საქართველოს სანაპირო დაცვამ დღეს კამბოჯის დროშის ქვეშ მცურავი თურქული გემი საზღვრის უკანონო კვეთის ფაქტზე ”ცხელ კვალზე” დევნის შედეგად თურქეთის განსაკუთრებულ ეკონომიკურ ზონაში დააკავა, განუცხადეს ”სივილ ჯორჯიას” სასაზღვრო პოლიციაში.

გემი, რომელიც ქვანახშირით იყო დატვირთული, ოჩამჩირის პორტიდან გამოვიდა და თურქეთის მიმართულებით მოძრაობდა. ხვალ დილისთვის გემი ფოთის პორტში იქნება უკვე გადმოყვანილი.

აფხაზური მხარე ასევე ავრცელებს ინფორმაციას გემის დაკავების შესახებ. დე ფაქტო პრეზიდენტის წარმომადგენელი კრისტიან ბჟანია არ აკონკრეტებს ნეიტრალურ წყლებში გემის დაკავების მიზეზებს, თუმცა აცხადებს, რომ ეს აფხაზეთის წინააღმდეგ თბილისის პროვოკაციის ნაწილია. 

”ასეც იყო მოსალოდნელი, სამხრეთ ოსეთში დაძაბულობის ესკალაციის პარალელურად საქართველო აფხაზეთის მიმართულებითაც გააქტიურდა,”- იუწყება ”აფსნიპრესი” ბჟანიას სიტყვებზე დაყრდნობით.

დღესვე სასაზღვრო პოლიცია ავრცელებს ინფორმაციას, რომ აფხაზეთის ავტონომიური რესპუბლიკის მიმდებარე საზღვაო სივრცეში საზღვრის უკანონო გადაკვეთის ბრალდებით 16 მაისს დაკავებული გემი "პინგვინი" აუქციონის წესით 163 000 ლარად გაიყიდა.

გემი სასამართლოს გადაწყვეტილებით კონფისკირებულ იქნა, რადგან საქართველოს კანონმდებლობის თანახმად, აფხაზეთის ავტონომიური რესპუბლიკის მიმდებარე საზღვაო სივრცე და პორტები დროებით დახურულია ყველა სახის საზღვაო მოღვაწეობისათვის, გარდა ჰუმანიტარულისა.