თავდაცვის ყოფილი მინისტრის ირაკლი ოქრუაშვილის ადვოკატმა ეკა ბესელიამ განაცხადა, რომ მას ოქრუაშვილთან შეხვედრის საშუალება არ მისცეს მას შემდეგ, რაც გენერალურმა პროკურატურამ გაავრცელა ოქრუაშვილის ჩვენების ამსახველი ვიდეომასალა. იმავდროულად, გენერალურმა პროკურატურამ განაცხადა, რომ ბესელია ოქრუაშვილის უფლებებს აღარ დაიცავს. 

8 ოქტომბერს გამართულ პრესკონფერენციაზე ბესელიამ განაცხადა, რომ ის დღეს რამდენჯერმე შეეცადა ოქრუაშვილთან შეხვედრას ციხეში, თუმცა ციხის ადმინისტრაციამ ”გენერალური პროკურატურიდან მიღებული მითითებების შემდეგ” იგი ოქრუაშვილთან არ შეუშვა.

”ყველაფერი ეს ადასტურებს, რომ ჩვენება მიღებული იქნა ოქრუაშვილზე ზეწოლის შედეგად. ეს არის უპრეცედენტო შემთხვევა, როდესაც ხელყოფილი იქნა დაცვის უფლების აბსოლუტურად ყველა საერთაშორისო ნორმა და სტანდარტი. მე, რასაკვირველია, ვაგრძელებ ოქრუაშვილის ინტერესების დაცვას იქამდე, სანამ თვითონ, უშუალოდ ჩემი თანდასწრებით არ განაცხადებს ამაზე უარს,” - განაცხადა ბესელიამ.

იმავდროულად, გენერალურმა პროკურატურამ განაცხადა, რომ ოქრუაშვილმა უარი თქვა ბესელიას მიერ მისი უფლებების დაცვაზე და რომ ჩვენება მისი ახალი ადვოკატის თანდასწრებით იქნა მიცემული. გენერალურმა პროკურატურამ ასევე გაავრცელა, მათი თქმით, ოქრუაშვილის ხელით დაწერილი წერილი.

”გამოძიების ამ ეტაპზე, აღარ მსურს, რომ ეკა ბესელიამ ჩემი ინტერესები წარმოადგინოს,” - ნათქვამია წერილში.  

სახალხო დამცველის მოადგილე გიგა გიორგაძე 8 ოქტომბერს ოქრუაშვილს ციხეში შეხვდა. შეხვედრის შემდეგ მან ჟურნალისტებს განუცხადა, რომ დაინტერესდა ადვოკატების თემით, თუმცა ოქრუაშვილმა ამ საკითხზე კომენტარის გაკეთება არ ისურვა.