რუსეთის პრეზიდენტმა ვლადიმერ პუტინმა 10 მაისს განაცხადა, რომ რუსეთი მსოფლიო სავაჭრო ორგანიზაციაში გაწევრიანების თაობაზე მოლაპარაკებებს მხოლოდ მისი ეკონომიკური ინტერესებიდან გამომდინარე აწარმოებს და დაგმო მსო-ს ზოგიერთი წევრი სახელმწიფოს მცდელობა გამოიყენონ ეს მოლაპარაკებები, როგორც საშუალება მიაღწიონ რუსეთის მიერ დათმობებზე წასვლას სხვა საკითხებზე, რომლებიც მსო-ს წევრობას არ უკავშირდება.

„ნათელია, რომ ჩვენი ეკონომიკა უფრო გახსნილია, ვიდრე ამ პატივსაცემი ორგანიზაციის ბევრი წევრის ეკონომიკა და მოლაპარაკებები რუსეთის მსო-ში გაწევრიანების თაობაზე არ უნდა [მოლაპარაკებების] იარაღი იმ საკითხებზე, რასაც არაფერი აქვს საერთო ამ ორგანიზაციასთან“, - განაცხადა პუტინმა.

მარტში ჟენევაში გამართული მოლაპარაკებების დროს თბილისმა და მოსკოვმა ვერ მიაღწიეს შეთანხმებას რუსეთის მსოფლიო სავაჭრო ორგანიზაციაში (მსო) გაწევრიანებასთან დაკავშირებით. როგორც მსო-ს წევრი სახელმწიფო, საქართველო არ აძლევს თანხმობას რუსეთის ამ ორგანიზაციაში გაწევრიანებაზე, სანამ მოსკოვი თბილისის რამდენიმე მოთხოვნას არ შეასრულებს. ოთხი ძირითადი მოთხოვნიდან ერთი პირდაპირ კავშირშია აფხაზეთისა და სამხრეთ ოსეთის სეპარატისტულ კონფლიქტებთან, რაც კიდევ უფრო ართულებს მოლაპარაკებებს ორ მეზობელს შორის. რუსეთი აცხადებს, რომ ეს მოთხოვნა არ უნდა იქნას განხილული მსო-ს წევრობის შესახებ მოლაპარაკებების ფარგლებში.