- 2005 წლის 28 თებერვალს, აფხაზეთის დე ფაქტო პრეზიდენტის, სერგეი ბაღაფშის ბრძანებით, ოთარ ხეცია აფხაზეთის შს მინისტრად დაინიშნა.
- 2008 წელს ოთარ ხეციას მილიციის გენერალ-მაიორის წოდება მიენიჭა.
- ოთარ ხეცია ყოველთვის მკაცრი ადამიანის რეპუტაციით სარგებლობდა. თუმცა მძიმე კრიმინოგენური ვითარების გამო მის წინააღმდეგ კრიტიკა ხშირად ისმოდა.
- 2010 წლის 12 აგვისტოს ოთარ ხეცია შს მინისტრის თანამდებობიდან საკუთარი განცხადების საფუძველზე იქნა გადაყენებული.
- იმავე წლის ოქტომბერში ხეცია უშიშროების საბჭოს მდივნად დაინიშნა.
- 2011 წლის ოქტომბრიდან კი ალექსანდრე ანქვაბის მიერ კვლავ შს მინისტრად იქნა გადაყვანილი.
დამატებითი ინფორმაცია
- ოთარ ხეციას ყავს მეუღლე და სამი შვილი.
- ხეცია არის აფხაზეთის ომის მონაწილე და 1994 წლის 27 სექტემბერს მინიჭებული აქვს „აფხაზეთის გმირის“ წოდება.
ალექსანდრე სტრანიჩკინი აფხაზეთის დე ფაქტო ვიცე-პრემიერი
ზოგადი მონაცემები
- ალექსანდრე სტრანიჩკინი დაიბადა 1955 წლის 5 აპრილს ქ. ჩიტაში, რუსეთი. აფხაზეთში ცხოვრობს 1968 წლიდან.
- 1972 წელს დაამთავრა ქვემო ეშერის საშუალო სკოლა. 1973 წელს მუშაობა დაიწყო კინოთეატრ „აფსნი“–ში მექანიკოსის მოსწავლედ, მოგვიანებით კი სოხუმის თევზსაჭერ კოლმეურნეობაში.
- 1983 წელს დაამთავრა როსტოვის ეკოლოგიური სახელმწიფო უნივერსიტეტის ეკონომიკის ფაკულტეტი. 1983–1989 წლებში ასწავლიდა პოლიტეკონომიას აფხაზეთის სახელმწიფო უნივერსიტეტში. 1989 წელს პოლიტეკონომიის კათედრის მასწავლებლად აირჩიეს. 1995–2005 წლებში ეკონომიკური თეორიის კათედრის უფროს მასწავლებლად მუშაობდა. 2005 წლიდან კათედრაზე დოცენტის მოვალეობას ასრულებს.
- 1984–1989 წლებში სახელმწიფო სტატისტიკის სამმართველოს სოხუმის საქალაქო განყოფილებაში ეკონომისტად მუშაობდა. 1994–1997 წლებში აფხაზეთის დე ფაქტო რესპუბლიკის ეკონომიკის სამინისტროში სხვადასხვა თანამდებობებზე მუშაობდა. აფხაზეთის მასშტაბით ცნობილი ეკონომისტია. გამოქვეყნებული აქვს სამეცნიერო პუბლიკაციები და არის ეკონომიკურ თეორიაში სასწავლო წიგნების თანაავტორი.
პოლიტიკური კარიერა
- 1996 წელს აფხაზეთის დე ფაქტო პარლამენტის წევრი გახდა, სადაც საბიუჯეტო და ეკონომიკური პოლიტიკის კომიტეტის თავმჯდომარის მოადგილის პოსტზე მოღვაწეობდა.
- 2002 წელს კვლავ აირჩიეს დე ფაქტო პარლამენტის დეპუტატად. ალექსანდრე სტრანიჩკინმა ვიცე–სპიკერის პოსტი დაიკავა.
- 2006 წლის 10 მარტს აფხაზეთის დე ფაქტო მთავრობაში ვიცე–პრემიერის პოსტზე დაინიშნა.
- 2011 წლის 10 ოქტომბერს ახალი მთავრობის ფორმირების დროს კვლავ ვიცე–პრემიერად დაინიშნა. აფხაზეთის დე ფაქტო პრემიერ-მინისტრის ლეონიდ ლაკერბაიას მიერ 2011 წლის 28 ოქტომბერს დამტკიცებული განკარგულების თანახმად, რომელიც პრემიერსა და ვიცე-პრემიერებს შორის ფუნქციათა განაწილებას ადგენს, ალექსანდრე სტრანიჩკინის საკურატოროდ შემდეგი საკითხები განისაზღვრა: საგადასახადო და საბაჟო შემოსავლები, სატყეო მეურნეობა, სტატისტიკა, ტურიზმი, ენერგეტიკა, კავშირგაბმულობა, მოსახლეობის დასაქმების საკითხები, საკურატორო სფეროების მიხედვით ადგილობრივი მმართველობის ორგანოების მუშაობა და ნორმატიული აქტების მომზადება.
- 2013 წელს აფხაზეთში მოქმედი პარტია „ერთიანი აფხაზეთის“ წევრებმა, მისი ლიდერის, დაურ ტარბას ხელმძღვანელობით, ოპოზიციაში გადასვლის გადაწყვეტილება მიიღეს. პარტიამ 2011 წელს, საპრეზიდენტო არჩევნებში ალექსანდრე ანქვაბის კანდიდატურას დაუჭირეს მხარი, მაგრამ მათი აზრით, ალექსანდრე ანქვაბმა მათი იმედები ვერ გაამართლა. პარტიის ოპოზიციაში გადასვლის შემდეგ ალექსანდრე სტრანიჩკინმა პარტიის რიგები დატოვა.
სხვა საქმიანობა
- 2011 წელს აფხაზეთში ჩატარებული დომინოს მსოფლიო ჩემპიონატის საორგანიზაციო კომიტეტის თავმჯდომარე იყო. ჩემპიონატმა, სადაც მსოფლიოს სხვადასხვა ქვეყნის წარმომადგენლებიც მონაწილეობდნენ, თბილისის მხრიდან პროტესტი გამოიწვია.
- 2012 წელს ალექსანდრე სტრანიჩკინი რუსეთ–აფხაზეთის ურთიერთობების განვითარებაში შეტანილი წვლილისთვის „2012 წლის თანამემამულის“ რუსული პრემიით დააჯილდოვეს. დაჯილდოვების ცერემონია 2012 წლის 13 დეკემბერს მოსკოვში გაიმართა. პრემია უცხოეთში მცხოვრები გამოჩენილი რუსებისათვის რუს თანამემამულეთა საერთაშორისო საბჭომ და მოსკოვის მთავრობამ 2002 წელს დააწესეს.
აფხაზეთის რუსული თემი
- ალექსანდრე სტრანიჩკინი საზოგადოებრივი გაერთიანებების ასოციაციის „აფხაზეთის რესპუბლიკის რუსული თემის“ თავმჯდომარეა.
- 2012 წლის 19 ივლისს სოხუმში გაიმართა აფხაზეთის რუსული თემების ორგანიზაციების პირველი საყოველთაო კონფერენცია. კონფერენციის ორგანიზატორი იყო საზოგადოებრივი გაერთიანებების ასოციაციის „აფხაზეთის რესპუბლიკის რუსული თემი“, რომელსაც მხარს უჭერდა აფხაზეთში რუსეთის საელჩო და „Россотрудничество“–ს წარმომადგენელი. კონფერენციაში აფხაზეთის ყველა რაიონის 15 რუსული თემის 44 წარმომადგენელი მონაწილეობდა. კონფერენციაზე რუსი თანამემამულეების საკოორდინაციო საბჭო დაარსდა, რომლის პირველ თავმჯდომარედაც ალექსანდრე სტრანიჩკინი აირჩიეს.
- ალექსანდრე სტრანიჩკინი რუს თანამემამულეთა საერთაშორისო საბჭოს მმართველი ორგანოს წევრია. საბჭოს პირველი კონგრესი 2001 წელს ჩატარდა.
- აფხაზეთის რუსულ თემში ბოლო წლებში შიდა დაპირისპირება შეიმჩნევა. ალექსანდრე სტრანიჩკინს მწვავედ აკრიტიკებენ მისი ოპონენტები, რომ იგი სათანადოდ არ რეაგირებს აფხაზეთში მცხოვრები სლავური წარმოშობის ადამიანების ქონებისა და ბიზნესის სფეროში შექმნილ პრობლემებზე. ამ მხრივ, განსაკუთრებულ მწვავედ მიიჩნევა, ე.წ. საბინაო საკითხი.
- ალექსანდრე სტრანიჩკინს განსაკუთრებით აკრიტიკებს აფხაზეთში რუსეთის თანამემამულეების რუსული თემების კონგრესის ხელმძღვანელი გენადი ნიკიტჩენკო, 1992–1993 წლების აფხაზეთის ომის გმირი. გენადი ნიკიტჩენკოს შეფასებით, აფხაზეთში რუსული თემის გახლეჩვას ცდილობენ და ამ საქმეში ალექსანდრე სტრანიჩკინს უშუალოდ უჭერს მხარს აფხაზეთში მოქმედი რუსეთის საელჩო. მისი განცხადებით, ალექსანდრე სტრანიჩკინს ორი შეუთავსებელი თანამდებობა უკავია – ვიცე–პრემიერის და საკოორდინაციო საბჭოს თავმჯდომარის.
ასლან ბჟანია აფხაზეთის დე ფაქტო სახელმწიფო უშიშროების სამსახურის უფროსი
ზოგადი მონაცემები
- ასლან ბჟანია დაიბადა 1963 წლის 6 აპრილს ოჩამჩირის რაიონის სოფელ ტამიშში.
- 1980 წელს დაამთავრა ტამიშის საშუალო სკოლა, ხოლო 1985 წელს - მოსკოვის საავტომობილო-საგზაო ინსტიტუტი.
- 1985-1986 წლებში მუშაობდა სმოლენსკის ოლქის სატყეო მეურნეობაში, კაპიტალური მშენებლობების სამმართველოში.
- 1987-1989 წლებში მუშაობდა ოჩამჩირის რაიკომში, ახალგაზრდა კომუნისტთა კავშირში.
- 1998 წელს დაამთავრა რუსეთის პრეზიდენტთან არსებული სახალხო მეურნეობის აკადემია.
კარიერა
- 1991 წელს ბჟანიამ საბჭოთა კავშირის სახელმწიფო უშიშროების კომიტეტის („კგბ“) უმაღლესი კურსები გაიარა.
- 1991-1992 წლებში მუშაობდა აფხაზეთის უშიშროების კომიტეტში, ხოლო 1992-1993 წლებში -აფხაზეთის სახელმწიფო უშიშროების სამსახურში.
- 1994 წელს ბჟანია საცხოვრებლად მოსკოვში გადავიდა და კომერციული საქმიანობა დაიწყო.
- 2009-2010 წლებში იგი რუსეთში აფხაზეთის საელჩოს ეკონომიკურ საკითხებში მრჩეველი იყო.
- 2010 წლის 24 თებერვალს აფხაზეთის დე ფაქტო პრეზიდენტმა სერგეი ბაღაფშმა ბჟანია სახელმწიფო უშიშროების სამსახურის უფროსად დანიშნა.
- ბჟანიამ აღნიშნული თანამდებობა 2011 წლის საპრეზიდენტო არჩევნების შემდეგაც შეინარჩუნა. 2011 წლის სექტემბერში ალექსანდრე ანქვაბმა იგი ახალი მინისტრთა კაბინეტის შემადგენლობაში შეიყვანა და სახელმწიფო უშიშროების სამსახური ჩააბარა.
სხვა ინფორმაცია
- ასლან ბჟანია არის 2013 წლის 7 მაისს ანქვაბის განკარგულებით შექმნილი კომისიის წევრი, რომელიც გალისა და ტყვარჩელის რაიონებში მცხოვრები ეთნიკური ქართველებისათვის აფხაზეთის მოქალაქეობის მინიჭების და მათზე აფხაზური პასპორტების გაცემის საკითხს შეისწავლა. 2013 წლის 13 მაისს კომისიამ აღნიშნულ რაიონებში მცხოვრებთათვის მოქალაქეობის მინიჭების პროცესი შეაჩერა, ხოლო 17 მაისს ალექსანდრე ანქვაბმა შინაგან საქმეთა და უშიშროების მინისტრებს საგანგებოდ დაავალა ე.წ პასპორტიზაციის საკითხზე მომუშავე საპარლამენტო კომისიის მხარდაჭრა და ინფორმირება.
- 2011 წლის 8 აპრილს გალის რაიონის სოფელ ჭუბურხინჯში მომხდარი შეტაკება, რომელიც რუსი მესაზღვრეებისა და აფხაზი ძალოვნების მიერ ერთ-ერთი მიტოვებული სახლის შემოწმებას მოყვა, ასლან ბჟანიამ ქართულ სპეცსამსახურებს დააბრალა. როგორც მან განაცხადა, შეტაკება, რომელსაც რუსეთის ფედერაციის საზღვრის დაცვის სამსახურის ოფიცრის სიცოცხლე შეეწირა, საქართველოს შს სამინისტროს კონსტიტუციური უსაფრთხოების დეპრტამენტის ზუგდიდის სამმართველოს მიერ იყო ინსპირირებული.
მერაბ ქიშმარია აფხაზეთის დე ფაქტო თავდაცვის მინისტრი
ზოგადი მონაცემები
მერაბ ქიშმარია დაიბადა 1961 წლის 3 აგვისტოს ოჩამჩირის რაიონის სოფელ ჯალში.
1978 წელს დაამთავრა ოჩამჩირის საშუალო სკოლა და სწავლა დაიწყო ტყვარჩელის პროფესიულ-ტექნიკურ სასწავლებელში.
იმავე წლის 20 ოქტომბერს საბჭოთა ჯარში გაიწვიეს. მსახურობდა თურქმენეთში.
სამხედრო კარიერა და საბრძოლო გამოცდილება ავღანეთში
1984 წელს მერაბ ქიშმარიამ დაამთავრა ალმა-ატის უმაღლესი სამხედრო-სამეთაურო სასწავლებელი.
1987-1989 წლებში მსახურობდა ავღანეთში, საბჭოთა კავშირის შეიარაღებული ძალების მე-40 არმიის შემადგენლობაში ასმეთაურად და მოტომსროლელი ბატალიონის მეთაურის მოადგილედ.
მიღებული აქვს მონაწილეობა 16 საბრძოლო ოპერაციაში - ყანდაღარში, ჰერათში, ჯალალაბადსა და ავღანეთის სხვა ცხელ წერტილებში. 1988 წელს დაჯილდოვდა წითელი ვარსკვლავის ორდენით და ავღანეთის 2-ე ხარისხის ვარსკვლავით.
1988 წლის აპრილში ქიშმარია ყანდაღარის მახლობლად ორჯერ დაიჭრა, რის შემდეგაც სამხედრო სამსახური თურქმენეთის სამხედრო ოლქში, მე-40 საერთო საჯარისო არმიის 5-ე მოტომსროლელ დივიზიაში განაგრძო.
სამხედრო-პოლიტიკური კარიერა აფხაზეთში
1989 წლის 21 სექტემბერს მერაბ ქიშმარია აფხაზეთის ავტონომიურ რესპუბლიკაში, კერძოდ ოჩამჩირის სამხედრო კომისარიატში გაანაწილეს.
1992-1993 წლებში იყო აფხაზეთის ავტონომიური რესპუბლიკის ოჩამჩირის რაიონის აღმასრულებელი კომიტეტის შინაგან საქმეთა სამმართველოს საზოგადოებრივი წესრიგის დაცვის განყოფილების უფროსი. საბრძოლო მოქმედებების დაწყებისთანავე იგი ჯერ სამხედრო შტაბის მეთაურად დაინიშნა, ხოლო შემდეგ აღმოსავლეთ ფრონტის სარდალი იყო. 1996 წელს ქიშმარიას აფხაზეთის გმირის წოდება მიენიჭა.
ომის შემდეგ, მერაბ ქიშმარია იყო აფხაზეთის დე ფაქტო თავდაცვის მინისტრის მოადგილე საბრძოლო მომზადების დარგში და აფხაზეთის სამხედრო კომისარი.
2005-2007 წლებში ქიშმარია თავდაცვის მინისტრის პირველი მოადგილე იყო, ხოლო 2007 წლის 6 ივნისს სერგეი ბარაფშმა იგი დე ფაქტო თავდაცვის მინისტრად დანიშნა.
2011 წლის საპრეზიდენტო არჩევნებში ქიშმარიამ ღიად დაუჭირა მხარი ალექსანდრე ანქვაბის კანდიდატურას. 2011 წლის 11 ოქტომბერს ახალი მთავრობის ფორმირებისას დე ფაქტო პრეზიდენტმა ალექსანდრე ანქვაბმა ქიშმარია კვლავ თავდაცვის მინისტრის თანამდებობაზე დაამტკიცა.
დამატებითი ინფორმაცია
მერაბ ქიშმარიას მეუღლე ეთნიკური ქართველია. მათ თერთმეტი შვილი ყავდათ. შვიდი მათგანი აფხაზეთის ომში იბრძოდა, რომელთაგან ორი საბრძოლო მოქმედებების დროს დაიღუპა.
საქართველოს პირველი პრეზიდენტის ზვიად გამსახურდიას გარდაცვალებასთან დაკავშირებული გარემოებების შემსწავლელი დროებითი საპარლამენტო კომისიის დასკვნით დოკუმენტში ვკითხულობთ, რომ 1993 წელს, დევნილობაში მყოფმა ზვიად გამსახურდია ოჩამჩირის რაიონში მერაბ ქიშმარიას სახლში იმყოფებოდა, სადაც მას აფხაზეთის დამოუკიდებლობის აღიარების სანაცვლოდ ედუარდ შევარდნაძის წინააღმდეგ სამხედრო დახმარებას ჰპირდებოდნენ, რაზეც გამსახურდიამ უარი განაცხადა.
მერაბ ქიშმარიას ძმა, რუსლან ქიშმარია წლების მანძილზე გალის რაიონში აფხაზეთის დე ფაქტო პრეზიდენტის სრულუფლებიანი წარმომადგენელი იყო.
ვიაჩესლავ ჩირიკბა აფხაზეთის დე ფაქტო საგარეო საქმეთა მინისტრი
ზოგადი ინფორმაცია
- ვიაჩესლავ ჩირიკბა დაიბადა 1959 წლის 17 მარტს ქ. გაგრაში, საქართველოს საბჭოთა სოციალისტურ რესპუბლიკაში, აფხაზეთი სსარ.
- 1966-1976 წლებში დაამთავრა ქ. გაგრის #5-ე საშუალო სკოლა.
- 1977-1982 წლებში სწავლობდა ხარკოვის სახელმწიფო უნივერსიტეტში, უცხო ენათა ფაკულტეტზე.
- ჰყავს მეუღლე და სამი შვილი.
პოლიტიკური საქმიანობა
- 1993-1994 წლებში, ვიაჩესლავ ჩირიკბა ჟენევაში გაეროს ეგიდით მიმდინარე მოლაპარაკებებში მონაწილეობდა.
- 1993-1998 წლებში იყო აფხაზეთის დე ფაქტო სრულუფლებიანი წარმომადგენელი დასავლეთ ევროპის ქვეყნებში, 1998 წელს - აფხაზეთის დე ფაქტო საგანგებო ელჩი დასავლეთ ევროპის ქვეყნებში.
- 2005 წელს ჩირიკბა არაღიარებული ხალხების ორგანიზაციის აღმასრულებელი კომიტეტის წევრად აირჩიეს.
- 2007-2008 წლებში იგი იყო აფხაზეთის დე ფაქტო პრეზიდენტის, სერგეი ბაღაფშის მრჩეველი საგარეო პოლიტიკის საკითხებში.
- 2010-2011 წლებში, საგარეო საქმეთა მინისტრად დანიშვნამდე, იყო აფხაზეთის დე ფაქტო პრეზიდენტის სრულუფლებიანი წარმომადგენელი ჟენევის დისკუსიებში.
- 2011 წლის 11 ოქტომბერს ალექსანდრე ანქვაბის გადაწყვეტილებით, ვიაჩესლავ ჩირიკბა აფხაზეთის დე ფაქტო რესპუბლიკის საგარეო საქმეთა მინისტრად დაინიშნა.
სამეცნიერო საქმიანობა
- პოლიტიკის გარდა, ჩირიკბა ცნობილია თავისი აქტიური სამეცნიერო საქმიანობით. მისი სამეცნიერო კარიერა რუსეთის მეცნიერებათა აკადემიის ენათმეცნიერების ინსტიტუტიდან იწყება, სადაც ასპირანტურის დამთავრების შემდეგ (1986,) ამავე ინსტიტუტის მეცნიერ-მუშაკად იგი 1991 წლამდე მუშაობდა.
- 1991-1996 წლებში ჩირიკბამ ლეიდენის შედარებითი ლინგვისტიკის უნივერსიტეტის (ნიდერლანდები) დოქტორანტურა დაამთავრა. 2000-2004 წლებში ამავე უნივერსიტეტში ლექციებს კითხულობდა აფხაზურის ენის გრამატიკასა და ქართული ენის გრამატიკაში, ხოლო 2005-2006 წლებში ასირიოლოგიის ფაკულტეტზე კავკასიურ ენებს ასწავლიდა.
- 1996-1997 წლებში, როგორც მიწვეული მკვლევარი „ქართულ-აფხაზური კონფლიქტის“ თემაზე, მუშაობდა კლინგენდალის საერთაშორისო ურთიერთობების სამეფო ინსტიტუტში (ჰააგა, ნიდერლანდები).
- 2007 წელს ჩირიკბა დიმიტრი გულიას სახელობის აფხაზეთის ჰუმანიტარულ მეცნიერებათა ინსტიტუტში პოლიტოლოგიისა და კონფლიქტოლოგიის განყოფილებას ხელმძღვანელობდა. 2007-2010 წლებში კი, ლექციებს კითხულობდა აფხაზეთის სახელმწიფო უნივერსიტეტში აფხაზურ ენასა და საერთაშორისო ურთიერთობების თეორიასა და ისტორიაში.
- ვიაჩესლავ ჩირიკბა არის რუსეთის მეცნიერებათა აკადემიის ენათმეცნიერების ინსტიტუტის კავკასიურ ენათა სექტორის წამყვანი მეცნიერ-თანამშრომელი, კავკასიოლოგთა ევროპული საზოგადოების წევრი და პრეისტორიულ ენათა კვლევის საერთაშორისო ასოციაციის წევრი.
- სხვადასხვა დროს ვიაჩესლავ ჩირიკბა იყო გაზეთ „ალაშარა“-ს რედაქტორი (1989-1990), ჟურნალ „Caucasian Review“-ს თანარედაქტორი (1994-1995 წლები. ლეიდენი, ნიდერლანდები), ელექტრონული ჟურნალის „აფხაზური ბიულეტენის“ რედაქტორი (1998-2001 წლები. ჰააგა, ნიდერლანდები). ასევე მან დააფუძნა და ხელმძღვანელობდა „აფხაზეთის შესახებ ინფორმაციისა და დოკუმენტაციის საერთაშორისო ცენტრს“.
დამატებითი ინფორმაცია
- ვიაჩესლავ ჩირიკბას განცხადებით, იგი თბილისში უკანასკნელად XX საუკუნის 70-იანი წლების ბოლოს იყო. ქართველებიდან მას კარგი ურთიერთობები აკავშირებდა აღმოსავლეთმცოდნე ირაკლი მაჭავარიანთან და პოლიტოლოგ პაატა ზაქარეიშვილთან, რომელიც ამჟამად რეინტეგრაციის საკითხებში სახელმწიფო მინისტრია.
- 2012 წლის ივნისში ვიაჩესლავ ჩირიკბას ინტერვიუს იტალიურ გამოცემა „LIMES“-თან პოლიტიკური ხმაური მოჰყვა. „LIMES“-ის თანახმად, ჩირიკბამ განაცხადა, რომ აფხაზებს „უფრო პრაგმატული თანამოსაუბრეები სჭირდებათ, როგორებიც არიან ირაკლი ალასანია ან ოლიგარქი ბიძინა ივანიშვილი. ივანიშვილი საქმიანი ადამიანია და შესაძლოა, საკმაოდ პრაგმატულიც, რომელიც გაიგებს, როგორი გადაწყვეტილებაა მომგებიანი ყველასთვის.“ მოგვიანებით ჩირიკბამ განაცხადა, რომ იტალიურმა გაზეთმა მისი სიტყვები დაამახინჯა და საუბრის მხოლოდ გამარტივებული შინაარსი გადმოსცა.
- 2012 წლის 18 აპრილს ვიაჩესლავ ჩირიკბამ განაცხადა, რომ აშშ-ი სახელმწიფო მდივნის დონეზე აშანტაჟებს და ემუქრება იმ ქვეყნებს, რომლებსაც აფხაზეთის და „სამხრეთ ოსეთის“ აღიარება სურთ. მისივე თქმით, 2008 წელს ევროკავშირის მხრიდან მუქარის ობიექტები გახდნენ ბელორუსია, ყაზახეთი, ყირგიზეთი და სხვა ქვეყნები.
საფარბეი მიქანბა აფხაზეთის დე ფაქტო გენერალური პროკურორი
ზოგადი მონაცემები
- საფარბეი მიქანბა დაიბადა 1961 წლის 9 აპრილს ქ. ახალ ათონში.
- 1978 წელს დაამთავრა ახალი ათონის საშუალო სკოლა.
- 1979-1981 წლებში მსახურობდა საბჭოთა არმიის რიგებში.
- 1981-1986 წლებში სწავლობდა სოხუმის სახელმწიფო უნივერსიტეტში ისტორია-იურიდიულ ფაკულტეტზე.
- საფარბეი მიქანბას ჰყავს მეუღლე და ორი შვილი
პროფესიული კარიერა
- 1987 წელს საფარბეი მიქანბა სტაჟირებას გადიოდა ქ. სოხუმისა და ქ. ტყვარჩელის პროკურატურებში.
- 1988 წელს დაინიშნა ქ. ტყვარჩელის პროკურატურის გამომძიებლად. 1990 წლის აპრილში გადაიყვანეს ტყვარჩელის პროკურორის თანაშემწედ, ხოლო იმავე წლის ნოემბერში ქ. ტყვარჩელის პროკურორად დაინიშნა და ამ თანამდებობაზე 1993 წლის ოქტომბრამდე მუშაობდა.
- 1993 წლის ოქტომბერში მიქანბა სოხუმის რაიონის პროკურორად დაინიშნა.
- 2001 წლის 12 ნოემბრიდან 2007 წლამდე იგი აფხაზეთის დე ფაქტო რესპუბლიკის გენერალური პროკურორის მოადგილე იყო, ხოლო 2007 წლის 7 თებერვალს დე ფაქტო პარლამენტმა მიქანბა, ხუთი წლის ვადით, აფხაზეთის მთავარ პროკურორად დაამტკიცა.
- 2012 წლის თებერვალში, დე ფაქტო პრეზიდენტის ალექსანდრე ანქვაბის წარდგინებით, საფარბეი მიქანბა პარლამენტმა ხელმეორედ დაამტკიცა აფხაზეთის დე ფაქტო მთავარ პროკურორად. აღსანიშნავია რომ პარლამენტის 2011 წლის 11 მაისის რეგლამენტის მიუხედავად, რომელიც საკადრო საკითხების ფარული ხმის მიცემის გზით გადაწყვეტას ითვალისწინებს, კენჭისყრა, დეპუტატების მოთხოვნით, ღიად შედგა და მიქანბას კანდიდატურა მთავარი პროკურორის თანამდებობაზე ერთსულოვნად იქნა მხარდაჭერილი.
დამატებითი ინფორმაცია
- საფარბეი მიქანბა ხელმძღვანელობს აფხაზეთის დე ფაქტო სამართალდამცავი ორგანოების საკოორდინაციო სხდომებს, რომელიც ძალოვანი უწყებების სამოქმედო პრიორიტეტებს განსაზღვრავს.
- იგი იყო სახელმწიფო კომისიის წევრი, რომელიც გალისა და ტყვარჩელის რაიონებში მცხოვრებ ქართველებზე აფხაზური პასპორტების გაცემის პროცესის იურიდიულ ნორმებთან შესაბამისობას სწავლობდა.
ეკატერინა ონიშჩენკო აფხაზეთის დე ფაქტო იუსტიციის მინისტრი
ზოგადი მონაცემები
- ეკატერინა ონიშჩენკო დაიბადა 1978 წელს, დნეპროძერჟინსკში, დნეპროპეტროვსკის ოლქი, უკრაინა.
- 2000 წელს დაასრულა აფხაზეთის სახელმწიფო უნივერსიტეტის ისტორია–იურიდიული ფაკულტეტი.
- 2000 წელს ასწავლიდა მილიციის საშუალო სპეციალურ სკოლაში.
- 2000–2007 წლებში მუშაობდა გამომძიებლად, გულრიფშის შინაგან საქმეთა რაიონული განყოფილების საგამოძიებო ნაწილის უფროსად.
- 2007 წლის თებერვლიდან სოხუმის საქალაქო სასამართლოს მოსამართლეა.
- ჰყავს მეუღლე და ერთი შვილი.
პოლიტიკური კარიერა
- 2011 წლის 31 ოქტომბერს დაინიშნა იუსტიციის მინისტრად.
სხვა ინფორმაცია
- აფხაზურ მედიაში ეკატერინა ონიშჩენკოს სახელმა 2010 წელს გაიჟღერა გაგრაში მოქმედი სავაჭრო ცენტრის „კონტინენტის“ მფლობელის, იგორ ვაროვის საქმეზე, როდესაც ონიშჩენკომ, სოხუმის საქალაქო სასამართლოს მოსამართლის რანგში, ვაროვისთვის პატიმრობის მისჯის შესახებ გადაწყვეტილება ბრალდებულისა და მისი ადვოკატის დაუსწრებლად გამოიტანა. სასამართლოს მსგავსი გადაწყვეტილება აფხაზურმა მედიამ შეაფასა, როგორც ჩინოვნიკების მცდელობა იგორ ვაროვისთვის ბიზნესი წაერთმიათ.
ვლადიმერ დელბა აფხაზეთის დე ფაქტო ფინანსთა მინისტრი და ვიცე-პრემიერი
ზოგადი მონაცემები
- ვლადიმერ დელბა დაიბადა 1974 წლის 26 სექტემბერს ქ. სოხუმში.
- დაამთავრა აფხაზეთის სახელმწიფო უნივერსიტეტი. შემდეგ სწავლობდა ლომონოსოვის სახელობის მოსკოვის სახელმწიფო უნივერსიტეტის ანალიზისა და აუდიტის ასპირანტურაში.
პოლიტიკური კარიერა
- ეკავა აფხაზეთის დე ფაქტო ფინანსთა მინისტრის მოადგილის თანამდებობა.
- 2011 წლის 10 ოქტომბერს დე ფაქტო პრეზიდენტმა ალექსანდრე ანქვაბმა იგი ფინანსთა მინისტრად და ვიცე-პრემიერად დანიშნა.
- 2013 წლის მაისში დე ფაქტო პრემიერ-მინისტრის ლეონიდ ლაკერბაის მიერ გამოცემული განკარგულების თანახმად, რომელიც პრემიერსა და ვიცე-პრემიერებს შორის ფუნქციათა განაწილების საკითხს ეხება, ვლადიმერ დელბას საკურატორო სფეროებად განისაზღვრა ფინანსური საკითხები და მშენებლობები. იგი კოორდინირებას უწევს დე-ფაქტო რესპუბლიკის შემდეგი უწყებების მუშაობას: კაპიტალური მშენებლობების სახელმწიფო სამმართველო, მშენებლობისა და არქიტექტურის სახელმწიფო სამმართველო, მიწათსარგებლობის და მიწათმოწყობის სახელმწიფო სამმართველო.
- როგორც თავად დელბამ 2011 წლის ოქტომბერში ჟურნალისტებთან საუბარში განმარტა, იგი მინისტრის მოადგილიდან ვიცე-პრემიერად დაწინაურებას არ მოელოდა. ცნობილი აფხაზი ჟურნალისტის ინალ ხაშიგის შეფასებით, ვიცე-პრემიერად დანიშვნის დროს, ვლადიმერ დელბა დადებითი განწყობით სარგებლობდა, როგორც ალექსანდრე ანქვაბის გარემოცვაში, ისე ოპოზიციურ წრეებში.
დავიდ ირადიანი აფხაზეთის დე ფაქტო ეკონომიკის მინისტრი
ზოგადი მონაცემები
- დავიდ ირადიანი დაიბადა 1979 წელს ქ. სოხუმში.
- 1985–1992 წლებში სწავლობდა ქ. სოხუმის N14 საშუალო სკოლაში, 1992–1996 წლებში კი, სწავლა ქ. მოსკოვში, N832 საშუალო სკოლაში გააგრძელა.
- 1996 წელს ჩააბარა გეოდეზიისა და კარტოგრაფიის მოსკოვის სახელმწიფო უნივერსიტეტის ეკონომიკისა და ტერიტორიების მართვის ფაკულტეტზე, რომელიც 2001 წელს „ქალაქის კადასტრის“ სპეციალობით დაამთავრა. 2001–2004 წლებში ამავე უნივერსიტეტის ასპირანტურაში სწავლობდა, სადაც 2004 წელს დაიცვა დისერტაცია თემაზე „რეკრეაციული მიწების საკადასტრო შეფასება“. მოიპოვა ტექნიკურ მეცნიერებათა კანდიდატის სამეცნიერო ხარისხი.
- 2005 წლიდან მუშაობდა აფხაზეთის დე ფაქტო მთავრობის აპარატში რეფერენტად ეკონომიკის საკითხებში, 2008–2010 წლებში კი, უფროს რეფერენტად.
- 2009 წელს რუსეთის სამართლის სკოლაში იურიდიულ ფაკულტეტზე ჩააბარა მეორადი უმაღლესი განათლების მიღების პროგრამის ფარგლებში.
პოლიტიკური კარიერა
- 2010–2011 წლებში აფხაზეთის დე ფაქტო ეკონომიკის მინისტრის მოადგილედ მუშაობდა.
- 2011 წლის 27 ოქტომბერს დაინიშნა აფხაზეთის დე ფაქტო მთავრობაში ეკონომიკის მინისტრად. მისი წინამორბედი კრისტინა ოზგანი პრეზიდენტის ადმინისტრაციის უფროსის მოადგილედ დაინიშნა. მისი დანიშვნის დროს ზოგიერთი ადგილობრივი და რუსული გამოცემა აღნიშნავდა რომ ეს პირველი შემთხვევა იყო როდესაც ასეთ მნიშვნელოვან თანამდებობაზე ადგილობრივი სომხური სათვისტომოს წარმომადგენელი ინიშნებოდა.
დაურ ნაჭყებია აფხაზეთის დე ფაქტო განათლების მინისტრი
ზოგადი მონაცემები
- დაურ ნაჭყებია დაიბადა 1960 წლის 24 ივლისს, ოჩამჩირის რაიონის სოფ. პაკუაშში.
- სწავლობდა სოხუმის N1 სკოლა–ინტერნატში.
- 1982 წელს დაამთავრა თბილისის სახელმწიფო უნივერსიტეტის ფიზიკის ფაკულტეტი.
- 1983–1984 წლებში აფხაზეთის სახელმწიფო უნივერსიტეტში ზოგადი ფიზიკის კათედრის უმცროსი მეცნიერ–თანამშრომელია.
- 1992–1993 წლებში, საომარი მოქმედებების პერიოდში, აფხაზური რადიოს რუსული სამსახურის მთავარი რედაქტორი.
- 1985–1996 წლებში აფხაზეთის მწერალთა კავშირის ლიტერატურული კონსულტანტი.
- 1997 წელს დანიშნეს ლიტერატურაში, ხელოვნებასა და არქიტექტურის სფეროში დიმიტრი გულიას სახელმწიფო პრემიის კომისიის პასუხისმგებელ მდივნად.
- 2007–2008 წლებში გორკის სახელობის ლიტერატურულ ინსტიტუტში უმაღლეს ლიტერატურულ კურსებზე სწავლობდა.
- 2010 წელს აფხაზეთის სახელმწიფო გამომცემლობის „ალაშარას“ დირექტორად დაინიშნა.
- ჰყავს მეუღლე და ორი შვილი.
პოლიტიკური კარიერა
- 2000–იანი წლების დასაწყისში დაურ ნაჭყებია ყოველკვირეული ოპოზიციური გაზეთის, „აიტაირა“–ს (აღორძინება) რედაქტორი იყო. გაზეთი რუსულ და აფხაზურ ენებზე გამოდიოდა. გაზეთი ოპოზიციური საზოგადოებრივ–პოლიტიკური მოძრაობის „აიტაირა“–ს გამოცემა იყო. მოძრაობა, რომელიც 2001 წელს დაარსდა, აფხაზეთში პირველი ოპოზიციური პოლიტიკური მოძრაობა იყო. მოძრაობის ხელმძღვანელი იყო მოქმედი დე ფაქტო პრემიერ–მინისტრი ლეონიდ ლაკერბაია. 2004 წლის საპრეზიდენტო არჩევნებში დაურ ნაჭყებია ალექსანდრე ანქვაბთან ტანდემში ვიცე–პრეზიდენტობის კანდიდატად მოიაზრებოდა, თუმცა ალექსანდრე ანქვაბმა არჩევნებში მონაწილეობა პრეზიდენტობის კანდიდატის რანგში ვერ შეძლო. 2004–2005 წლების საპრეზიდენტო არჩევნებში, სერგეი ბაღაფში–ალექსანდრე ანქვაბის ტანდემის გამარჯების შემდეგ, გაზეთის დაფინანსება შეწყდა. აფხაზეთში გავრცელებული მოსაზრებით, გაზეთს ალექსანდრე ანქვაბი აფინანსებდა, რომელიც იმ პერიოდში აფხაზურ პოლიტიკაში დამკვიდრებას ცდილობდა. გაზეთი იმ დროინდელ ხელისუფლებას მწვავედ აკრიტიკებდა.
- 2011 წლის 20 ოქტომბერს, პრეზიდენტის ბრძანებით, დაურ ნაჭყებია აფხაზეთის დე ფაქტო რესპუბლიკის განათლების მინისტრად დაინიშნა.
ლიტერატურული საქმიანობა
- დაურ ნაჭყებია აფხაზეთის მწერალთა კავშირის წევრია. 2004 წელს აფხაზეთის დე ფაქტო რესპუბლიკაში გამართული საპრეზიდენტო არჩევნების პერიოდში, პოლიტიკურ აზრთა სხვადასხვაობის გამო, კავშირის წევრების ნახევარმა კავშირი დატოვა და აფხაზეთის მწერალთა ასოციაცია დააფუძნა.
- დაურ ნაჭყებია პროზაული და პუბლიცისტური ნაშრომების ავტორია.
- მისი ყველაზე ცნობილი რომანი, რუსულ ენაზე დაწერილი „ღამის ნაპირი“, 2010 წელს 500 ეგზემპლარი ქართულ ენაზეც გამოვიდა. რომანი, საქართველოს ამჟამინდელმა კულტურისა და ძეგლთა დაცვის მინისტრმა, გურამ ოდიშარიამ თარგმნა. „ღამის ნაპირი“ თარგმნილია სერბულ და სომხურ ენებზეც.
- დაურ ნაჭყებიას პირადი ვებ–გვერდი აქვს, სადაც მისი შემოქმედებაა ასახული.
სხვა ინფორმაცია
- 2013 წელს დაურ ნაჭყებია რუსეთისა და აფხაზეთის ხალხების მეგობრული ურთიერთობებისა და სამეცნიერო–საგანმანათლებლო თანამშრომლობის განვითარებაში შეტანილი წვლილისთვის საპატიო ვერცხლის ორდენით „საზოგადოებრივი აღიარება“ დააჯილდოვეს.
- 2013 წელს აფხაზურ მედიაში გამოითქვა ვარაუდი, რომ აფხაზეთში პოპულარული ინტენერტ–გვერდის abkhaz-auto.ru–ს ცნობილი ანონიმური მომხმარებელი „კოლხი“, დაურ ნაჭყებია იყო. „კოლხის“ კომენტარები ხელისუფლების მხარდამჭერ მოსაზრებებს და ხელისუფლების ოპონენტების კრიტიკას შეიცავდა. თუმცა, აფხაზურ მედიასთან ინტერვიუში დაურ ნაჭყებიამ უარყო „კოლხთან“ რაიმე კავშირი.
ბადრა გუნბა აფხაზეთის დე ფაქტო კულტურის მინისტრი
ზოგადი მონაცემები
- ბადრა გუნბა დაიბადა 1981 წლის 14 აგვისტოს ქ. სოხუმში.
- 1998 წელს დაამთავრა ქ. სოხუმის N20 საშუალო სკოლა.
- 2003 წელს დაამთავრა ვავილოვის სახელობის სარატოვის სახელმწიფო აგრარული უნივერსიტეტი, ბუღალტრული აღრიცხვისა და აუდიტის სპეციალობით.
- 2003 წელს მუშაობა დაიწყო ქ. სარატოვის ადმინისტრაციაში სოციალური სფეროს ფინანსირების განყოფილებასა და საფინანსო კომიტეტის სამმართველოს აპარატში წამყვანი სპეციალისტის თანამდებობაზე.
- 2004–2006 წლებში ქ. სარატოვის ადმინისტრაციის ოქტიაბრის რაიონის ფინანსურ განყოფილებაში სხვადასხვა თანამდებობეზე მუშაობდა. 2005 წელს მესამე კლასის უმცროსი მუნიციპალური მრჩევლის საკვალიფიკაციო თანრიგი მიიღო.
- 2007 წელს სარატოვში დაიცვა საკანდიდატო დისერტაცია „ეკონომიკისა და სახალხო მეურნეობის მართვის“ სპეციალობის მიმართულებით თემაზე: „რეგიონული საკვები პროდუქტების ბაზარზე სოფლის მეურნეობის პროდუქტების წარმოებისა და მოხმარების შესაბამისობის ეკონომიკური რეგულირება: სარატოვის ოლქის მაგალითი“.
- 2007–2009 წლებში მუშაობდა აფხაზეთის დე ფაქტო მინისტრთა კაბინეტში სამართლებრივ საკითხებში რეფერენტად.
- ჰყავს მეუღლე და ორი შვილი.
პოლიტიკური კარიერა
- 2009 წლის 30 იანვარს აფხაზეთის დე ფაქტო მთავრობაში კულტურის მინისტრის მოადგილედ დაინიშნა. 2011 წლის 13 ოქტომბერს კი, კულტურის მინისტრად.
სხვა საქმიანობა
- ბადრა გუნბა რუსეთის ფედერაციის სამხრეთის ფედერალური ოლქის „სამხრეთის“ (Юг) სუბიექტების ეკონომიკური ურთიერთქმედების ასოციაციის კულტურისა და ხელოვნების საკოორდინაციო საბჭოს წევრია.
ზურაბ მარშანი აფხაზეთის დე ფაქტო ჯანდაცვის მინისტრი
ზოგადი მონაცემები
- ზურაბ მარშანი დაიბადა 1970 წლის 11 აგვისტოს ვლადიკავკაზი, ჩრდილოეთ ოსეთი, რუსეთი.
- 1987–1993 წლებში სწავლობდა ქ. ვლადიკავკაზში ჩრდილოეთ ოსეთის სახელმწიფო სამედიცინო ინსტიტუტ – ალანიაში პედიატრიის ფაკულტეტზე.
- 1995–1996 წლებში მუშაობდა ქ. ვლადიკავკაზში ჩრდილოეთ ოსეთის სახელმწიფო სამედიცინო აკადემიაში.
- 1997–2000 წლებში მუშაობდა აფხაზეთის დე ფაქტო რესპუბლიკის ჯანდაცვის სამინისტროს რესპუბლიკურ კანისა და ვენეროლოგიურ დისპანსერში ექიმ დერმატო–ვენეროლოგად.
- 2003 წელს მცირე ხნით აფხაზეთის დე ფაქტო რესპუბლიკის მთავარი ექიმი იყო.
- ჰყავს მეუღლე და ქალიშვილი.
პოლიტიკური კარიერა
- 2003–2005 წლებში ჯანდაცვის მინისტრის მოადგილეა.
- 2005 წლის 28 თებერვლიდან აფხაზეთის დე ფაქტო მთავრობაში ჯანდაცვის მინისტრია. 2011 წლის 20 ოქტომბრის ბრძანებით, ახალ მთავრობაშიც შეინარჩუნა პოსტი.
- ბოლო წლებში ჯანდაცვის სისტემაში მიმდინარე რეორგანიზაციის გამო ზურაბ მარშანის მიმართ პერიოდულად გაისმის კრიტიკა პარლამენტის წევრების მხრიდან.
ოლგა კოლტუკოვა აფხაზეთის დე ფაქტო შრომისა და სოციალური უზრუნველყოფის მინისტრი
ზოგადი მონაცემები
- ოლგა კოლტუკოვა დაიბადა 1958 წლის 15 ოქტომბერს ქ. ყარაგანდაში, ყაზახეთი.
- 1981 წელს დაამთავრა ყარაგანდის სახელმწიფო სამედიცინო ინსტიტუტი.
- 1982–1985 წლებში მუშაობდა ყაზახეთში, კუსტანაის ოლქში, ვლადიმირსკის საუბნო საავადმყოფოში მთავარ ექიმად.
- 1985 წლიდან იწყება ოლგა კოლტუკოვას საქმიანობა აფხაზეთში. 1985–1989 წლებში ქ. ტყვარჩელში ცენტრალურ საქალაქო საავადმყოფოში ინფექციური განყოფილების ხელმძღვანელია, 1989–1993 წლებში კი, ამავე საავადმყოფოში ექიმი–ანესთეზიოლოგია.
- რუსეთში, ქ. გელენჯიკში ხანმოკლე მუშაობის შემდეგ, კვლავ აფხაზეთში დაბრუნდა, სადაც 1994–1995 წლებში ქ. სოხუმის რესპუბლიკურ საავადმყოფოში ექიმ–ანესთეზიოლოგ–რეანიმატოლოგად იმუშავა.
- 1994–1998 წლებში სოხუმის საქალაქო კლინიკურ საავადმყოფოში მთავარი ექიმის მოადგილის მოვალეობის შემსრულებელი იყო.
- 1998–2003 წლებში ქ. სოხუმის ადმინისტრაციის ჯანდაცვის განყოფილებას ხელმძღვანელობდა.
პოლიტიკური კარიერა
- 2003–2005 წლებში ოლგა კოლტუკოვა ჯერ აფხაზეთის ჯანდაცვისა და სოციალური დაცვის მინისტრის მოადგილე, შემდეგ კი მინისტრის პირველი მოადგილეა.
- 2005 წლის 2 მარტს დაინიშნა შრომისა და სოციალური განვითარების მინისტრად. 2010 წლის 26 თებერვალსა და 2011 წლის 20 ოქტომბერს, ახალი მთავრობების ფორმირების პერიოდში, ხელახლა დაინიშნა მინისტრად.
- ოლგა კოლტუკოვას მისამართით ხშირად ისმის კრიტიკა ხელისუფლების სხვადასხვა წარმომადგენლების მხრიდან. 2012 წელს აფხაზეთის დე ფაქტო პრეზიდენტმა ალექსანდრე ანქვაბმა მინისტრი საჯაროდ გაკიცხა არადამაკმაყოფილებელი მუშაობის გამო. მანამდე ის მწვავედ გააკრიტიკეს აფხაზეთის დე ფაქტო პარლამენტშიც. პარლამენტარების შეფასებით, შრომისა და სოციალური უზრუნველყოფის სამინისტრო პენსიებისა და შემწეობების გაცემის მხოლოდ ტექნიკური ფუნქციით არის დაკავებული და ნაკლებად ფიქრობს ისეთ სტრატრეგიულ საკითხებზე, როგორიც არის საპენსიო რეფორმა და დასაქმება.
სხვა საქმიანობა
- ოლგა კოლტუკოვა ქ. სოხუმის რუსული თემის თავმჯდომარეა. ორგანიზაცია აფხაზეთში რუსი თანამემამულეების საკოორდინაციო საბჭოს წევრია. საბჭოს თავმჯდომარე აფხაზეთის დე ფაქტო მთავრობის ვიცე–პრემიერი ალექსანდრე სტრანიჩკინია.
რაუფ ციმცბა აფხაზეთის დე-ფაქტო გადასახადებისა და მოსაკრებელთა მინისტრი
ზოგადი მონაცემები
- რაუფ ციმცბა დაიბადა 1956 წლის 23 ნოემბერს ქ. გაგრაში.
- 1975 წელს, საშუალო სკოლის დამთავრების შემდეგ, გაიწვიეს საბჭოთა კავშირის სამხედრო-საზღვაო ძალებში. მსახურობდა ქალაქ ფეოდოსიაში (ყირიმი, უკრაინა).
- 1979-1984 წლებში სწავლობდა მაქსიმ გორკის სახელობის სახელმწიფო უნივერსიტეტში (აფხაზეთი) სამართალწარმოების სპეციალობაზე.
- 1984-1989 წლებში მუშაობდა ქალაქ სოხუმში, აფხაზეთის საბჭოს იურისტად ტურიზმისა და ექსკურსიების საკითხებში.
- 1989-1990 წლებში იყო გაგრის რაიონის ადმინისტრაციული და საფინანსო ორგანოების ინსტრუქტორი.
- 1990 წლის იანვრიდან 1990 წლის მარტამდე მუშაობდა ქ. გაგრის პროკურატურის გამომძიებლად. 1990 წლის მარტიდან 1992 წლამდე ქ. გაგრის საგადასახადო ინსპექციის უფროსი იყო, ხოლო 1994-2006 წლებში გაგრის რაიონის საგადასახადო ინსპექციის უფროსი.
- 2006-2011 წლებში რაუფ ციმცბამ მუშაობდა აფხაზეთის დე ფაქტო რესპუბლიკის გადასახადებისა და მოსაკრებელთა სამინისტროში, იურიდიული პირების დაბეგვრის სამმართველოს უფროსად.
- რაუფ ციმცბას ჰყავს მეუღლე და ორი შვილი.
პოლიტიკური კარიერა
- 2011 წლის 4 აპრილს დე ფაქტო პრეზიდენტის სერგეი ბაღაფშის ბრძანებით, იგი გადასახადებისა და მოსაკრებელთა მინისტრად დაინიშნა. 2011 წლის 11 ოქტომბერს, ახალი მინისტრთა კაბინეტის ფორმირების დროს, დე ფაქტო პრეზიდენტმა ალექსანდრე ანქვაბმა ციმცბა კვლავ აღნიშნულ თანამდებობაზე დაამტკიცა.
დამატებითი ინფორმაცია
- რუსეთის პრეზიდენტის ბორის ელცინის 1999 წლის 17 ივნისის ბრძანებულებით, რაუფ ციმცბას მინიჭებული აქვს რუსეთის ფედერაციის მოქალაქეობა.
ბესლან ჯოპუა აფხაზეთის დე ფაქტო სოფლის მეურნეობის მინისტრი
ზოგადი მონაცემები
- ბესლან ჯოპუა დაიბადა 1962 წელს აფხაზეთში.
- სწავლობდა სოხუმში საქართველოს სუბტროპიკული მეურნეობის სახელმწიფო უნივერსიტეტში აგრონომიის ფაკულტეტზე. ინსტიტუტის დამთავრების შემდეგ ბესლან ჯოპუა აგრონომად მუშაობდა, შემდგომში კომკავშირსა და პარტიაში.
- 1989 წელს დაარსა ახალგაზრდული კომერციული ცენტრი „ამზა“.
- 1992-1993 წლებში მონაწილეობდა აფხაზეთის ტერიტორიაზე მიმდინარე კონფლიქტში, სადაც აღმოსავლეთის ფრონტის ბატალიონის კომისარი იყო.
- 1993 წელს ოჩამჩირის ჩაის დამფასოებელ საწარმოში მთავარი ინჟინერი იყო.
- ჰყავს მეუღლე და ორი შვილი.
პოლიტიკური კარიერა
- 2007 წლის 4 მარტს მეორეჯერ გახდა აფხაზეთის დე ფაქტო რესპუბლიკის პარლამენტის წევრი ოჩამჩირის N29 საარჩევნო ოლქიდან. პარლამენტში სოციალური პოლიტიკისა და ჯანდაცვის კომიტეტს ხელმძღვანელობდა.
- 2011 წლის 18 ოქტომბერს დაინიშნა სოფლის მეურნეობის მინისტრად, რის გამოც დეპუტატის მანდატი დათმო.
სხვა საქმიანობა
- 2011 წლის ივნისში აფხაზური დელეგაციის შემადგენლობაში მექსიკასა და ვენესუელას ეწვია. ვენესუელას აფხაზეთის დე ფაქტო რესპუბლიკის დამოუკიდებლობა აქვს აღიარებული.
სტანისლავ ლაკობა აფხაზეთის უშიშროების საბჭოს ყოფილი მდივანი; ისტორიკოსი, საზოგადო და პოლიტიკური მოღვაწე
- სტანისლავ ლაკობა დაიბადა 1953 წლის 23 თებერვალს საქართველოს საბჭოთა სოციალისტური რესპუბლიკის ქალაქ სოხუმში.
- უმაღლესი განათლება სოხუმის სახელმწიფო პეგადოდიურ ინსტიტუტში მიიღო. აქედან მოყოლებული აქტიური სამეცნიერო საქმიანობა დღემდე არ შეუწყვეტია: არის აფხაზეთის სახელმწიფო უნივერსიტეტის პროფესორი. გამოქვეყნებული აქვს არაერთი ისტორიული და ლიტერატურული მონოგრაფია. ასევე არის ლექსების რამოდენიმე კრებულის ავტორი.
- 2000-2004 წლებში მიწვეული პროფესორის სტატუსით სამეცნიერო საქმიანობას ეწეოდა იაპონიაში, ხოკაიდოს უნივესრიტეტის სლავური კვლევების ცენტრში.
პოლიტიკური კარიერა:
- სტანისლავ ლაკობა არის 1989 წლის 18 მარტს შედგენილი ე.წ. „ლიხნის მიმართვის“ ერთ-ერთი ავტორი.
- აფხაზეთის ომის დროს სტანისლავ ლაკობა სეპარატისტული აფხაზეთის უზენაესი საბჭოს დეპუტატი იყო. 1993-1994 წლებში უზენაეს საბჭოს თავმჯდომარის პირველი მოადგილის თანამდებობა ეკავა, ხოლო 1994-1996 წლებში პარლამენტის პირველი ვიცე-სპიკერი იყო.
- მიუხედავად იმისა, რომ ლაკობა ვლადისლავ არძინბას თანამებრძოლად და მისი გარემოცვის წევრად ითვლებოდა, 1996 წელს იგი ოპოზიციაში გადავიდა. 1999 წელს გამოქვეყნდა მისი ცნობილი სტატია „არჩევნები ჰიჩკოკისეული სცენარით“, სადაც მან აფხაზეთში მიმდინარე უალტერნატივო საპრეზიდენტო არჩევნები გააკრიტიკა.
- 2004 წლის საპრეზოდენტო არჩევნებში ლაკობამ მხარი სერგეი ბაღაფშს დაუჭირა და მასთან შეთანხმებით საკუთარი კანდიდატურა მომავალი ვიცე-პრეზიდენტის თანამდებობაზე წამოაყენა. თუმცა განმეორებითი არჩევნებით გამოწვეული შიდა პოლიტიკური დაძაბულობის განმუხტვის მიზნით, ვიცე-პრეზიდენტის პოსტი არჩევნებში დამარცხებულ კანდიდატს რაულ ხაჯიმბას დაუთმო.
- 2005 წლის 18 აგვისტოს სერგეი ბაღაფშმა სტანისლავ ლაკობა უშიშროების საბჭოს მდივნად დანიშნა.
- 2009 წლის აგვისტოში იგი დაკავებული თანამდებობიდან გადადგა და მიზეზად დაასახელა აფხაზეთის კანონმდებლობაში შეტანილი ის ცვლილებები, რომელიც გალის რაიონში მცხოვრები ეთნიკური ქართველებისათვის დე-ფაქტო აფხაზეთის რესპუბლიკის მოქალაქეობას დასაშვებს ხდიდა (თუმცა პოლიტიკური პარტიების და ეთნიკური აფხაზების პროტესტის გამო კანონში ცვლილებები აღარ შესულა).
- 2011 წლის საპრეზიდენტო არჩევნებში ლაკობამ, მიუხედავად იმისა, რომ ალექსანდრე ანქვაბთან მარტივი ურთიერთობები არასდროს ჰქონია, სწორედ მის კანდიდატურას დაუჭირა ღიად მხარი.
- 2011 წლის დეკემბერში იგი უშიშროების საბჭოს მდივნად დაინიშნა.
- ანქვაბსა და ლაკობას შორის რთული ურთიერთობა 2013 წლის ოქტომბერში ამ უკანასკნელის თანამდებობიდან განთავისუფლებით დასრულდა. უთანხმოების ერთ-ერთ მიზეზად ლაკობამ გალისა და ტყვარჩელის რაიონებში ეთნიკური ქართველების პასპორტიზაციის გარშემო არსებული სიტუაცია დაასახელა. ლაკობა, რომელიც ამ პროცესის კატეგორიული წინააღმდეგია, აცხადებდა რომ ანქვაბი პრინციპში პასპორტიზაციის მომხრეა. 2013 წლის 28 ოქტომბერს, მას შემდეგ რაც ის უშიშროების საბჭოს მდივნის თანამდებობიდან მოხსნეს, ლაკობამ ანქვაბი ავტორიტარული მმართველობის სტილში დაადანაშაულა.
რაულ ხაჯიმბა პარლამენტის წევრი,
ოპოზიციური პარტია „აფხაზეთის სახალხო ერთობის ფორუმის“ ლიდერი
ზოგადი ინფორმაცია
- რაულ ხაჯიმბა დაიბადა 1958 წლის 21 მარტს, ქ.ტყვარჩელში;
- 1965-1972 წლებში ტყვარჩელის N2 საშუალო სკოლაში, 1972-1975 წლებში კი, N5 საშუალო სკოლაში სწავლობდა. სკოლის დასრულების შემდეგ ტყვარჩელის თბოელექტროსადგურში ზეინკლად მუშაობდა;
- 1976-1978 წლებში საბჭოთა არმიის ჰაერსაწინააღმდეგო თავდაცვით ძალებში მსახურობდა, ჯარის შემდეგ კი, ტყვარჩელის ქალაქკომში მუშაობდა.
- 1978-1979 წლებში სოხუმის რაიონში, დასასვენებელ კომპლექს „გუმისთაში“ ზეინკლად მუშაობდა.
- 1984 წელს აფხაზეთის სახელმწიფო უნივერსიტეტის იურიდიული ფაკულტეტის დასრულების შემდეგ სოხუმის ქიმიურ ქარხანაში იურისტად დაიწყო მუშაობა.
- 1985-1986 წლებში მინსკში სახელმწიფო უშიშროების კომიტეტის სკოლაში სწავლობდა. მისი თანაკურსელი იყო ინგუშეთის პრეზიდენტი მურატ ზიაზიკოვი.
- 1999 წელს გენერალ-მაიორის წოდება მიანიჭეს.
- ჰყავს მეუღლე და ქალ-ვაჟი.
პროფესიული კარიერა
- 1986-1992 წლებში აფხაზეთში, სახელმწიფო უშიშროების კომიტეტის ტყვარჩელის საქალაქო განყოფილების თანამშრომელია.
- 1992-1993 წლებში ქართულ-აფხაზური კონფლიქტის პერიოდში ე.წ. აღმოსავლეთის ფრონტის სამხედრო დაზვერვისა და კონტრდაზვერვის სამსახურის უფროსი იყო. სამხედრო ღვაწლისთვის ლეონის ორდენით დააჯილდოვეს.
- 1993-1995 წლებში აფხაზეთის დე ფაქტო სახელმწიფო უშიშროების სამსახურის განყოფილების უფროსი იყო.
- 1996-1998 წლებში აფხაზეთის დე ფაქტო სახელმწიფო საბაჟო კომიტეტის კონტრაბანდასთან ბრძოლის განყოფილების უფროსია.
- 1998-1999 წლებში კი, აფხაზეთის დე ფაქტო სახელმწიფო საბაჟო კომიტეტის თავმჯდომარის მოადგილეა.
პოლიტიკური კარიერა
- 1999-2001 წლებში აფხაზეთის დე ფაქტო რესპუბლიკის სახელმწიფო უშიშროების სამსახურის თავმჯდომარე და ამავე დროს პირველი ვიცე-პრემიერია.
- 2001-2002 წლებში პირველი ვიცე-პრემიერია.
- 2002-2003 წლებში თავდაცვის მინისტრია.
- 2003-2004 წლებში პრემიერ-მინისტრია. ამ პოსტზე ხაჯიმბას შერჩევა მისი პრეზიდენტად არჩევის იმედით მოხდა. მის კანდიდატურას მხარს უჭერდა აფხაზეთის მაშინდელი ლიდერი ვლადისლავ არძინბა და რუსეთის ფედერაციის პრეზიდენტი ვლადიმერ პუტინი. არძინბას ავადმყოფობის პირობებში ხაჯიმბა აფხაზეთის ფაქტიური მმართველი იყო. წინასაარჩევნო პერიოდში პუტინმა ხაჯიმბას მხარდაჭერა ღიად გამოხატა.
- 2005-2009 წლებში იყო აფხაზეთის დე ფაქტო ვიცე-პრეზიდენტი.
- ხაჯიმბას, რომელსაც 2004 წლის ოქტომბრის საპრეზიდენტო არჩევნებში, მხარს აფხაზეთის მმართველი ელიტა და რუსეთის ლიდერები უჭერდნენ, სერგეი ბაღაფშთან დამარცხდა. ბაღაფშის გამარჯვებას შიდა აფხაზური დაპირისპირება მოყვა, რაც რუსეთის შუამავლობით საბოლოოდ დაპირისპირებულ მხარეებს შორის ძალაუფლების განაწილებით დასრულდა.
- 2005 წლის იანვარში განმეორებით საპრეზიდენტო არჩევნების შედეგად ხაჯიმბა დე ფაქტო ვიცე-პრეზიდენტი გახდა, ბაღაფში კი პრეზიდენტი.
- 2009 წელს ხაჯიმბამ მთავრობა და პრეზიდენტი გააკრიტიკა და ვიცე-პრეზიდენტის თანამდებობიდან გადადგა. მისი გადადგომა საპრეზიდენტო არჩევნებში მონაწილეობის მისაღებად გადადგმულ ნაბიჯად შეფასდა.
- 2009 წლის საპრეზიდენტო არჩევნებში ხაჯიმბა კიდევ ერთხელ დამარცხდა ბაღაფშთან.
- ბაღაფშის გარდაცვალების შემდეგ, 2011 წლის 26 აგვისტოს დანიშნულ ვადამდელ საპრეზიდენტო არჩევნებში კი, მესამე ადგილი დაიკავა და ხმების მხოლოდ 19.83% მიიღო, პირველი და მეორე ადგილი, შესაბამისად ალექსანდრე ანქვაბს და სერგეი შამბას დაუთმო.
- 2012 წლის დე ფაქტო საპარლამენტო არჩევნებში დეპუტატის მანდატი მოიპოვა და ამჟამად აფხაზეთის დე ფაქტო პარლამენტის წევრია. იგი პარლამენტში ოპოზიციური „აფხაზეთის სახალხო ერთობის ფორუმის“ ლიდერია, რომელიც მწვავედ აკრიტიკებს მთავრობას.
„აფხაზეთის სახალხო ერთობის ფორუმი“
- „აფხაზეთის სახალხო ერთობის ფორუმი“ ოპოზიციური პარტიაა. პარტიას საფუძველი 2005 წლის 8 თებერვალს ჩაეყარა, როდესაც 12 ოპოზიციური პარტია და მოძრაობა გაერთიანდა. მასში ძირითადად შედიოდნენ ისინი ვინც 2004 წლის ოქტომბრის საპრეზიდენტო არჩევნებში რაულ ხაჯიმბას უჭერდნენ მხარს. 2010 წლის 14 მაისს, სოხუმში გამართულ პარტიის ყრილობაზე თავმჯდომარეების რაოდენობა ორიდან ერთამდე, მოადგილეების კი ოთხიდან ორამდე შემცირდა. ხაჯიმბა პარტიის ლიდერად აირჩიეს, მისი მოადგილეები კი დაურ არშბა და რიტა ლოლუა გახდნენ.
არჩევნებში მონაწილეობა
- 2011 წელს პრეზიდენტის სერგეი ბაღაფშის გარდაცვალების შედეგად დანიშულ რიგგარეშე საპრეზიდენტო არჩვენებში პარტიამ პრეზიდენტობის კანდიდატად ხაჯიმბა წარადგინა, ვიცე-პრეზიდენტობის კანდიდატად კი, ვლადისლავ არძინბას ქვრივი. არჩევნებში ალექსანდრე ანქვაბმა გაიმარჯვა, რომელსაც ბოლო წლებში „აფხაზეთის სახალხო ერთობის ფორუმი“ და მისი ლიდერი რაულ ხაჯიმბა მწვავედ აკრიტიკებს.
- 2012 წლის საპარლამენტო არჩევნების შემდეგ, 3 აპრილს, სპიკერის არჩევის დროს, პარტიის მხარდამჭერები პარლამენტის შენობის წინ შეიკრიბნენ და სპიკერად ხაჯიმბას არჩევა მოითხოვეს, თუმცა წარუმატებლად.
- ხაჯიმბა მწვავედ აკრიტიკებს ხელისუფლებას გალის რაიონში მცხოვრები ეთნიკური ქართველებისთვის ე.წ. აფხაზური პასპორტების გაცემის საკითხის გამო.
ვალერი ბგანბა აფხაზეთის დე ფაქტო პარლამენტის თავმჯდომარე
ზოგადი ინფორმაცია
- ვალერი ბგანბა დაიბადა 1953 წლის 26 აგვისტოს გაგრის რაიონის სოფელ ბზიფში, საქართველოს საბჭოთა სოციალისტურ რესპუბლიკაში, აფხაზეთის სსარ.
- 1969 წელს დაამთავრა სოფელ ბზიფის #1 საშუალო სკოლა. სკოლის დამთავრების შემდეგ მუშაობდა ბზიფის ხის გადამამუშავებელ კომბინატში.
- 1971-1976 წლებში სწავლობდა ყუბანის სოფლის მეურნეობის ინსტიტუტში.
- 1976-1978 წლებში აგრონომად მუშაობდა ჩეჩნეთ-ინგუშეთის ასსრ–ში, ქალაქ არღუნში. 1978-1979 წლებში იყო ქ. გაგრის აღმასრულებელი კომიტეტის სოფლის მეურნეობის სამმართველოს აგრონომი.
- 1979 წელს ბგანბა ქ. გაგრის კომკავშირის მეორე მდივანი გახდა. 1982-1988 წლებში კი გაგრის საქალაქო კომიტეტის სოფლის მეურნეობის განყოფილებას ხელმძღვანელობდა.
- 1989 წელს გაგრის აგროსამრეწველო გაერთიანების თავმჯდომარე გახდა.
- ჰყავს მეუღლე და სამი შვილი.
პოლიტიკური კარიერა
- 1991 წელს ვალერი ბგანბა აფხაზეთის დე ფაქტო რესპუბლიკის პირველი მოწვევის უზენაესი საბჭოს დეპუტატად აირჩიეს.
- 1992-1993 წლებში იყო ქ. გაგრის და ბზიფის გამაგრებული რაიონის დაცვის შტაბის წევრი.
- 1998 წელს ბგანბა გაგრის რაიონის საკრებულოს თავმჯდომარედ აირჩიეს. 2001 წელს აღნიშნულ თანამდებობაზე იგი ხელმეორედ დაამტკიცეს.
- 2002 წელს ბგანბა გაგრის რაიონის ადმინისტრაციის უფროსი გახდა. აფხაზეთის დე ფაქტო პრეზიდენტად სერგეი ბაღაფშის არჩევიდან ერთი წლის თავზე, 2006 წელს, ბგანბამ გადადგომის შესახებ განცხადება დაწერა და ადმინისტრაციის უფროსის თანამდებობაზე იგი ბაღაფშის ფავორიტად ცნობილმა ასტამურ ქეცბამ ჩაანაცვლა. იმავე წელს ბგანბა გაგრაში მდებარე სანატორიუმ „ამრა“-ს დირექტორად დაინიშნა.
- 2007 წელს ვალერი ბგანბა მე-4 მოწვევის პარლამენტის დეპუტატად აირჩიეს.
- 2012 წლის 3 აპრილს ბგანბა მე-5 მოწვევის პარლამენტის სპიკერი გახდა. პარლამენტის თავმჯდომარის თანამდებობაზე მას კონკურენციას ოპოზიციური პარტიის, „სახალხო ერთობის ფორუმის“ ლიდერი, რაულ ხაჯიმბა უწევდა. ბგანბას სასარგებლოდ ხმა 33 დეპუტატიდან 21-მა მისცა, ხოლო ხაჯიმბას მხარი 11-მა დეპუტატმა დაუჭირა.
დამატებითი ინფორმაცია
- სპიკერის არჩევის პერიოდში აფხაზურ პრესასა და საზოგადოებაში ბევრს საუბრობდნენ ანქვაბის ადმინისტრაციის მიერ დეპუტატების მისამართით განხორციელებულ ზეწოლაზე, რათა ოპოზიციური პარტიის ლიდერის, ხაჯიმბას სპიკერობა გამოერიცხათ. აფხაზური პრესის თანახმად, ვალერი ბგანბას კანდიდატურა დაძაბული კულუარული მოლაპარაკებების შედეგად შეირჩა და იგი სხვადასხვა პოლიტიკურ ძალებს შორის ერთგვარ კომპრომისულ ვარიანტს წარმოადგენდა.
- ითვლება, რომ ვალერი ბგანბას არ გააჩნია მკვეთრად გამოხატული პოლიტიკური ორიენტაცია. ერთი პერიოდი იგი სერგეი ბაღაფშის და ალექსანდრე ანქვაბის ოპოზიციონერად და ე.წ. „ხაჯიმბისტების“ მოკავშირედ ითვლებოდა (2004 წელი, 2010 წელი), მაშინ, როცა 2012 წელს სპიკერის თანამდებობის დასაკავებლად გამართულ მარათონში სწორედ ანქვაბის პოზიციები დაიცვა და რაულ ხაჯიმბას დაუპირისპირდა.
ვაგარშაკ კოსიანი აფხაზეთის დე ფაქტო პარლამენტის ვიცე–სპიკერი
ზოგადი ინფორმაცია
- ვაგარშაკ კოსიანის შესახებ ოფიციალური ბიოგრაფიული მონაცემები აფხაზეთის დე ფაქტო პარლამენტის ოფიციალურ ვებგვერდზე არ მოიპოვება. იგი დაიბადა გაგრის რაიონის სოფ. მეხადირში, საქართველოს საბჭოთა სოციალისტურ რესპუბლიკაში, აფხაზეთის სსარ. ამჟამად ცხოვრობს გაგრის რაიონის სოფ. განთიადში (ცანდრიფშა).
- საბჭოთა პერიოდში პოლიტოლოგიის სპეციალობას დაეუფლა.
- მუშაობდა კომკავშირის გაგრის ქალაქკომის პირველ მდივნად.
- სწავლობდა ბაქოს უმაღლეს პარტიულ სკოლაში.
- ვაგარშაკ კოსიანი 1992–1993 წლების ომის მონაწილეა.
სამხედრო კარიერა
- სამხედრო კარიერა 1992–1993 წლების ომის დასაწყისში საკუთარ მშობლიურ სოფელში დაიწყო.
- 1993 წლის 9 თებერვალს აფხაზეთის დე ფაქტო შეიარაღებული ძალების უამღლესი მთავარსარდალის ვლადისლავ არძინბას #55 ბრძანებით, შეიქმნა მარშალ ივანე ბაგრამიანის სახელობის სომხური ცალკეული მოტომსროლელთა ბატალიონი, რომლის ხელმძღვანელადაც ვაგარშაკ კოსიანი დაინიშნა. კოსიანის თქმით, ბატალიონში 1000–1200 მებრძოლი შედიოდა.
- მასთან ერთად იბრძოდა მისი ძმა აშოტიც, რომელიც აფხაზეთის ომის გმირია და ამჟამად მშობლიურ სოფელ მეხადირში ცხოვრობს. აშოტი ბაგრამიანის ბატალიონში ოცეულს ხელმძღვანელობდა.
- გაგრის დაკავების შემდეგ, ვაგარშაკ კოსიანმა ლეონის ორდენი მიიღო.
- ომის დასრულების შემდეგ კოსიანის ჯგუფი პირველ ბატალიონს შეურთდა, სადაც ასეულის ხელმძღვანელი იყო.
- პარლამენტში არჩევამდე კოსიანი გარკვეული პერიოდი მეხუთე მოტომსროლელი (გაგრის) ბრიგადის მეორე სარეზერვო ბატალიონის ხელმძღვანელი იყო.
პოლიტიკური კარიერა
- კოსიანი სამჯერ აირჩიეს გაგრის რაიონული კრების დეპუტატად.
- იყო აფხაზეთის დე ფაქტო პრეზიდენტთან არსებული საზოგადოებრივი პალატის წევრი.
- 2004 წლის საპრეზიდენტო არჩევნებში რაულ ხაჯიმბას კანდიდატურას უჭერდა მხარს, 2009 წელს – სერგეი ბაღაფშს, 2011 წელს კი – ალექსანდრე ანქვაბს.
- 2012 წელს დე ფაქტო პარლამენტში #12 ოლქიდან აირჩიეს. პარლამენტში კოსიანის ჩათვლით ეთნიკურად სომეხი სამი დეპუტატია არჩეული.
- 2012 წლის 3 აპრილს, დე ფაქტო პარლამენტში კოსიანი ვიცე-სპიკერად აირჩიეს.
ემა გამისონია აფხაზეთის დე ფაქტო პარლამენტის ვიცე-სპიკერი
ზოგადი მონაცემები
- ემა გამისონია დაიბადა 1962 წლის 16 მარტს ტყვარჩელის რაიონის სოფელ ჩხორთოლში.
- 1978 წელს დაამთავრა ქალაქ ტყვარჩელის #5-ე საშუალო სკოლა. 1978-1983 წლებში სწავლობდა მოსკოვის ნადეჟდა კრუპსკაიას სახელობის პედაგოგიურ ინსტიტუტში. 1984 წლიდან 1989 წლამდე იყო სოფელ ჩხორთოლის საშუალო სკოლის პედაგოგი და დირექტორის მოადგილე.
- 1989 წელს ჩააბარა მოსკოვის მიხეილ ლომონოსოვის სახელობის სახელმწიფო უნივერსიტეტის ფილოსოფიის ფაკულტეტის ასპირანტურაში. 1995 წელს მიენიჭა ფილოსოფიის მეცნიერებათა კანდიდატის წოდება, რის შემდეგაც ეწეოდა სამეცნიერო საქმიანობას აფხაზეთის უნივერსიტეტში სოციოლოგიისა და პოლიტოლოგიის ფაკულტეტზე.
- არის სამი წიგნის და ერთი მონოგრაფიის ავტორი პოლიტოლოგიის თემაზე.
- ემა გამისონია იყო აფხაზეთის დე ფაქტო რესპუბლიკის მე-3 მოწვევის პარლამენტის დეპუტატი პროსახელისუფლებო პარტიიდან „ერთიანი აფხაზეთი“ („Единая Абхазия“).
- 2012 წლის 3 აპრილს, მე-4 მოწვევის დე ფაქტო პარლამენტში იგი ვიცე-სპიკერად აირჩიეს.
დამატებითი ინფორმაცია
- ემა გამისონია იყო სპეციალური კომისიის წევრი, რომელიც გალისა და ტყვარჩელის რაიონებში მცხოვრებ ქართველებზე აფხაზური პასპორტების გაცემის საკითხს სწავლობდა.
- საქართველოს ყოფილი პრემიერ-მინისტრის, ბიძინა ივანიშვილის სიტყვების კომენტირებისას, რომელიც აფხაზებისა და ოსების მიმართ მეტი სითბოსა და სიყვარულის გამოჩენას შეეხებოდა, ემა გამისონიამ განაცხადა, რომ მთავარი სიტყვები კი არა, მოქმედებებია და იმ შემთხვევაში თუ ქართველების მხრიდან ხელი მოეწერება სამშვიდობო ხელშეკრულებას, მოლაპარაკებების წარმოება საქართველოსთან ნებისმიერ ფორმატში იქნება შესაძლებელი.
- 2005 წელს საქართველოს მაშინდელი სახალხო დამცველი სოზარ სუბარი (ამჟამად სასჯელაღსრულების და პრობაციის მინისტრი) აცხადებდა, რომ მას წერილებისა და სატელეფონო კავშირების სახით პერიოდული კონტაქტები ჰქონდა დე ფაქტო პარლამენტის ადამიანის უფლებათა დაცვის კომიტეტის თავმჯდომარესთან ემა გამისონიასთან, რომელიც აფხაზეთში მყოფი ქართველი პატიმრების მდგომარეობის შესახებ მას ინფორმაციას აწვდიდა.
ადგურ ხარაზია აფხაზეთის დე ფაქტო პარლამენტის ვიცე-სპიკერი
ზოგადი მონაცემები
- ადგურ ხარაზია დაიბადა 1959 წლის 12 თებერვალს გულრიფშის რაიონის სოფელ ბაღმარანში.
- 1976 წელს დაამთავრა სოხუმის სკოლა-ინტერნატი. 1977-1979 წლებში მსახურობდა საბჭოთა ჯარში.
- 1979 წლიდან 1991 წლამდე მუშაობდა სოხუმის გემშემკეთებელ ქარხანაში. პარალელურად, 1981-1986 წლებში, სწავლობდა აფხაზეთის სახელმწიფო უნივერსიტეტში.
- 1989-1992 წლებში იყო ქალაქ სოხუმის საყოფაცხოვრებო და კომუნალური მომსახურების სამსახურის დირექტორი.
- მონაწილეობდა 1992-1993 წლების სამხედრო დაპირისპირებაში.
პოლიტიკური კარიერა
- 1993 წლიდან 2002 წლამდე ადგურ ხარაზია ხელმძღვანელობდა გულრიფშის რაიონის ადმინისტრაციას.
- 2002-2003 წლებში იყო სოფლის მეურნეობის მინისტრი.
- 2004 წელს გულრიფშის საკრებულოს თავმჯდომარედ აირჩიეს.
- 2007 წელს იგი, ოპოზიციონერთა რიგებიდან, აფხაზეთის მე-4 მოწვევის დე ფაქტო პარლამენტის დეპუტატი გახდა, სადაც მმართველობის და ადგილობრივი თვითმმართველობის კომიტეტის თავმჯდომარე იყო.
- 2009 წლის საპრეზიდენტო არჩევნებში ხარაზია აქტიურად უჭერდა მხარს ოპოზიციურ კანდიდატს, ზაურ არძინბას, რომელიც აფხაზეთის ომის ვეტერანთა საინიციატივო ჯგუფის მიერ იყო წარდგენილი.
- თუმცა, 2011 წლის ვადამდელ საპრეზიდენტო არჩევნებში მან ამომრჩეველს ალექსანდრე ანქვაბის მხარდაჭერისაკენ მოუწოდა, რასაც ბაღაფში-ანქვაბის მიმართ ოპოზიციური დამოკიდებულებით ცნობილი ადგურ ხარაზიასგან ბევრი არ მოელოდა.
- 2012 წელს იგი აფხაზეთის მე-5 მოწვევის დე ფაქტო პარლამენტის წევრი და ვიცე-სპიკერი გახდა.
დამატებითი ინფორმაცია
- 2009 წლის ნოემბერში აფხაზური გაზეთის, „ახალი დღის“ ჟურნალისტის მიერ საქართველოსთან ურთიერთობების თემაზე დასმულ კითხვას შემდეგი პასუხი გასცა: „ჩემთვის დღეს საქართველო მტრული სახელმწიფოა. თუ ეს ქვეყანა აღიარებს აფხაზეთს და პირველი გადმოდგამს ნაბიჯს ჩვენსკენ, მაშინ, სავარაუდოდ, შევძლებთ თანამშრომლობას.“
- 2011 წლის მაისში ადგურ ხარაზიამ რუსულ ინტერნეტ-გამოცემას „გაზეტა.რუ“-ს განუცხადა, რომ მიმდინარე წელს მოსალოდნელი იყო აფხაზეთის დამოუკიდობლობის აღიარება სან-მარინოს რესპუბლიკის მიერ (სან-მარინომ უარყო).
- ადგურ ხარაზიას სახელი და გვარი ფიგურირებს იმ პირთა ჩამონათვალში, რომლებსაც რუსეთის ფედერაციის პრეზიდენტის 2000 წლის 21 ივნისის ბრძანებულებით, რუსეთის ფედერაციის მოქალაქეობა მიენიჭათ. ხარაზიას საცხოვრებელ ადგილად ყარაჩაეთ-ჩერქეზეთის რესპუბლიკა არის მითითებული.
- ადგურ ხარაზიას ჰყავს მეუღლე და სამი შვილი.
ოთარ ცვიჟბა აფხაზეთის დე ფაქტო პარლამენტის ვიცე-სპიკერი
ზოგადი მონაცემები
- ოთარ ცვიჟბა დაიბადა 1956 წლის 17 ივლისს ოჩამჩირის რაიონის სოფელ ჭლოუში.
- 1976 წელს დაამთავრა ტყვარჩელის #3-ე საშუალო სკოლა.
- 1976-1978 წლებში მსახურობდა საბჭოთა ჯარში, ხოლო ჯარიდან დაბრუნების შემდეგ ტყვარჩელის #3-ე საშუალო სკოლაში დაწყებითი სამხედრო მომზადების მასწავლებელი იყო.
- 1979 წლიდან მუშაობდა მარკშეიდერის სამმართველოში.
- 1980 წელს იგი კომუნისტური პარტიის წევრი გახდა.
- 1981 წელს ცვიჟბამ მუშაობა ოჩამჩირის საავტომობილო სამმართველოში მძღოლად დაიწყო.
- 1988 წელს ნოვოჩერკასკის პოლიტექნიკური ინსტიტუტის სამოქალაქო მშენებლობების სპეციალობა დაამთავრა.
- 1989-1990 წლებში ოთარ ცვიჟბა აქტიურად მონაწილეობდა მასობრივ შეკრებებსა და გამოსვლებში, რომლებიც ეთნიკური აფხაზების მიერ საქართველოდან აფხაზეთის გამოყოფის მოთხოვნით იმართებოდა. 1992-1993 წლებში იყო საომარი მოქმედებების მონაწილე, რა დროსაც დაიჭრა. არის ომის მე-2 ჯგუფის ინვალიდი.
- 1993 წელს ოთარ ცვიჟბა ოჩამჩირის ჩაის ქარხანაში ცვლის უფროსად დაინიშნა. 1997 წლიდან კი სახელმწიფო საწარმო „არგო“-ს დირექტორად მუშაობდა, სანამ, 1998 წელს, ქ. ოჩამჩირის კომერციული ბანკის მმართველად არ დაინიშნა.
- 2010-2012 წლებში ცვიჟბა სამშენებლო კომპანია შპს „Абхазрегионстрой“-ის დირექტორის მოადგილე იყო.
პოლიტიკური კარიერა
- 2012 წლის დე ფაქტო საპარლამენტო არჩევნებში იგი მე-5 მოწვევის პარლამენტის დეპუტატად და ვიცე-სპიკერად აირჩიეს.
|
ცხინვალის რეგიონი
ლეონიდ თიბილოვი სამხრეთ ოსეთის დე ფაქტო პრეზიდენტი
ზოგადი ინფორმაცია
- ლეონიდ თიბილოვი დაიბადა 1952 წლის 28 მარტს ზნაურის რაიონის სოფელ ზემო დვანში.
- 1969 წელს დაამთავრა სოფელ ავნევის საშუალო სკოლა, ხოლო 1974 წელს - პედაგოგიური ინსტიტუტის ფიზიკა-მათემატიკის ფაკულტეტი.
- 1974-1975 წლებში მსახურობდა საბჭოთა ჯარში. დემობილიზაციის შემდეგ, 1975 წლიდან 1981 წლამდე მუშაობდა სამხრეთ ოსეთის ავტონომიური ოლქის სახალხო განათლების სისტემაში. იყო ზნაურის საშუალო სკოლის დირექტორი. ასევე ხელმძღვანელობდა მათემატიკის კაბინეტს მასწავლებელთა გადამზადების ცენტრში.
- ლეონიდ თიბილოვს ყავს მეოღლე, ორი ქალიშვილი და ოთხი შვილიშვილი.
პროფესიული კარიერა
- 1981 წელს ლეონიდ თიბილოვი საბჭოთა კავშირის სახელმწიფო უშიშროების კომიტეტის („სუკ“) თანამშრომელი გახდა. იყო ოპერმუშაკი, უფროსი ოპერმუშაკი და ეკონომიკური უსაფრთხოების განყოფილების უფროსი. დამთავრებული აქვს საბჭოთა კავშირის სუკ-ის აკადემია ქალაქ მინსკში.
- 1992 წლის 28 მაისს ლეონიდ თიბილოვი თვითგამოცხადებული სამხრეთ ოსეთის უშიშროების მინისტრად დაინიშნა.
- რუსეთის კონტრდაზვერვის ფედერალური სამსახურის დავალებით, 1992 წლის 14 ივლისიდან 1995 წლის 1 იანვრამდე, ასრულებდა ქართულ-ოსური კონფლიქტის ზონაში მყოფი შერეული სამშვიდობო ძალების უსაფრთხოების სამსახურის ხელმძღვანელის ფუნქციას.
- იყო მეორე მოწვევის დე ფაქტო უზენაესი საბჭოს დეპუტატი (1994-1999 წლები).
- 1998 წლის აგვისტოში თიბილოვი დაინიშნა სამხრეთ ოსეთის დე ფაქტო მთავრობის თავმჯდომარის, მერაბ ჩიგოევის პირველ მოადგილედ. პარალელურად ასრულებდა ქართულ-ოსური კონფლიქტის დარეგულირების შერეული საკონტროლო კომისიის თანათავმჯდომარის ფუნქციას სამხრეთ ოსეთის მხრიდან.
- ხელისუფლების სათავეში ედუარდ კოკოითის მოსვლის შემდეგ, თიბილოვი მთავრობის თავმჯდომარის პირველი მოადგილის თანამდებობიდან გაათავისუფლეს.
- 2002-2005 წლებში თიბილოვი სხვადასხვა უწყებაში მუშაობდა: იყო დე ფაქტო პარლამენტის თავმჯდომარის თანაშემწე, შერეული საკონტროლო კომისიის აპარატის წევრი და განსაკუთრებულ საქმეთა მინისტრის ბორის ჩოჩიევის მოადგილე.
- 2006 წლის საპრეზიდენტო არჩევნებში „სამედიცინო საზოგადოების საინიციატივო ჯგუფმა“ ლეონიდ თიბილოვის კანდიდატურა წამოაყენა. თიბილოვმა ხმების 0.9%-ი აიღო, მეორე ადგილზე გავიდა და ედუარდ კოკოითთან დამარცხდა, რომელიც დე ფაქტო პრეზიდენტი მეორე ვადით გახდა.
- 2007-2009 წლებში ლეონიდ თიბილოვი მუშაობდა „პირველ რესპუბლიკურ ბანკში“, რომელიც ედუარდ კოკოითთან დაპირისპირებულ ბიზნესმენს ალბერტ ჯუსოევს ეკუთვნოდა. 2009 წელს ხელისუფლების ზეწოლის შედეგად ბანკი დაიხურა.
- 2012 წლამდე თიბილოვი პოსტკონფლიქტური დარეგულირების საკითხებში დე ფაქტო პრეზიდენტის სრულუფლებიანი წარმომადგენლის მრჩევლი იყო.
- 2012 წლის თებერვალში თიბილოვი განმეორებითი საპრეზიდენტო არჩევნების კანდიდატად დარეგისტრირდა. 25 მარტს ხმების 42.58% აიღო და მეორე ტურში გავიდა. 8 აპრილს ჩატარებულ მეორე ტურში თიბილოვმა ხმების 54%-ით მისი კონკურენტი დავით სანაკოევი დაამარცხა და სეპარატისტული რეგიონის რიგით მესამე პრეზიდენტი გახდა.
დამატებითი ინფორმაცია
- ლეონიდ თიბილოვს მიღებული აქვს საბჭოთა კავშირის, სამხრეთ ოსეთის და დნესტრისპირეთის სეპარატისტული რესპუბლიკის ჯილდოები.
- 1998 წელს სამხრეთ ოსეთის დე ფაქტო პირველმა პრეზიდენტმა ლუდვიგ ჩიბიროვმა მიანიჭა გენერალ-მაიორის წოდება.
დომენტი კულუმბეგოვი დე ფაქტო პრემიერ-მინისტრი
ზოგადი ინფორმაცია
- დომენტი კულუმბეგოვი დაიბადა 1955 წლის 4 იანვარს, გორის რაიონის სოფელ თხინალაში.
- 1978 წელს დაამთავრა სამხრეთ ოსეთის პედაგოგიური ინსტიტუტი, 2009 წელს - თანამედროვე ჰუმანიტარული აკადემია. არის ისტორიისა და უცხო ენების, ასევე იურისპრუდენციის სპეციალისტი. ფლობს გერმანულ ენას.
- 2000 წელს გაიარა პროფესიული გადამზადების კურსები სახელმწიფო სამსახურის ჩრდილო კავკასიურ აკადემიაში, ქ. დონის როსტოვში.
პროფესიული კარიერა
- 1978-1979 წლებში კულუმბეგოვი მუშაობდა თბილისის გვირაბმშენებელი ქარხნის ქ. ცხინვალის განყოფილებაში.
- 1980 წელს მუშაობას იწყებს საქართველოს კომკავშირის ქ. ცხინვალის საქალაქო კომიტეტში. 1983-1985 წლებში იყო ცხინვალის ქალაქკომის პირველი მდივანი, ხოლო 1985-1988 წლებში კომკავშრის სამხრეთ ოსეთის რაიკომის პირველი მდივანი.
- 1988 წლიდან 1991 წლამდე კულუმბეგოვი საქართველოს კომუნისტური პარტიის სამხრეთ ოსეთის რაიკომის განყოფილებას ხელმძღვანელობდა.
- 1992 წლიდან 2000 წლამდე დომენტი კულუმბეგოვი ჩრდილოეთ ოსეთის რესპუბლიკის საიმიგრაციო სამსახურში მუშაობდა. ეკავა სხვადასხვა თანამდებობა, დაწყებული უფროსი ინსპექტორით და საიმიგრაციო სამსახურის ხელმძღვანელის პირველი მოადგილით დამთავრებული.
- 2000 – 2006 წლებში იყო ჩრდილოეთ ოსეთის რესპუბლიკის შს სამინისტროს საიმიგრაციო საქმეთა სამმართველოს უფროსის მოადგილე. 2006 წელს იგი ამავე სამმართველოს უფროსი გახდა.
- 2006 წლის ოქტომბერში კულუმბეგოვი ჩრდილოეთ ოსეთის რესპუბლიკის პრეზიდენტის ადმინისტრაციის შიდა პოლიტიკის სამმართველოს ხელმძღვანელად დაინიშნა.
- 2009 წელს იგი სამუშაოდ ცხინვალში გადადის და ედუარდ კოკოითის დე ფაქტო ხელისუფლებაში სამხერთ ოსეთის ვიცე-პრემიერად ინიშნება. აღნიშნული თანამდებობა მას 2012 წლამდე ეკავა.
- 2012 – 2013 წლებში კულუმბეგოვი იყო სამხრეთ ოსეთის საკითხებში რუსეთის პრეზიდენტის სპეციალური წარმომადგენლის, ჩრდილოეთ ოსეთის პრეზიდენტის თეიმურაზ მამსუროვის თანაშემწე. ამავე დროს, ეკავა ჩრდილოეთ ოსეთის რესპუბლიკის ეროვნულ საკითხთა მინისტრის მოადგილის თანამდებობა.
- 2013 წლის 18 ივნისს სამხრეთ ოსეთის დე ფაქტო პრეზიდენტის ლეონიდ თიბილოვის განკარგულებით, იგი კვლავ დაინიშნა პირველ ვიცე-პრემიერად და ამ თანამდებობაზე გურამ მელკოევი ჩაანაცვლა.
- 2014 წლის 20 იანვარს სამხრეთ ოსეთის დე ფაქტო პრეზიდენტმა მთავრობა და პრემიერ-მინისტრი დაითხოვა, რის შემდეგაც დომენტი კულუმბეგოვი მთავრობის თავმჯდომარის მოვალეობის შემსრულებელი გახდა.
- 2014 წლის 1 აპრილს თიბილოვმა კულუმბეგოვის კანდიდატურა პარლამენტს პრემიერ-მინისტრის თანამდებობაზე წარუდგინა, რომელიც სეპარატისტული რეგიონის საკონონმდებლო ორგანომ დაამტკიცა;
- 2014 წლის 2 აპრილს თიბილოვმა კულუმბეგოვი პრემიერ-მინისტრის პოსტზე დანიშნა.
დამატებითი ინფორმაცია
- ჯერ კიდევ მთავრობის დათხოვნამდე, პრესაში ვრცელდებოდა ინფორმაცია რომ თიბილოვს დომენტი კულუმბეგოვის პრემიერ-მინისტრად გადაყვანა და როსტისლავ ხუგაევის ჩანაცვლება სურდა. ეს საკითხი მან 2013 წლის აგვისტოში მოსკოვში სამუშაო ვიზიტით ყოფნის დროს წამოსწია, თუმცა როგორც ჩანს უშედეგოდ. 2013 წლის სექტემბერში რუსეთის პრეზიდენტის თანაშემწედ ვლადისლავ სურკოვი დაინიშნა, რომელიც აფხაზეთსა და სამხრეთ ოსეთს კურირებს. მას შემდეგ ვრცელდებოდა ინფორმაცია რომ სურკოვი ცხინვალში მთავრობის შეცვლა სურდა რათა უკეთესად გაეკონტროლებინა რუსეთის მიერ გამოყოფილი ფინანსური დახმარების ხარჯვის პროცესი.
- 90-იან წლებში, ცხინვალის რეგიონში საომარი მოქმედებების დაწყებამდე, დომენტი კულუმბეგოვი ასრულებდა შუამავლის როლს დაპირისპირებულ მხარეებს შორის. ასევე, 2008 წლის აგვისტოს რუსეთ-საქართველოს ომამდე იგი იყო ქართულ-ოსური კონფლიქტის დარეგულირების შერეული საკონტროლო კომისიის წევრი ჩრდილოეთ ოსეთის რესპუბლიკის მხრიდან.
- დომენტი კულუმბეგოვი ხელმძღვანელობდა სპეციალურ კომისიას, რომელიც ტოპონიმების დადგენის მიზნით 2010 წელს დე ფაქტო პრეზიდენტის ედუარდ კოკოითის განკარგულებით შეიქმნა. კომისიის მუშაობის შედეგად მოხდა ქართული სოფლების დასახელების შეცვლა.
ვალერი იახნოვეცი დე ფაქტო თავდაცვის მინისტრის მოვალეობის შემსრულებელი
ზოგადი ინფორმაცია
- ვალერი იახნოვეცი დაიბადა 1960 წელს.
- 1984 წელს დაამთავრა რიაზანის უმაღლესი საჰაერო-სადესანტო სამეთაურო სასწავლებელი.
- მსახურობდა საბჭოთა კავშირის საჰაერო-სადესანტო და სადაზვერვო დანაყოფებში ბაიკალისპირეთსა და უკრაინაში.
- რუსეთის ფედერაციის შეიარაღებული ძალების საერთო საჯარისო აკადემიის დამთავრების შემდეგ, მუშაობდა რუსეთის საჰაერო-სადესანტო ჯარების შტაბში. ცხინვალში გადმოყვანამდე ეკავა რუსეთის საჰაერო-სადესანტო ჯარების დაზვერვის უფროსის თანამდებობა.
- 2010 წლის 27 ივლისს იახნოვეცი „სამხრეთ ოსეთის“ დე ფაქტო თავდაცვის მინისტრად დაინიშნა. აღნიშნული თანამდებობა მან 2012 წლის საპრეზიდენტო არჩევნებში გამარჯვებული ლეონიდ თიბილოვის დე ფაქტო მთავრობაშიც შეინარჩუნა.
- 2014 წლის 20 იანვარს სამხრეთ ოსეთის დე ფაქტო პრეზიდენტმა მთავრობა დაითხოვა, რის შემდეგაც იახნოვეცი თავდაცვის მინისტრის მოვალეობის შემსრულებელი გახდა;
- 2014 წლის 8 აპრილს ის იმავე თანამდებობაზე დაინიშნა მას შემდეგ რაც ახალი პრემიერი დომენტი კულუმბეგოვი გახდა.
- ვალერი იახნოვეცი არის ჩეჩნეთის ორივე ომის, იუგოსლავიის შეიარაღებული კონფლიქტის და 2008 წლის რუსეთ-საქართველოს ომის მონაწილე.
- მინიჭებული აქვს რუსეთის გმირის წოდება.
დამატებითი ინფორმაცია
- რუსულენოვან პრესაში გავრცელებული ინფორმაციის თანახმად, ვალერი იახნოვეცმა რამდენჯერმე განაცხადა უარი კარიერულ დაწინაურებასა და სადესანტო ჯარების დატოვებაზე.
- იახნოვეცი მეგობრობს ინგუშეთის რესპუბლიკის პრეზიდენტთან იუნუს-ბეკ ევკუროვთან, რომელიც სადესანტო ჯარებში მისი მოადგილე იყო. 1999 წელს ისინი ერთად მონაწილეობდნენ რუსი სამხედროების მიერ პრიშტინის აეროპორტის დაკავების სპეცოპერაციაში.
ახსარ ლავოევი დე ფაქტო შს მინისტრის მოვალეობის შემსრულებელი
ზოგადი ინფორმაცია
- ახსარ ლავოევი დაიბადა 1968 წლის 25 აპრილს ქ. ცხინვალში.
- 1985 წელს, ცხინვალის #11-ე საშუალოს სკოლის დამთავრების შემდეგ, ჩააბარა სამხრეთ ოსეთის პედაგოგიურ ინსტიტუტში, ისტორია-ფილოლოგიის ფაკულტეტზე.
- სავალდებულო სამხედრო სამსახური გაიარა საბჭოთა კავშირის შეიარაღებულ ძალებში.
- ჰყავს მეუღლე და სამი შვილი.
პროფესიული კარიერა
- 1990-92 წლებში ახსარ ლავოევი მუშაობდა ცხინვალში, თავისუფალი ჭიდაობის ტრენერად.
- 1992 წელს სეპარატისტული სამხრეთ ოსეთის ე.წ. „ომონის“ ოცმეთაური გახდა.
- 1993 წელს იყო სამხრეთ ოსეთის თავდაცვის სამინისტროს სპეცდანიშნულების ასეულის მეთაურის მოადგილე.
- 1994 წლიდან ლავოევი ჩრდილოეთ ოსეთის საბაჟო სამსახურში მუშაობდა.
- 2000 წელს სამხრეთ ოსეთის პირველმა დე ფაქტო პრეზიდენტმა ლუდვიგ ჩიბიროვმა იგი მთავარი საბაჟო სამმართველოს უფროსად დაინიშნა.
- ამ პერიოდში ახსარ ლავოევი ლუდვიგ ჩიბიროვის ვაჟის, ალექსეი ჩიბიროვის გარემოცვის წევრად განიხილებოდა, რომელიც, თავის მხრივ, ჯერ სამხრეთ ოსეთის „ომონის“ მეთაურის მოადგილე იყო, ხოლო შემდეგ დე ფაქტო უშიშროების კომიტეტის უფროსის მოადგილე.
- 2001 წლის საპრეზიდენტო არჩევნებში ედუარდ კოკოითთან ჩიბიროვის დამარცხების შემდეგ, ლავოევმა სამხრეთ ოსეთის ტერიტორია დატოვა და კვლავ ჩრდილოეთ ოსეთში გადავიდა, სადაც 2002 წელს მუშაობა დაიწყო სწრაფი რეაგირების სპეცდანიშნულების რაზმის მეთაურის მოადგილედ.
- 2003 წელს ახსარ ლავოევი ჩრდილოეთ ოსეთის საბაჟო სამსახურის კინოლოგიურ განყოფილებაში მთავარ საბაჟო ინსპექტორად მუშაობდა. ამავე პერიოდში პრესა მას „ვლადიკავკაზელ ბიზნესმენად“ მოიხსენიებს.
- 2012 წლის საპრეზიდენტო არჩევნებში ახსარ ლავოევმა საჯაროდ დაუჭირა მხარი ლეონიდ თიბილოვის კანდიდატურას. იგი აქტიურად აფინანსებდა მის საარჩევნო კამპანიას სოსლან გატიკოევთან ერთად, რომელიც ლუდვიგ ჩიბიროვის მთავრობაში თავდაცვის მინისტრი იყო (ამჟამად სამხრეთ ოსეთის დე ფაქტო საგარეო დაზვერვის სამსახურს ხელმძღვანელობს).
- 2012 წელს 22 მაისს ლეონიდ თიბილოვმა ახსარ ლავოევი სამხრეთ ოსეთის საბაჟო კომიტეტის ხელმძღვანელად დანიშნა.
- 2012 წლის 24 ივლისს კი ის შინაგან საქმეთა მინისტრად დაინიშნა.
- 2014 წლის იანვარში დე ფაქტო პრეზიდენტმა მთავრობა დაითხოვა და ლავოევი შს მინისტრის მოვალეობის შემსრულებელი გახდა, თუმცა 8 აპრილს ის იმავე თანამდებობაზე დაინიშნა, მას შემდეგ რაც პრემიერ-მინისტრის პოსტი დომენტი კულუმბეგოვმა დაიკავა.
დამატებითი ინფორმაცია
- ახსარ ლავოევის სახელს ცხინვალში არაერთ ინციდენტს უკავშირებენ. პრესა მას ლეონიდ თიბილოვის მთავარ საყრდენადაც მოიხსენიებს.
- გვარცელებული ინფორმაციის თანახმად, ახსარ ლავოევი იმ სამშენებლო კომპანიების ინტერესებს იცავს, რომლებიც ქ. ცხინვალის რეაბილიტაციას ახორციელებენ. აღნიშნულ ნიადაგზე, 2013 წლის მარტში, მან საჯაროდ მიაყენა ფიზიკური შეურაცხყოფა ქ. ცხინვალის მერის მოვალეობის შემსრულებელს ვადიმ გაბარაევს. გაბარაევმა ჟურნალისტებთან საუბარში შს მინისტრის მხრიდან მისი ცემის ფაქტი დაადასტურა და განაცხადა, რომ ლავოევი მისგან სამშენებლო კომპანიების საქმიანობაში ჩარევის შეწყვეტას მოითხოვდა. მან მომხდარზე დე ფაქტო პრეზიდენტთან, ლეონიდ თიბილოვთანაც ისაუბრა, რომელიც გაბარაევს მომხდარზე რეაგირებას დაპირდა. თუმცა ფიზიკური დაპირისპირებიდან მალევე, ლეონიდ თიბილოვმა ვადიმ გაბარაევი დაკავებული თანამდებობიდან გაათავისუფლა, ხოლო მერის მოვალეობის შემსრულებლად ალან ალბოროვი დანიშნა, რომელიც ახსარ ლავოევის გარემოცვიდანაა.
აზა ხაბალოვა დე ფაქტო ფინანსთა მინისტრი
ზოგადი მონაცემები
- აზა ხაბალოვა ლეონიდ თიბილოვის მთავრობაში ფინანსთა მინისტრად 2012 წლის 18 მაისს დაინიშნა და ამ თანამდებობაზე ირინა სიტნიკი შეცვალა, რომელიც მაშინდელმა დე ფაქტო პრემიერ–მინისტრმა ვადიმ ბროვცევმა 2009 წელს მოსკოვიდან ჩამოიყვანა, სადაც იგი მოსკოვის საბანკო საქმის ინსტიტუტის ფინანსური დირექტორი იყო.
- ხაბელოვას სამხრეთ ოსეთის დე ფაქტო ფინანსთა მინისტრის თანამდებობა 1999-2008 წლებშიც ეკავა. 2008 წელს თანამდებობა მან ედუარდ კოკოითთან დაპირისპირების გამო დატოვა.
- 2011 წლის დე ფაქტო საპრეზიდენტო არჩევნებში აზა ხაბელოვამ მხარი ალა ჯიოევას დაუჭირა. იყო მისი უახლოესი თანამებრძოლი.
- აზა ხაბალოვას გამოცდილ და პრინციპულ პოლიტიკოსად მოიხსენიებენ. იგი არ ერიდება ისეთ გავლენიან ფიგურებთან დაპირისპირებასაც კი, როგორებიც არიან დე ფაქტო შს მინისტრი ახსარ ლავოევი და დე ფაქტო საგარეო დაზვერვის სამსახურის უფროსი სოსლან გატიკოევი. მაგალითად, 2013 წლის ივნისში გავრცელებული ცნობების თანახმად, მორიგი ფინანსური შემოწმების დროს ფინანსთა სამინისტრომ რუს ინსპექტორებთან ერთად ორივე უწყებაში გამოავლინა „მკვდარი სულების“ არსებობა და აზა ხაბალოვამ სოსლან გატიკოევს და ახსარ ლავოევს მათ დაფინანსებაზე მტკიცე უარი განუცხადა.
- 2014 წლის 20 იანვარს სამხრეთ ოსეთის დე ფაქტო პრეზიდენტმა მთავრობა დაითხოვა, რის შემდეგაც ხაბალოვა ფინანსთა მინისტრის მოვალეობის შემსრულებელი გახდა;
- 2014 წლის 8 აპრილს ის იმავე თანამდებობაზე დაინიშნა მას შემდეგ რაც ახალი პრემიერი დომენტი კულუმბეგოვი გახდა.
მარინა ჩიბიროვა დე ფაქტო განათლებისა და მეცნიერების მინისტრი
ზოგადი მონაცემები
- მარინა ჩიბიროვა დაიბადა 1970 წელს ქ. ცხინვალში. არის სამხრეთ ოსეთის დე ფაქტო პირველი პრეზიდენტის ლუდვიგ ჩიბიროვის შვილი.
- მარინა ჩიბიროვა სამხრეთ ოსეთის დე ფაქტო განათლებისა და მეცნიერების მინისტრად 2012 წლის 31 მაისს დაინიშნა.
- მანამდე იგი დე ფაქტო განათლების სამინისტროს მეცნიერებისა და პროფესიული განათლების სამმართველოს უფროსი იყო.
- 2012 წლის განმეორებით საპრეზიდენტო არჩევნებში ჩიბიროვა ხელმძღვანელობდა საინიციატივო ჯგუფს, რომელმაც პრეზიდენტობის კანდიდატად ვიცე-სპიკერი მირა ცხოვრებოვა წამოაყენა. თუმცა, არჩევნებამდე მირა ცხოვრებოვამ საკუთარი კანდიდატურა რუსეთში სამხრეთ ოსეთის დე ფაქტო ელჩის, დიმიტრი მედოევის სასარგებლოდ მოხსნა.
- 2014 წლის 20 იანვარს სამხრეთ ოსეთის დე ფაქტო პრეზიდენტმა მთავრობა დაითხოვა, რის შემდეგაც ჩიბიროვა განათლების მინისტრის მოვალეობის შემსრულებელი იყო;
- 2014 წლის 8 აპრილს ის კვლავ განათლების მინისტრად დაინიშნა მას შემდეგ რაც ახალი პრემიერი დომენტი კულუმბეგოვი გახდა.
დამატებითი ინფორმაცია
- მარინა ჩიბიროვა არის ფილოლოგიურ მეცნიერებათა კანდიდატი. გამოცემული აქვს რამდენიმე მონოგრაფია ლიტერატურულ თარგმანთან დაკავშირებული პრობლემატიკისა და თარგმნის თეორიის შესახებ.
გრიგორი კულიჯანოვი დე ფაქტო ჯანდაცვისა და სოციალური განვითარების მინისტრი
ზოგადი მონაცემები
- გრიგორი კულიჯანოვი დაიბადა 1952 წელს ქ.ცხინვალში;
- 1969 წელს დაამთავრა ქ. ცხინვალის #6 საშუალო სკოლა;
- 1975 წელს დაამთავრა ჩრდილო–ოსეთის სახელმწიფო სამედიცინო ინსტიტუტის სამკურნალო ფაკულტეტი;
- 1975–1978 წლებში ლიპეცკში მუშაობდა ქირურგ–ონკოლოგად;
- 1978–1997 წლებში ცხინვალის რესპუბლიკურ საავადმყოფოში მუშაობდა ქირურგ–ონკოლოგად;
- 1985–1987 წლებში მოსკოვში, ბლოხინის სახელობის ონკოლოგიურ სამეცნიერო ცენტრში სწავლობდა ორდინატურაში;
- 1989 წელს დაიცვა დისერტაცია მედიცინის მეცნიერებათა კანდიდატის ხარისხის მისანიჭებლად;
- 1997 წლიდან მუშაობდა რესპულიკური საავადმყოფოს ქირურგიული განყოფილების ხელძღვანელად, ონკოლოგად;
- არის „სამხრეთ ოსეთის რესპუბლიკის“ დამსახურებული ექიმი, „სამხრეთ ოსეთის რესპუბლიკის“ ღირსების ორდენის კავალერი;
დამატებითი ინფორმაცია
- 2013 წელს ერთ-ერთ ინტერვიუში მან განაცხადა რომ ჯანდაცვის სამინისტროს სამხრეთ ოსეთის მაცხოვრებლები ხშირად მიმართავენ სამხრეთ ოსეთის ფარგლებს გარეთ, მათ შორის საქართველოშიც, მკურნალობის კურსის გავლის თხოვნით. კულიჯანოვის განცხადებით, ისინი მსურველებს ალტერნატივას სთავაზობენ ჩრდილოეთ ოსეთის სახით, თუმცა, არის შემთხვევები, როდესაც მათი რჩევის წინააღმდეგ, პაციენტები მაინც მიდიან თბილისში სამკურნალოდ; მისი თქმით ასეთ შემთხვევებში, როდესაც საქმე გადაუდებელ სამედიცინო დახმარებას ეხება, სამინისტრო "თვალს ხუჭავს" და არ უშლის მათ ხელს რომ საქართველოში გაიარონ მკურნალობა.
სტანისლავ კოჩიევი დე ფაქტო პარლამენტის თავმჯდომარე, სამხრეთ ოსეთის კომუნისტური პარტიის პირველი მდივანი
ზოგადი მონაცემები
- სტანისლავ კოჩიევი დაიბადა 1954 წლის 7 აპრილს ცხინვალის რაიონის სოფელ ქურთაში.
- 1971 წელს დაამთავრა ქ. ცხინვალის #6-ე საშუალო სკოლა. 1972-1977 წლებში სწავლობდა სამხრეთ ოსეთის პედაგოგიურ ინსტიტუტში ისტორიისა და ინგლისური ენის ფაკულტეტზე.
- 1994 წელს დაამთავრა პოლიტოლოგიისა და სოციოლოგიური კვლევების ინსტიტუტი ბაქოში. ასევე, დამთავრებული აქვს საბჭოთა საქართველოს მეცნიერებათა აკადემიის ასპირანტურის დაუსწრებელი განყოფილება.
კარიერა
- 1981 წელს სტანისლავ კოჩიევმა მუშაობა დაიწყო სამხრეთ ოსეთის ავტონომიური ოლქის სახალხო კონტროლის კომიტეტში, სადაც ხელმძღვანელობდა მუშათა საჩივრების და წინადადებების განხილვის განყოფილებას.
- 1989-1991 წლებში იგი ცხინვალში რაიკომის იდეოლოგიური განყოფილების უფროსი იყო.
- 1991 წელს კოჩიევი სამხრეთ ოსეთის დე ფაქტო მთავრობაში პრესისა და ინფორმაციის მინისტრად დაინიშნა. აღნიშნული თანამდებობა მას 1999 წლამდე ეკავა.
- 1993 წელს კოჩიევი სამხრეთ ოსეთის კომუნისტური პარტიის პირველ მდივნად აირჩიეს.
- 1999-2004 წლებში იყო დე ფაქტო მესამე მოწვევის პარლამენტის თავმჯდომარე.
- მონაწილეობდა 2001 წლის საპრეზიდენტო არჩევნებში, სადაც მეორე ტურში გავიდა და ხმების 40%-ით ედუარდ კოკოითის წინააღმდეგ დამარცხდა.
- 2009 წლის 19 ივნისს სტანისლავ კოჩიევი დე ფაქტო მეხუთე მოწვევის პარლამენტის თავმჯდომარე გახდა. თუმცა, ხელისუფლებასთან დაპირისპირების გამო, 2011 წლის 5 ოქტომბერს გამართულ სხდომაზე სახელისუფლებო პარტია „ერთობამ“, „სახალხო პარტიის“ მხარდაჭერით, კოჩიევი თანამდებობიდან გადააყენა, რაც კოჩიევმა უზენაეს სასამართლოში გაასაჩივრა.
- 2012 წლის 3 თებერვალს კომუნისტურმა პარტიამ განმეორებით საპრეზიდენტო არჩევნებში სტანისლავ კოჩიევის კანდიდატურა წამოაყენა. მანამდე კომუნისტური პარტია აცხადებდა, რომ 25 მარტის არჩევნებზე მხარს მხოლოდ მოსკოვისათვის მისაღებ კანდიდატს დაუჭერდა. კოჩიევის საარჩევნო შტაბს სათავეში რუსეთის ლიბერალურ-დემოკრატიული პარტიის წევრი მურატ ვანეევი ჩაუდგა, რომელიც ამჟამად სამხრეთ ოსეთის დე ფაქტო იუსტიციის მინისტრის მოვალეობის შემსრულებელია.
- 25 მარტს გამართულ არჩევნებში სტანისლავ კოჩიევმა ამომრჩეველთა ხმების მხოლოდ 5.26% მიიღო და საპრეზიდენტო მარათონს პირველივე ტურში გამოეთიშა. 8 აპრილს გამართულ მეორე ტურში კი კომუნისტურმა პარტიამ მხარი ლეონიდ თიბილოვის კანდიდატურას დაუჭირა.
- 2012 წლის 2 ივლისს, დე ფაქტო უზენაესი სასამართლოს გადაწყვეტილების საფუძველზე, სტანისლავ კოჩიევს პარლამენტის თავმჯდომარის უფლებამოსილება აღუდგა.
დამატებითი ინფორმაცია
- სტანისლავ კოჩიევი კომუნისტურ პარტიათა საერთაშორისო გაერთიანების საბჭოს და აღმასკომის წევრია. საბჭოს ხელმძღვანელობს რუსეთის კომუნისტური პარტიის პირველი მდივანი გენადი ზიუგანოვი.
- სტანისლავ კოჩიევს მიღებული აქვს რუსეთის დუმის, რუსეთის კომუნისტური პარტიის, ჩრდილოეთ ოსეთის, სეპარატისტული აფხაზეთის, დნესტრისპირეთისა და მთიანი ყარაბაღის ჯილდოები.
- არის რუსეთის ფედერაციის მოქალაქე.
- ჰყავს მეუღლე და ერთი ქალიშვილი.
ანატოლი ფლიევი დე ფაქტო უშიშროების საბჭოს მდივანი
ზოგადი მონაცემები
- ანატოლი ფლიევი დაიბადა 1953 წელს ქ. ცხინვალში.
- 1970 წელს დაამთავრა ქ. ცხინვალის #2-ე საშუალო სკოლა. 1972 წელს ჩააბარა ლომონოსოვის სახელობის მოსკოვის სახელმწიფო უნივერსიტეტთან არსებულ აზია-აფრიკის ინსტიტუტში.
- სტუდენტობის პერიოდში, 1976-1977 წლებში, მუშაობდა თეირანში, საბჭოთა კავშირის საელჩოში.
- აზია-აფრიკის ინსტიტუტის დამთავრების შემდეგ, 1979-1981 წლებში, სავალდებულო სამხედრო სამსახურს გადიოდა ავღანეთში დისლოცირებულ საბჭოთა კავშირის შეიარაღებულ ძალებში. საბრძოლო მოქმედებებში მონაწილეობისათვის დაჯილდოვებულია წითელი ვარსკვლავის ორდენით.
- 1981-1992 წლებში მუშაობდა კომკავშირის ცენტრალურ კომიტეტთან არსებულ კომკავშირის უმაღლეს სკოლაში (ახალგაზრდობის ინსტიტუტი). იყო უფროსი მასწავლებელი.
- 1988 წელს ანატოლი ფლიევმა ასპირანტურა დაამთავრა და ფილოსოფიის მეცნიერებათა კანდიდატი გახდა.
- 1992 წლიდან ფლიევი სხვადასხვა კომერციულ სტრუქტურებში მუშაობდა. 2008-2010 წლებში იყო გამომცემლობა „Олма-политиздат“-ის და კომპანია „Росучприбор“-ის გენერალური დირექტორი, რომელიც საგანმანათლებლო ლოჯისტიკის სფეროში საქმიანობდა.
- 2010-2012 წლებში კი კომპანია „Медиус“-ის გენერალური დირექტორის მოადგილედ მუშაობდა, რომელიც საბჭოთა კავშირისა და ყოფილი იუგოსლავიის ვალების რესტრუქტურიზაციის ფარგლებში ეწეოდა მონტენეგროს სასწავლო-საგანმანათლებლო აღჭურვილობებით მომარაგებას, მონტენეგროსა და რუსეთის ფედერაციას შორის არსებული საერთაშორისო შეთანხმების საფუძველზე.
პოლიტიკური კარიერა
- 2012 წლის 20 ივნისს სამხრეთ ოსეთის დე ფაქტო პრეზიდენტმა ლეონიდ თიბილოვმა ანატოლი ფლიევი უშიშროების საბჭოს მდივნად დანიშნა.
- 2013 წლის 12 ივლისს ანატოლი ფლიევმა და რუსეთის ფედერაციის უშიშროების საბჭოს მდივანმა ნიკოლაი პატრუშევმა ხელი მოაწერეს ურთიერთთანამშრომლობის მემორანდუმს რუსეთის და სამხრეთ ოსეთის უშიშროების საბჭოებს შორის. თანამშრომლობა შეეხება „საზღვრის“ ერთობლივ დაცვას, საიმიგრაციო პოლიტიკას, ტერორიზმს და უსაფრთხოების სხვა გამოწვევებს. მემორანდუმის ფარგლებში დაგეგმილია ერთობლივი კომისიის შექმნა, რომლის სხდომები მონაცვლეობით გაიმართება მოსკოვსა და ცხინვალში.
ანატოლი ბიბილოვი დე ფაქტო სამოქალაქო თავდაცვის, საგანგებო სიტუაციებისა და სტიქიური უბედურებების შედეგების ლიკვიდაციის მინისტრის მოვალეობის შემსრულებელი
ზოგადი მონაცემები
- ანატოლი ბიბილოვი დაიბადა 1970 წლის 6 თებერვალს ქ. ცხინვალში.
- დაამთავრა სპეციალური სკოლა-ინტერნატი, სადაც სწავლობდა რუსულ ენას და გადიოდა გაძლიერებულ სამხედრო-ფიზიკურ მომზადებას. სკოლა-ინტერნატის დამთავრების შემდეგ, 1988 წელს, გახდა რიაზანის საჰაერო-სადესანტო სასწავლებლის კურსანტი.
- სასწავლებლის დამთავრების შემდეგ, 1992 წლიდან, მსახურობდა ფსკოვის 76-ე სადესანტო დივიზიაში.
- ანატოლი ბიბილოვს ყავს მეუღლე და ოთხი შვილი.
სამხედრო-პოლიტიკური კარიერა
- 1992-1994 წლებში ანატოლი ბიბილოვი მონაწილეობდა ცხინვალის რეგიონში სამშვიდობო ძალების კონტინგენტში.
- 1994 წელს სამუშაოდ გადავიდა სეპარატისტული სამხრეთ ოსეთის შეიარაღებულ ძალებში, სადაც 1996 წლამდე სპეციალური დანიშნულების ასეულს მეთაურობდა.
- 1996-1998 წლებში ანატოლი ბიბილოვი ცხოვრობდა კიევში, ეწეოდა ბიზნეს-საქმიანობას.
- 1998-2008 წლებში მსახურობდა შერეული სამშვიდობო ძალების ჩრდილო-ოსურ ბატალიონში.
- 2008 წლის აგვისტოს ომის დროს ამავე ბატალიონთან ერთად მონაწილეობდა საბრძოლო მოქმედებებში.
- 2008 წლის 31 ოქტომბერს დე ფაქტო პრეზიდენტმა ედუარდ კოკოითიმ ანატოლი ბიბილოვი სამოქალაქო თავდაცვის, საგანგებო სიტუაციებისა და სტიქიური უბედურებების შედეგების ლიკვიდაციის მინისტრად დანიშნა.
- 2011 წლის ნოემბრის დე ფაქტო საპრეზიდენტო არჩევნებში სახელისუფლებო პარტია „ერთობამ“ ანატოლი ბიბილოვი პრეზიდენტობის კანდიდატად წამოაყენა.
- ბიბილოვს ღიად დაუჭირა მხარი რუსეთის მაშინდელმა პრეზიდენტმა დიმიტრი მედვედევმაც, რომელიც 2011 წლის 21 ნოემბერს ბიბილოვს ჩრდილოეთ ოსეთის დედაქალაქ ვლადიკავკაზში შეხვდა.
- ანატოლი ბიბილოვმა არჩევნების მეორე ტურში ხმების 40% აიღო და ოპოზიციის კანდიდატთან ალა ჯიოევასთან დამარცხდა. თუმცა, სამხრეთ ოსეთის დე ფაქტო უზენაესმა სასამართლომ არჩევნების შედეგები გააუქმა, ხოლო ალა ჯიოევას განმეორებით არჩევნებში მონაწილეობა საერთოდ აუკრძალა, რასაც ცხინვალში ჯიოევას მხარდამჭერდა საპროტესტო აქციები მოყვა.
- 2012 წლის 6 თებერვალს, განმეორებით არჩევნებში მონაწილეობაზე ბიბილოვმა თავადაც უარი განაცხადა.
- ახლადარჩეულმა დე ფაქტო პრეზიდენტმა ლეონიდ თიბილოვმა იგი მთავრობის შემადგენლობაში დატოვა და კვლავ საგანგებო მინისტრის თანამდებობაზე დაამტკიცა.
- 2012 წლის ივლისში ბიბილოვმა პარტია „ერთობის“ რიგები დატოვა და ახალი პოლიტიკური გაერთიანება „ერთიანი ოსეთი“ ჩამოაყალიბა.
- ბიბილოვის პარტია ღიად უჭერს მხარს რუსეთის ფედერაციის შემადგენლობაში „ორი ოსეთის“ გაერთიანებას და 2014 წლის დე ფაქტო საპარლამენტო არჩევნებისათვის აქტიურად ემზადება.
დამატებითი ინფორმაცია
- ანატოლი ბიბილოვი სეპარატისტულ სამხრეთ ოსეთში ერთ-ერთ ყველაზე გავლენიან ფიგურად ითვლება.
- არის გენერალ-მაიორი და რუსეთის ფედერაციის მოქალაქე.
- იგი ხელმძღვანელობს რუსეთის საჰაერო-სადესანტო და სპეცდანიშნულების ჯარების ვეტერანთა საზოგადოებრივი ორგანიზაციის სამხრეთ ოსეთის განყოფილებას.
- ანატოლი ბიბილოვის მეგობრად მოიხსენიებენ ინგუშეთის პრეზიდენტს იუნუს-ბეკ ევკუროვს, რომელმაც 1989 წელს იგივე რიაზანის საჰაერო-სადესანტო სასწავლებელი დაამთავრა.
- 2011 წლის საპრეზიდენტო არჩევნების დროს რუსულენოვან პრესაში გაჩნდა ინფორმაცია ანატოლი ბიბილოვის კრიმინალური წარსულისა და რუსეთის სპეცსამსახურებთან კავშირის შესახებ. კერძოდ, ჩეჩნეთის პირველი ომის დროს მას იარაღით ვაჭრობაში დასდეს ბრალი. ასევე გავრცელდა ინფორმაცია, რომ კიევში ცხოვრების დროს ბიბილოვი აქტიურად იყო ჩართული კონტრაბანდასა და რეკეტში, ხოლო რუსეთის სპეცსამსახურების დაკვეთით მოაწყო უკრაინაში ჩეჩნური დიასპორის ლიდერების მკვლელობა. ბიბილოვის საარჩევნო შტაბმა აღნიშნული ბრალდებები უარყო და კონკურენტების მიერ გავრცელებული „შავ პიარი“ უწოდა.
ალა ჯიოევა დე ფაქტო ვიცე-პრემიერის მოვალეობის შემსრულებელი
ზოგადი მონაცემები
- ალა ჯიოევა დაიბადა 1949 წლის 23 აგვისტოს ქ. ცხინვალში.
- ადგილობრივი სკოლის დამთავრების შემდეგ, 1967 წელს, ალა ჯიოევა „სამხრეთ ოსეთის“ პედაგოგიურ ინსტიტუტში ჩაირიცხა. სწავლა განაგრძო ოდესის სახელმწიფო უნივერსიტეტში ფილოლოგიის ფაკულტეტზე, რომელიც 1974 წელს დაამთავრა.
- 1976 წლიდან ალა ჯიოევა მუშაობდა ცხინვალის #2-ე საშუალო სკოლის დაწყებითი კლასების პედაგოგად, რუსული ენისა და ლიტერატურის მასწავლებლად. 2000-2002 წლებში იგი ამავე სკოლის დირექტორი იყო.
- ალა ჯიოევას ჰყავს მეუღლე და ორი შვილი.
პოლიტიკური კარიერა
- ალა ჯიოევას პოლიტიკური კარიერა 2001 წლიდან იწყება, როდესაც მან დე ფაქტო საპრეზიდენტო არჩევნებში მხარი საჯაროდ დაუჭირა ედუარდ კოკოითის კანდიდატურას.
- კოკოითის არჩევნებში გამარჯვების შემდეგ, ალა ჯიოევა დე ფაქტო სამხრეთ ოსეთის განათლების მინისტრად დაინიშნა და ეს თანამდებობა მას 2008 წლამდე ეკავა.
- 2008 წლის 4 თებერვალს ჯიოევა განათლების მინისტრის თანამდებობიდან გაათავისუფლეს, ხოლო 5 თებერვალს პროკურატურამ მის წინააღმდეგ თანამდებობრივი უფლებამოსილების ბოროტად გამოყენების და თაღლითობისა და უკანონო სამეწარმეო საქმიანობის ბრალდებით სისხლის სამართლის საქმე აღძრა.
- პროკურატურის მტკიცებით, ალა ჯიოევამ რუსეთის ფედერაციის ქ. პიატიგორსკში ფასდაკლებით შეძენილი წიგნები „სამხრეთ ოსეთში“ ძვირად გაყიდა და ამ გზით 22 ათასი რუბლის ფინანსური სარგებელი მიიღო. თავად ჯიოევამ ეს პროცესი პოლიტიკურ დევნად შეაფასა და მისი მხრიდან ედუარდ კოკოითის საქმიანობის კრიტიკას დაუკავშირა.
- 2008 წლის 28 მარტს ჯიოევას 2 წლიანი შიდა პატიმრობა მიესაჯა. 2010 წლის 29 აპრილს კი სასამართლომ მას 2 წლითა და 2 თვით პირობითი თავისუფლების აღკვეთა შეუფარდა.
- 2011 წლიდან ჯიოევამ ედუარდ კოკოითის წინააღმდეგ აქტიურ პოლიტიკური კამპანია წამოიწყო. სისტემატურად მართავდა შეხვედრებს მოსკოვსა და ვლადიკავკაზში და რუსეთის ხელისუფლების მხარდაჭერის მოპოვებას ცდილობდა.
- 2011 წლის 7 სექტემბერს ოპოზიციურ ვებ-გვერდზე გავრცელდა ედუარდ კოკოითის დაცვის სამსახურის ერთ-ერთი მაღალჩინოსნის, ირბეკ ბეტეევის მიმართვა, რომელიც აცხადებდა, რომ კოკოითიმ მას ოპოზიციონერების, ალა ჯიოევას და ჯამბულატ თედეევის მკვლელობა დაავალა.
- 2011 წლის 10 ოქტომბერს ჯიოევა დე ფაქტო პრეზიდენტობის კანდიდატად დარეგისტრირდა. მალევე მისი საჯარო მხარდაჭრა დააფიქსირეს გავლენიანმა ოპოზიციურმა ფიგურებმა - ჯამბულატ თედეევმა, ყოფილმა დე ფაქტო ფინანსთა მინისტრმა აზა ხაბალოვამ და დე ფაქტო თავდაცვის ყოფილმა მინისტრმა ანატოლი ბარანკევიჩმა.
- 2011 წლის 13 ნოემბერს გამართულ დე ფაქტო არჩევნებში ალა ჯიოევამ ხმების 24.8% მიიღო და არჩევნების მეორე ტურში გავიდა, სადაც 2011 წლის 27 ნოემბერს, ხმების 56.74%-ით სახელისუფლებო კანდიდატს ანატოლი ბიბილოვს სძლია.
- დე ფაქტო ცენტრალურმა საარჩევნო კომისიამ მეორე ტურის შედეგები აღიარა, თუმცა 28 ნოემბერს, საარჩევნო პროცედურების დარღვევის მოტივით, სეპარატისტული რეგიონის უზენაესმა სასამართლომ არჩევნების შედეგები გააუქმა, ხოლო თავად ალა ჯიოევას არჩევნებში მონაწილეობა საერთოდ აუკრძალა, რასაც ჯიოევას მომხრეთა საპროტესტო აქციები მოჰყვა.
- ალა ჯიოევამ ინაუგურაციის თარიღად 2012 წლის 10 თებერვალი გამოაცხადა, თუმცა 9 თებერვალს ჯიოევას შტაბი შეიარაღებულმა ძალოვნებმა დაიკავეს, თავად ჯიოევა კი ჰიპერტონიული კრიზის დიაგნოზით საავადმყოფოში მოხვდა, რომელიც ძალოვნების მეთვალყურეობის ქვეშ 2012 წლის 24 მარტს დატოვა.
- საბოლოოდ, 2012 წლის 25 მარტს გამართულ არჩევნებში გამარჯვება ლეონიდ თიბილოვმა მოიპოვა, რომელმაც 23 მაისს ალა ჯიოევა მთავრობის თავმჯდომარის მოადგილედ დანიშნა და საკურატოროდ სოციალური სფერო ჩააბარა.
- 2014 წლის იანვარში თიბილოვმა მთავრობა გადააყენა და მას შემდეგ ჯიოევა მთავრობის თავმუჯდომარის მოვალეობის შემსრულებელია.
დამატებითი ინფორმაცია
- არის რუსეთის ფედერაციის მოქალაქე.
- 2007 წლის 14 აგვისტოს მიენიჭა რუსეთის დამსახურებული მასწავლებლის წოდება.
სოსლან გატიკოევი დე ფაქტო საგარეო დაზვერვის სამსახურის უფროსი
ზოგადი ინფორმაცია
- სოსლან გატიკოევი დაიბადა 1967 წელს.
- სამხრეთ ოსეთის პირველი დე ფაქტო პრეზიდენტის ლუდვიგ ჩიბიროვის (1996-2001 წლები) მთავრობაში იგი თავდაცვის მინისტრი იყო.
- 2001 წლის საპრეზიდენტო არჩევნებში ედუარდ კოკოითის გამარჯვების შემდეგ, გატიკოევი საცხოვრებლად ჩრდილოეთ ოსეთში გადავიდა.
- 2006 წელს ქალაქ ვლადიკავკაზში უსაფრთხოების დაცვის კერძო სამსახური ჩამოაყალიბა (შპს „АРС“).
- 2012 წლის დე ფაქტო საპრეზიდენტო არჩევნებში ახსარ ლავოევთან (მოქმედი დე ფაქტო შს მინისტრი) ერთად აფინანსებდა ლეონიდ თიბილოვის წინასაარჩვენო კამპანიას.
- 2012 წლის 22 მაისს ლეონიდ თიბილოვმა იგი საგარეო დაზვერვის სამსახურის უფროსად დანიშნა.
დამატებითი ინფორმაცია
- პრესაში გავრცელებული ცნობების თანახმად, სოსლან გატიკოევი არის ფაქტობრივი ხელმძღვანელი პარტიისა „ნიხას“, რომელიც 2013 წლის მაისში საგარეო დაზვერვის სამსახურის თანამშრომელმა რუსლან გაგლოევმა შექმნა. პარტიის ოფიციალური თავმჯდომარე 2014 წლის აპრილიდან ცხინვალის მერი ალან ალბაროვია.
- სოსლან გატიკოევისა და ახსარ ლავოევის ტანდემი მოიხსენიება როგორც გავლენიანი ჯგუფი, რომელიც მნიშვნელოვან როლს თამაშობს ცხინვალის რეგიონში მიმდინარე პოლიტიკურ და ეკონომიკურ პროცესებში.
ბორის ატოევი დე ფაქტო სახელმწიფო უშიშროების კომიტეტის ყოფილი თავმჯდომარე
ზოგადი მონაცემები
- ბორის ატოევი სამხრეთ ოსეთის დე ფაქტო სახელმწიფო უშიშროების კომიტეტის თავმჯდომარედ 2006 წლის 9 ნოემბერს, ედუარდ კოკოითის მმართველობის დროს დაინიშნა და აღნიშნული პოზიცია მან 2012 წლის საპრეზიდენტო არჩევნების შემდეგ, ლეონიდ თიბილოვის მთავრობაშიც შეინარჩუნა.
- 2006 წლის 9 ნოემბრამდე ბორის ატოევი ყაბარდო-ბალყარეთის რესპუბლიკის უშიშროების კომიტეტის მაღალჩინოსანი იყო.
- ყაბარდო-ბალყარეთამდე მსახურობდა მოსკოვში, რუსეთის უსაფრთხოების ფედერალური სამსახურის ცენტრალურ აპარატში.
- არის საბჭოთა კავშირის სახელმწიფო უშიშროების კომიტეტის ოფიცერი. მსახურობდა ავღანეთში. ღია წყაროებში მისი ბიოგრაფიული მონაცემების შესახებ ინფორმაცია მწირია.
- ატოევი უშიშროების კომიტეტის ხელმძღვანელის თანამდებობა 2014 წლის 21 აპრილს დატოვა, რის მიზეზადაც დე ფაქტო პრეზიდენტმა ლეონიდ თიბილოვმა ატოევის საპენსიო ასაკი დაასახელა. ატოევის ნაცვლად ამ თანამდებობაზე ვიქტორ შარგაევი დაინიშნა.
დავით სანაკოევი დე ფაქტო საგარეო საქმეთა მინისტრის მოვალეობის შემსრულებელი
ზოგადი ინფორმაცია
- დავით სანაკოევი დაიბადა 1976 წლის 14 დეკემბერს ქ. ცხინვალში.
- 1993 წელს დაამთავრა ცხინვალის #5-ე საშუალო სკოლა. 1993-1998 წლებში სწავლობდა „სამხრეთ ოსეთის სახელმწიფო“ უნივერსიტეტში, ეკონომიკის ფაკულტეტზე.
- 2007 წელს ჩააბარა რუსეთის პრეზიდენტთან არსებულ საჯარო მოხელეთა აკადემიის ასპირანტურაში.
პროფესიული კარიერა
- 1998-2000 წლებში დავით სანაკოევი არასამთავრობო ორგანიზაცია „სამხრეთ ოსეთის საბავშვო ფონდის“ კონსულტანტი იყო.
- 2001-2004 წლებში მუშაობდა „საზოგადოების მოტივირების და სოციალური განვითარების სააგენტოში“.
- 2004 წელს დავით სანაკოევი ადამიანის უფლებათა დაცვის სფეროში სამხრეთ ოსეთის დე ფაქტო პრეზიდენტის წარმომადგენლად დაინიშნა.
- პარალელურად, 2004-2009 წლებში მას სამხრეთ ოსეთის დე ფაქტო თავდაცვის სამინისტროს ცალკეული სამთო ასეულის მეთაურის მოადგილის თანამდებობა ეკავა.
- 2004 წელს სამხრეთ ოსეთში ქართულ მხარესთან შეტაკებების დროს სანაკოევი დაიჭრა.
- ის ასევე მონაწილეობდა 2008 წლის აგვისტოს ომში. საბრძოლო მოქმედებების დაწყებამდე, 1 აგვისტოდან 6 აგვისტომდე, დე ფაქტო პრემიერ-მინისტრის დავალებით ხელმძღვანელობდა ცხინვალიდან ბავშვებისა და ქალების ევაკუაციას.
- 2009 წლიდან ჩართულია ჟენევის დისკუსიებში.
- დავით სანაკოევი მონაწილეობდა 2012 წლის 25 მარტს ჩატარებულ განმეორებით საპრეზიდენტო არჩევნებში, სადაც მან ხმების 24.58% აიღო და მეორე ტურში გავიდა. 8 აპრილს დე ფაქტო არჩევნების მეორე ტურში სანაკოევი ხმების 42.65%-ით ლეონიდ თიბილოვის წინააღმდეგ დამარცხდა.
- სანაკოევმა არჩევნებში დამარცხება აღიარა და განაცხადა, რომ აპირებდა ახალი პოლიტიკური პარტიის დაფუძნებას სახელწოდებით „ახალი ოსეთი“ („Наеуаег Ирыстон“), რომლის დამფუძნებელი ყრილობა 2012 წლის 26 მაისს ჩატარდა. პარტიის ლიდერად დავით სანაკოევი აირჩიეს.
- 2012 წლის 30 მაისს დე ფაქტო პრეზიდენტმა ლეონიდ თიბილოვმა დავით სანაკოევი ომბუდსმენის თანამდებობიდან გადააყენა და სამხრეთ ოსეთის დე ფაქტო საგარეო საქმეთა მინისტრად დანიშნა.
დამატებითი ინფორმაცია
- დავით სანაკოევი არის სამხრეთ ოსეთის კარატე-დო-ს ფედერაციის პრეზიდენტი.
- დნესტრისპირეთის სამშვიდობო ოპერაციაში მონაწილეობისათვის 2007 წელს მიღებული აქვს მედალი.
მერაბ ჩიგოევი დე ფაქტო მთავარი პროკურორი
ზოგადი ინფორმაცია
მერაბ ჩიგოევი დაიბადა 1950 წლის 15 თებერვალს ლენინგორის (1991 წლიდან ახალგორი) რაიონის სოფელ ჯვარისუბანში.
1968 წელს დაამთავრა თბილისის ოსურენოვანი #11-ე საშუალო სკოლა.
1973 წელს დაამთავრა მოსკოვის სახელმწიფო უნივერსიტეტის იურიდიული ფაკულტეტი.
პროფესიული და პოლიტიკური კარიერა
- 1974-1977 წლებში მუშაობდა მოსკოვში, შინაგან საქმეთა სამინისტროს ერთ-ერთ რაიონულ სამმართველოში.
- 1977-1991 წლებში მუშაობდა სამხრეთ ოსეთის ავტონომიური ოლქის შს სამმართველოში, სადაც სხვადასხვა ხელმძღვანელი თანამდებობა ეკავა.
- 1996-1998 წლებში მერაბ ჩიგოევი სამხრეთ ოსეთის დე ფაქტო მთავარი პროკურორი იყო.
- 1998-2000 წლებში მას სამხრეთ ოსეთის დე ფაქტო პრემიერ-მინისტრის თანამდებობა ეკავა, რის შემდეგაც იგი კვლავ გენერალურ პროკურატურას ხელმძღვანელობდა.
- 2004 წლიდან 2008 წლამდე ჩიგოევი სამხრეთ ოსეთის დე ფაქტო იუსტიციის მინისტრი იყო.
- 2008 წელს პოსტკონფლიქტური დარეგულირების საკითხებში პრეზიდენტის სრულუფლებიანი წარმომადგენლის მოადგილედ მუშაობდა.
- 2009 წელს ჩიგოევი კომუნისტური პარტიის რიგებიდან სამხრეთ ოსეთის დე ფაქტო პარლამენტის წევრად აირჩიეს.
- 2011 წლის ნოემბერში მერაბ ჩიგოევი დე ფაქტო საპრეზიდენტო არჩევნებში პრეზიდენტობის კანდიდატად დარეგისტრირდა, თუმცა მოგვიანებით კანდიდატურა მოხსნა.
- 2012 წლის 25 აპრილიდან მერაბ ჩიგოევი სამხრეთ ოსეთის დე ფაქტო გენერალური პროკურორია.
მურატ ჯიოევი დე ფაქტო პრეზიდენტის სრულუფლებიანი წარმომადგენელი პოსტკონფლიქტური დარეგულირების საკითხებში
ზოგადი ინფორმაცია
- მურატ ჯიოევი დაიბადა 1955 წლის 1 ოქტომბერს ჯავის რაიონის სოფელ ბუზალაში.
- 1977 წელს დაამთავრა სამხრეთ ოსეთის პედაგოგიური ინსტიტუტის ისტორიული ფაკულტეტი.
- 1977-1981 წლებში სწავლობდა მოსკოვის სახელმწიფო უნივერსიტეტის ისტორიული ფაკულტეტის ასპირანტურაში.
- 1981-1989 წლებში მურატ ჯიოევი სამხრეთ ოსეთის სამეცნიერო-კვლევითი ინსტიტუტის მეცნიერ-თანამშრომელი და განყოფილების ხელმძღვანელი იყო.
- ჰყავს მეუღლე და ორი შვილი.
პოლიტიკური კარიერა
- 1990 წლიდან მურატ ჯიოევი აქტიურად ჩაერთო საქართველოდან სამხრეთ ოსეთის ავტონომიური ოლქის გამოყოფის მოთხოვნით დაწყებულ სეპარატისტულ მოძრაობაში.
- 1990-1993 წლებში იგი სამხრეთ ოსეთის უზენაესი საბჭოს დეპუტატი იყო.
- 1999 წელს ჯიოევი დე ფაქტო ცენტრალური საარჩევნო კომისიის თავმჯდომარედ დაინიშნა. მისი ხელმძღვანელობის პერიოდში, 2001 წლის დეკემბერში ჩატარდა დე ფაქტო საპრეზიდენტო არჩევნები, რომელშიც ედუარდ კოკოითიმ გაიმარჯვა.
- 2002 წელს ედუარდ კოკოითიმ მურატ ჯიოევი დე ფაქტო საგარეო საქმეთა მინისტრად დანიშნა.
- 2012 წლის 30 მაისს დე ფაქტო პრეზიდენტმა ლეონიდ თიბილოვმა ჯიოევი საგარეო საქმეთა მინისტრის თანამდებობიდან გაათავისუფლა და პოსტკონფლიქტური დარეგულირების საკითხებში პრეზიდენტის სრულუფლებიან წარმომადგენლად დანიშნა. პარალელურად, მურატ ჯიოევი სამხრეთ ოსეთის „საზღვრის“ დელიმიტაციისა და დემარკაციის სამთავრობო კომისიას ხელმძღვანელობს.
მურატ ვანეევი დე ფაქტო იუსტიციის მინისტრის მოვალეობის შემსრულებელი
ზოგადი ინფორმაცია
- მურატ ვანეევი დაიბადა 1968 წლის 12 აპრილს ქ. ცხინვალში.
- 1986-1988 წლებში მსახურობდა იალტაში, საბჭოთა კავშირის საზღვაო ფლოტში.
- 1994 წელს დაამთავრა ქ. ვლადიმირის სახელმწიფო უნივერსიტეტი, მექანიკა-ტექნოლოგიის ფაკულტეტი.
- 2005 წელს დაამთავრა ჩრდილოეთ ოსეთის კოსტა ხეთაგუროვოს სახელობის სახელმწიფო უნივერსიტეტის იურიდიული ფაკულტეტი.
- 2003 წლიდან ცხოვრობდა ქ. იაროსლავში, სადაც იურისტკონსულტანტად და ფსიქოლოგად მუშაობდა.
პოლიტიკური კარიერა
- 2012 წლის 25 მარტს სეპარატისტულ რეგიონში ჩატარებულ განმეორებით დე ფაქტო საპრეზიდენტო არჩევნებში მურატ ვანეევი სამხრეთ ოსეთის კომუნისტური პარტიის ლიდერის, სტანისლავ კოჩიევის საარჩევნო შტაბს ხელმძღვანელობდა.
- 2012 წლის 25 მაისს დე ფაქტო პრეზიდენტმა ლეონიდ თიბილოვმა მურატ ვანეევი იუსტიციის მინისტრად დანიშნა.
- 2014 წლის იანვარში დე ფაქტო პრეზიდენტმა თიბილოვმა მთავრობა დაითხოვა და მას შემდეგ ვანეევი იუსტიციის მინისტრის მოვალეობის შემსრულებელია.
დამატებითი ინფორმაცია
მურატ ვანეევი რუსეთის ლიბერალურ-დემოკრატიული პარტიის წევრია (პარტიის ლიდერია ვლადიმერ ჟირინოვსკი)
მირა ცხოვრებოვა დე ფაქტო პარლამენტის ვიცე-სპიკერი
ზოგადი მონაცემები
- მირა ცხოვრებოვა დაიბადა 1952 წლის 29 სექტემბერს ქ. ცხინვალში.
- 1969 წელს დაამთავრა ქ. ცხინვალის #2-ე საშუალო სკოლა. იმავე წელს ჩააბარა ჩრდილოეთ ოსეთის სახელმწიფო უნივერსიტეტში უცხო ენების ფაკულტეტზე.
- 1975 წლიდან მუშაობდა სამხრეთ ოსეთის უნივერსიტეტში უცხო ენების კათედრაზე, ინგლისური ენის სპეციალისტად.
- 1982 წელს ჩააბარა მოსკოვის სახელმწიფო უნივერსიტეტში ბერძნულ-რომაული ფილოლოგიის ფაკულტეტზე.
- 1988-2009 წლებში მირა ცხოვრებოვა „სამხრეთ ოსეთის სახელმწიფო“ უნივერსიტეტში მუშაობდა, სადაც სხვადასხვა დროს ხელმძღვანელობდა რუსული და საზღვარგარეთული ლიტერატურის, უცხო ენების და ინგლისურის ენის კათედრებს.
პოლიტიკური საქმიანობა
- 2009 წლის 31 მაისს, სახელისუფლებო პარტია „ერთობის“ რიგებიდან, მირა ცხოვრებოვა აირჩიეს სამხრეთ ოსეთის დე ფაქტო V მოწვევის პარლამენტის წევრად და ვიცე-სპიკერად.
- 2011 წლის დე ფაქტო საპრეზიდენტო არჩევნებზე შექმნილი პოლიტიკური კრიზისის დროს, რომელიც არჩევნებში ოპოზიციონერი კანდიდატის ალა ჯიოევას გამარჯვებას მოყვა, მირა ცხოვრებოვამ ედუარდ კოკოითის საჯაროდ მოუწოდა გადადგომისკენ.
- 2012 წლის განმეორებით არჩევნებში საინიციატივო ჯგუფმა, რომელსაც პირველი პრეზიდენტის ლუდვიგ ჩიბიროვის ქალიშვილი მარინა ჩიბიროვა ხელმძღვანელობდა, მირა ცხოვრებოვა პრეზიდენტობის კანდიდატად წამოაყენა.
- თუმცა, 2012 წლის 6 თებერვალს ცხოვრებოვამ საკუთარი კანდიდატურა დიმიტრი მედოევის სასარგებლოდ მოხსნა, რომელიც იმ დროს რუსეთში სეპარატისტული რეგიონის ელჩი იყო და კვლავ ვიცე-სპიკერის საქმიანობას დაუბრუნდა.
- 2013 წლის აპრილში მირა ცხოვრებოვამ განაცხადა, რომ საქართველო ვალდებულია სამხრეთ ოსეთს 2008 წლის ომის დროს მიყენებული ზარალი აუნაზღაუროს.
იური ძიწოითი დე ფაქტო პარლამენტის ვიცე–სპიკერი
ზოგადი მონაცემები
- იური ძიწოითი დაიბადა 1961 წლის 6 ივნისს ქ. ცხინვალში.
- 1968–1978 წლებში სწავლობდა ქ. ცხინვალის #2 საშუალო სკოლაში.
- 1978–1983 წლებში სწავლობდა სამხრეთ ოსეთის პედაგოგიურ ინსტიტუტში ფილოლოგიის მიმართულებაზე.
- 1983–1984 წლებში მუშაობდა გაზეთ „Советон Ирыстон“–ის რედაქციაში კორექტორად.
- 1984–1985 წლებში სსრკ შეიარაღებულ ძალებში მსახურობდა.
- 1986–1987 წლებში გაზეთ „Советон Ирыстон“–ის რედაქციაში კორექტორად, შემდეგ კი მთარგმნელად მუშაობდა.
- 1988–1990 წლებში სსრკ მეცნიერებათა აკადემიის ენათმცოდნეობის ინსტიტუტის ასპირანტურაში სწავლობდა.
- 1990–იანი წლებიდან „სამხრეთ ოსეთის“ სამეცნიერო კვლევით ინსტიტუტში მუშაობს.
- 1994 წლიდან ასწავლის „სამხრეთ ოსეთის“ სახელმწიფო უნივერსიტეტში.
- 1990 წელს გახდა ფილოლოგიის მეცნიერებათა კანდიდატი.
- 2009 წლიდან არის დოცენტი.
- გამოქვეყნებული აქვს ასზე მეტი სამეცნიერო ნაშრომი, მათ შორის 3 მონოგრაფია.
- ყავს მეუღლე და ორი ქალიშვილი.
პოლიტიკური კარიერა
- იური ძიწოითი 1991 წლის მარტში სსრკ–ის შენარჩუნების მიზნით სამხრეთ ოსეთის ტერიტორიაზე დაგეგმილი რეფერენდუმის ჩასატარებლად რეგიონში შექმნილ ცენტრალურ საარჩევნო კომისიას ხელძღვანელობდა. 1992 წლის 19 იანვრის სამხრეთ ოსეთის რესპუბლიკის დამოუკიდებლობაზე რეფერენდუმის ჩასატარებლადაც ცენტრალურმა საარჩევნო კომისიამ შექმნა ცენტრალური კომისია, რომელსაც კვლავ ძიწოითი ხელმძღვანელობდა.
- 2011 წლის დე ფაქტო საპრეზიდენტო არჩევნების პერიოდში შექმნილი პოლიტიკური კრიზისის პერიოდში დე ფაქტო პრეზიდენტ ედუარ კოკოითს დაუპირისპირდა, რომელმაც ძიწოითს 11 დეკემბერს ვიცე–სპიკერობიდან გადადგომისკენ მოუწოდა.
- 2012 წლის 25 მარტის დე ფაქტო საპრეზიდენტო არჩევნებში პრეზიდენტობის კანდიდატად დარეგისტრიდა. ძიწოითი პირველი იყო პრეტენდენტებს შორის, ვინც 14 თებერვალს სახელმწიფო ენის ცოდნაზე გამოცდა ჩააბარა. ამის შემდეგ დაიწყო დე ფაქტო ცენტრალურმა საარჩევნო კომისიამ მის მხარდასაჭერად შეგროვებული 500 ხელმოწერის შემოწმება. კომისიამ რეგისტრაციაზე უარი 18 თებერვალს უთხრა. კომისიამ მიზეზად კანდიდატად დარეგისტრირებისთვის შეგროვებულ ხელმოწერებში აღმოჩენილი დარღვევები დაასახელა. ძიწოითმა კომისიის გადაწყვეტილება დე ფაქტო უზენაეს სასამართლოში გაასაჩივრა. 1 მარტს დე ფაქტო უზენაესმა სასამართლომ არ დააკმაყოფილა ძიწოითის საჩივარი.
- 2012 წლის 25 მარტს განმეორებითი არჩევნები მას შემდეგ დაინიშნა, რაც 2011 წლის 27 ნოემბერს ჩატარებული არჩვენების მეორე ტურის შედეგები დე ფაქტო უზენაესმა სასამართლომ არ აღიარა. 13 ნოემბერს გამართულ დე ფაქტო არჩევნებში ალა ჯიოევამ ხმების 24.8% მიიღო და არჩევნების მეორე ტურში გავიდა, სადაც 2011 წლის 27 ნოემბერს, ხმების 56.74%-ით სახელისუფლებო კანდიდატს ანატოლი ბიბილოვს სძლია. მიუხედავად იმისა, რომ ძიწოითი ბიბილოვს უჭერდა მხარს, მან აღიარა ჯიოევას გამარჯვება.
დამატებითი ინფორმაცია
- ძიწოეთის აზრით, შესაძლებელია ახალგორის ეთნიკურად ქართულ მოსახლეობას მიეცეს ახალგორის რაიონში ცხოვრებისა და ქართულენოვან სკოლებში სწავლის საშუალება, რადგან ეს ხალხი არ მონაწილეობდა აგვისტოს ომში, თუმცა, მისი აზრით, უნდა გადაიხედოს ისტორიისა და ლიტერატურის წიგნები.
- ძიწოეთის განცხადებებით, სამხრეთ ოსეთმა უნდა წამოწიოს გუდოს ხეობის, ჩრდილოეთ ოსეთმა კი თრუსოს ხეობის „დაბრუნების“ საკითხი.
- ძიწოითი ხშირად გამოდის ოსური ენის დაცვის მოთხოვნით. ძიწოეთი აკრიტიკებდა დე ფაქტო პრემიერ–მინისტრ ვადიმ ბროვცევს და მის მიერ ჩამოყვანილ რუს ჩინოვნიკებს, რომლებმაც არ იცოდნენ ოსური ენა და არ ქონდათ დე ფაქტო რესპუბლიკის მოქალაქეობა.
- 2010 წლის 23 მაისს მთიანი ყარაბაღის დე ფაქტო რესპულიკაში მიმდინარე საპარლამენტო არჩევნებს რუსი დამკვირვებლების მონიტორინგის ჯგუფთან ერთად აკვირდებოდა, რის გამოც აზერბაიჯანის საგარეო საქმეთა სამინისტრომ „პერსონა ნონ გრატად“ გამოაცხადა.
|