შიდა ქართლის გუბერნატორმა, ყოფილი თავდაცვის მინისტრის ირაკლი ოქრუაშვილის მეგობარმა მიხეილ ქარელმა გააკრიტიკა ხელისუფლების ქმედებები მას შემდეგ, რაც დღეს გორში მაღალჩინოსნების დაკავების შემდეგ მას და საკრებულოს წევრებს ადმინისტრაციულ შენობაში შესვლის უფლება არ მისცეს.

”ეს არის სამარცხვინო ფაქტი რაც მოხდა გორში, რომ საკრებულოს წევრები, მოსახლეობის მიერ არჩეულნი არ შეუშვეს საკრებულოს სხდომის ჩასატარებლად. ეს არის მართლაც სამარცხვინო ფაქტი, როდესაც ჩვენს ქვეყანაში ქადაგებენ დემოკრატიას და დემოკრატიულ პრინციპებს”, - განაცხადა ქარელმა. 

”ამ უმსგავსო, ამ მართლაც საშინელი ფაქტის შემდეგ, მე მართლაც მივიღებ უკვე გადაწყვეტილებას, რომელიც უახლოეს დღეებში გახდება ცნობილი ჩვენი საზოგადოებისათვის,”- დასძინა შიდა ქართლის გუბერნატორმა.

მას არ დაუკონკრეტებია, თუ რა გადაწყვეტილებას გაახმოვანებს უახლოეს ხანებში და იქნება თუ არა ეს მის შესაძლო გადადგომასთან დაკავშირებული.  ყველაფერი ეს ხდება იმ ფონზე, როცა ახლოვდება ირაკლი ოქრუაშვილის ახალი ოპოზიციური პარტიის პრეზენტაცია, რომელიც ასევე უახლოეს ხანებში იგეგმება.

არეულობა გორის ადმინისტრაციის შენობის წინ მას შემდეგ დაიწყო, რაც დღეს დილით პროკურატურისა და ფინანსთა სამინისტროს შემოსავლების სამსახურის ერთობლივი ოპერაციის შედეგად საბიუჯეტო თანხების მითვისების ბრალდებით დააკავეს გორის გამგებელი
ვასილ მახარაშვილი, საკრებულოს თავმჯდომარის მოადგილე ნუგზარ პაპუნაშვილი, ქარელის ყოფილი გამგებელი გაიოზ ზარანდია და კიდევ სამი მაღალჩინოსანი.

სპეცოპერაციის შემდეგ სამართალდამცავებმა ადმინისტრაციული შენობის ბლოკირება მოახდინეს დამატებითი მტკიცებულებების მოძიების მიზნით.

სპეცოპერაციას საპროტესტო შეკრება მოჰყვა ქალაქის ადმინისტრაციის შენობის წინ. აქციის მონაწილეები შენობაში შესვლას ცდილობდნენ, თუმცა ამის უფლება სამართალდამცავებმა არ მისცეს.

ადმინისტრაციის შენობის წინ მივიდნენ ასევე მიხეილ ქარელი და დეპუტატი მმართველი უმრავლესობიდან თეო ტლაშაძე, რომელიც ასევე ოქრუაშვილის გუნდში მოიაზრება.  მათი განცხადებით, პოლიციამ შენობისკენ გზა გადაუღობა გორის საკრებულოს წევრებს, რომლების სხდომის გამართვას გეგმავდნენ.

”ყველაფერი, რა თქმა უნდა, პოლიტიკური მიზეზით ხდება,”- განუცხადა ტლაშაძემ ჟურნალისტებს, რომელიც აღშფოთებას ვერ მალავდა. 

გორის ხმაურიან დაპირისპირება ”გაკვირვების საფუძველს” ქმნის, განაცხადა უმრავლესობის ერთ-ერთმა ლიდერმა გიგა ბოკერიამ. მისი თქმით, მმართველი პარტიის წევრობა ან ხელისუფლებაში ყოფნა ”იმუნიტეტი” არ არის, ”იმისთვის რომ ფული მოეპარათ”.

”თუ ვინმეს ეგონა, რომ მმართველი პოლიტიკური ძალიდან წასვლის სურვილი მისცემდა მას იმუნიტეტს, არ აქვს მნიშვნელობა ვინ რომელი პოლიტიკური ძალის წევრია და რომელ თანამდებობას იკავებს  - არის ის გუბერნატორი თუ სხვა, ჩვენ ვაშენებთ ისეთ ქვეყანას, რომ თუ დანაშაული ჩადენილია, მის წინააღმდეგ იქნება გამოძიება,”- განაცხადა ბოკერიამ.