აფხაზეთიდან რუსეთში სასოფლო -სამეურნეო პროდუქციის ექსპორტი აიკრძალა. ამის შესახებ აფხაზეთის დე ფაქტო პრეზიდენტის ოფიციალური ვებ-გვერდი იუწყება საბაჟო კომიტეტის თავმჯდომარის მოადგილის საიდ ტარკილის სიტყვებზე დაყრდნობით.

ტარკილის თქმით, სპეციალური ბრძანებულება რუსეთის შესაბამისი უწყებიდან გასული კვირის ბოლოს მივიდა.

იკრძალება ყველა სახის სასოფლო-სამეურნეო პროდუქციის, მათ შორის ციტრუსის გატანა რუსულ ბაზარზე.

”ეს სერიოზულ შეშფოთებას იწვევს, ციტრუსის და სხვა ხილის გასაღების სეზონის მოახლოების ფონზე,” - განაცხადა ტარკილმა.

რუსულმა მხარემ იმპორტის აკრძალვის მიზეზად თვითგამოცხადებულ რეგიონში ღორის აფრიკული ცხელების გავრცელება დაასახელა.

იმ შემთხვევაში თუ აკრძალვა უახლოეს პერიოდში არ გაუქმდება, სასოფლო-სამეურნეო  პროდუქციის მწარმოებლები და ექსპორტიორები სერიოზულ ზარალს ნახავენ, რადგანაც ამ პროდუქციის, ძირითადად ციტრუსის ექსპორტი აფხაზეთის ეკონომიკის საფუძველს წარმოადგენს.