შიდა ქართლში პრეზიდენტის რწმუნებული მიხეილ ქარელი თანამდებობიდან გაათავისუფლეს. ამის შესახებ ”რუსთავი 2”-ს პრემიერ-მინისტრმა ზურაბ ნოღაიდელმა განუცხადა.

ეს გადაწყვეტილება ქვეყნის პირველმა პირებმა მას შემდეგ მიიღეს, რაც 12 სექტემბერს გორის გამგებლისა და სხვა მაღალჩინოსნების დაკავების სპეცოპერაციას პროტესტი მოჰყვა, მათ შორის გუბერნატორის მხრიდანაც. მიხეილ ქარელს, რომელიც გორის ადმინისტრაციის შენობაში შეჭრას ძალით ცდილობდა, პოლიციამ წინააღმდეგობა გაუწია.

შედეგად, ქარელმა გააკრიტიკა ხელისუფლების ”დემოკრატიულობა” და განაცხადა, რომ საკუთარი გადაწყვეტილების შესახებ უახლოეს დღეებში განაცხადებდა. სავარაუდოდ, მას მხედველობაში ჰქონდა თანამდებობის დატოვება, თუმცა ხელისუფლებამ მას დაასწრო და გადააყენა.

”ჩვენი გაკვირვება და აღშფოთება გამოიწვია შიდა ქართლის გუბერნატორის მოქმედებამ იქ ჩატარებული სპეცოპერაციის დროს,”- განაცხადა 12 სექტემბერს პრემიერ-მინისტრმა, ”იმის ნაცვლად, რომ მხარში დადგომოდა ის პოლიციის თანამშრომლებს და შესაბამისად თვითონაც გამოეხატა აღშფოთება კორუფციის ფაქტებთან დაკავშირებით, პრაქტიკულად ცდილობდა ხელი შეეშალა სამართლიანობის და კანონის აღსრულებისთვის, რაც ბუნებრივია რეაგირების გარეშე ვერ დარჩებოდა”. 

ნოღაიდელიშ თქმით, გუბერნატორის გათავისუფლების შესახებ გადაწყვეტილება პრეზიდენტთან კონსულტაციების საფუძველზე იქნა მიღებული. ქარელის შემცვლელს პრეზიდენტი სააკაშვილი ამ დღეებში დაასახელებს.

მიხეილ ქარელი თავდაცვის ყოფილი მინისტრის ირაკლი ოქრუაშვილის უკანასკნელი მოკავშირე იყო, რომელიც ხელისუფლებაში თანამდებობას ამ დრომდე ინარჩუნებდა. ის სავარაუდოდ ორუაშვილის ახალ პარტიის ერთ-ერთი სახე გახდება. პარტიის პრეზენტაცია უახლოეს ხანებში იგეგმება.